image_printپرینت خبر

آی بنیزین بیر آغ- قارا قویونو وار ایدی. او، بو‌ قویونا چوخ باغلانمیشدی. اوتلاغا گئدندن تا گون باتانا کیمی اونونلا اویناردی. بو قویون قرار ایدی تئزلیک‌له آنا اولسون. او ‌سبب‌دن قویون داها ترپه‌شه بیلمیردی. آی ‌نیزین اوره‌یی چوخ سیخیلیردی، ‌آما آتاسی دئییردی:
-‌قیزیم داریخما! بو گون- صاباح آغ-قارا، اؤزونه تای‌، بالا گتیره‌جک!
آتا‌سی‌نین سؤزونو ‌ائشیدنده آی‌بنیز بیرآز شاد اولوردو.
گون‌لر کئچدی، هفته لر، ‌‌ساعات‌لار اؤتدو… بیرگون‌ آی‌بنیز مدرسه‌دن قورتولماقدا، همیشه‌کی کیمی قاچدی ائوه، آتاسی‌نین یئمک‌لرینی گؤتوروب، اونون یانینا گئتدی. آتاسینی سس‌لدی. آتاسیندان خبر اولمادی. او اله باخدی، بو اله باخدی، اوبالارا ‌طرف گئتدی.‌ اوردان سس ‌ائشیتدی.‌سس‌لدی:
-آتا-آتا!‌ ‌بیردن آتاسی، اوبانین قاپیسینی آچدی، دئدی:
-آی‌بنیز قیزیم، گلدین می؟‌ آغ-قارا قویون آنا اولور‌.
– آتا!آتا! اولار، من ده گلم؟!
آتاسی دئدی:
-‌یوخ! ‌بیرآز دا دؤز. من گئدیم یانینا، سنی ده سس‌لرم گلرسن.‌
بیرآز سونرا آتاسی سس‌لدی. آی‌بنیز گئتدی.‌ وااای…آللاه!…. ایکی ام‌لیک قوزو، آغ-قارا قویونون کناریندا یاتمیشدی. قویون آی بنیزی گؤرمکده باشینی ترپتدی. آی‌بنیز بیر طرفدن آغلاییردی،‌ بیر طرف‌دن ده قوزولاری گؤروب، سئوینیردی.
‌قوزولارین بیریسی دوم آغ ایدی، آمما او بیریسی آغ- قارایدی. آناسی‌یلا جوت ایدی.‌ آتاسی دئدی: -آی‌بنیز، یاردیم ائت قوزولارا آناسی سوت وئرسین.‌‌
هر نه ایش گؤردوک، قویون آغ قوزویا سوت وئرمه‌دی. قوزو مه‌لر قالدی. اما آناسی اونا سوت وئرمیردی.‌ قوزو یولا دوشدو اوردان گئتسین. بیر آز اوزاقلاشمیشدی، قویون آغلادی. دوردو آیاغا. یاواش-یاواش گئتدی قوزونون دالیسیجا.‌ مله‌دی.‌ قوزو آناسی‌نین سسینی ائشیدیب، آیاق ساخلادی.‌ سونرا یئیین-یئیین، آناسینا طرف قاچدی. آناسی اوزونو، قوزونون اوزونه، بویون- قولاغینا سورتدو. آی‌بنیز ایله آتاسی دا اونلارا باخا- باخا آغلیردیلار.
سونرا آتا دئدی:
-قیزیم، آنا- بالا محببتی هئچ نه‌یه بنزه‌مز. قوزونو توت گتیر سوت یئسین، آجیندان اؤلدو.
آی‌بنیز هر گون مدرسه‌دن گئدیردی، قوزولاری‌یلا اوینوردو. آغ- قارا قویون دا قاتیلیردی اونلارا، ‌های- هارای‌لاریندان فله‌یین قولاغی کار اولوردو.‌