image_printپرینت خبر

آنئگلا هئچ زامان سیاستی اؤزل و ائولی‌لیک حیاتینا قاتمادی. اؤزو آنا اولمادی، آنجاق أری‌نین اوشاق‌لارینا وگنل‌ده آلمانیالی‌لارا بیر آنا کیمی محبت ائتدی. اؤلکه‌نین عمومی ایش‌لرینی اوغورلا یئرینه یئتیرمک‌له، عمومی قورخویلا استرسی، آزالتماغا چالیشدی.
آدیندان، موقعیندن استفاده ائدیب، قوهوم اقربا یا خود تانیشینی ایش باشینا قویمادی.

کلاسیک کوت شالوارلاری‌نین اورک آچان رنگ‌لرله، گولوش دوداغیندا، آز دانیشیب چوخ عمل ائدن آنگئلا ۱۹۵۴-نجو ایل کشیش بیر آتا و معلیم بیر آنادان هامبورگ شهرینده دونیایا گؤز آچدی. آز سونرا، اونلار بئرلین یاخین‌لیغیندا تمپلین شهرینه، دوغو آلمانیادا کؤچموشدولر. او، بئرلین دوواری‌نین چکیلمه‌سینی اوشاقلیق خاطیره‌سی کیمی اونوتمامیشدی. سونرالار دوواری ییخان زامان او، میللی اویانیش پارتی‌نین سؤز دانیشانی اولموشدو و بو اولای‌لا اونون سیاسی حیاتی‌ باشلانمیشدیر.
موفقیت پیلله‌لرینی بیر-بیر باشا چیخان آنگئلا، گنج‌لیکده کومونیست پارتیاسینا اینانمادیغی حالدا اوردا اویه اولموشدو. آنجاق گیزلیجه باتی آلمانین سیاسی برنامه‌لرینی تلویزیادان سئیر ائدردی.
۲۰۰۰-نجی ایل ” دموکرات مسیحی” پارتیاسی‌نین لیدئری اولاندا، گوجونه اینانیب، ۱۸ ایل دایانمادان سیاست عرصه سینده پارلادی.
آلمانیان اسکی باش باخانی هولموت کوهل، بیر زامان‌لار اونا قیزیم دئمیشدی. آنجاق او چوخ تئز اونون آتالیق کؤلگه‌سیندن چیخمیشدیر.
تایم قزئتی ۲۰۱۵-نجی ایلده آنگئلانی ” ایلین شخصیتی” عنوانا سئچمیشدیر. تایم اونو، آزاد دونیانین باش باخانی آدیندا قیئد ائتمیشدیر. حقیقتا ده او بو عنوانا لایق بیر قادین‌دیر. نه اوندا و نه حیاتی‌نین اوغورلو آنلاریندا ، آنگئلا غرورلانیب، های کوی سالمادی.
چوخ‌لاری بئله خیال ائدیر یوخاری پوستو اولانین سایسیز گلیری اولور. آلمانیادا سیاستچی‌لرین گلیرلری سیرلی دئییل، آرتیق هامی اونلاری آراییب بیلگی آلا بیلیر. بئله‌لیک‌له آنگئلا خانیم نئچه ایل‌لر یوخاری پوست‌لاردا چالیشماق‌لا، ۶۵ یاشیندا تکجه ۳ میلیون یورو ثروتی وار ایدی. بو رقم باشقا اؤلکه‌لرین باش باخان و پرئزیدئنت‌لریله موقایسه‌ده چوخ کیچیک بیر رقم ساییلیر.
۱۳۹۹ آذرین ۱۶- سیندا، پارتیانین لیدئرلیییندن ایسته‌یه‌رک، چیخاندا دئدی:
” دموکرات مسیحی” پارتیاسی‌نین دورومو، بو اون سکگیز ایلده چوخ دییشیب، ایندی آرتیق بو پارتی ۲۰۰۰ -ده اولان پارتی دئییل ، نه یاخشی بئله اولوب.”
او چوخ دوغرو وورغولادی چون، پارتیانین ایلک قادین لیدئری اولدوغو ، پارتیاداکی کیشی‌لرین اوستونلوک تشکیل ائتدییی محافیظه‌کار قورولوشلارلا ویداعلاشماق، حربی چاغیریشی لغو ائتمک، بیرلیکده یاشاماغین بوتون فورم‌لارینی ائشیت ائتمک، نووه انرژیسی‌یله ویداعلاشماق، قادین‌لاری ایداری باش مودورلوق‌دا یئرلشدیرمک ، ایسلام دینینی آلمانین سوسیال حیاتی اولاراق قبول ائتمک، ایکیلی وطنداشلیغی قبول ائتمک و یوزلرجه بئله ایشلر اونون ألی‌یله حیاتا کئچدی .
مئرکئلین آلمانیا و دونیانین سیاستینده ایزی و ائتکیسی دانیلمازدیر.
مئرکئلین آلمانیا باش باخانی اولدوغو بو اون اوچ ایل‌ده آلمانیا و آوروپا دا چوخ بؤیوک، ایقتصادی، ائکولوژی، کیملیک، مدنی، سوسیال و سیغیناجاق بحران‌لار یاشادی یاخود یاشانیر. بو بحران‌لاردان ۲۰۰۷- نجی ایلده کی بانک و مالیه بحرانی، و ۲۰۱۵-جی ایل سیغیناجاق بحرانی، آوروپادا فیکیر آیریلیغی و یونانستان‌ین ایقتصادی بحرانی‌یله سونا چاتان سئچکی‌لرله نتیجه‌له‌نن بیرلشمه پروسئسی‌نین پوزولماسی، ترامپ‌ین ایش اوسته گلیشیندن یارانان چتین‌لیک‌لری و همچنین آلمانیانین دا داخیل اولدوغو آوروپادا پوپولیست‌لرین یوکسلمه‌سینی سایماق اولار.
بو بحران‌لاردا دوزگون، اوزاق گؤرن سیاست ایله بوللو اوغورلار قازاندی.

آنگئلا خانیمین یاشایشی، دونیا سویه‌ده گؤردوغو اؤنملی ایش‌لر بیرداها ثبوت ائتدی دونیانین لیدئرلییینی گوجلو خانیم‌لارا تاپیشارسالار، یئر اوزنده عدالت، باریش و برابرلیک حاکیم اولار.