image_printپرینت خبر

 

🔸بیزلر هر سحر، اوشاقلی- بؤیوکلو، آروادلی- کیشیلی، قوجالی- جوانلی، هره‌ بیر باشدا مین‌بیر سئودا ایله، یولا دوشورک… قاپینی ایشگیلله‌ییب، اومود ائویمیزی قالماقاللیق توز- دومانیندا گیج سرگردان بوراخیریق.

🔸 اوجاق‌لار بومبوز، سوفره‌لر ایسه، کابینئت‌لرین ایچینده آچیلماق آرزوسیله بوکولو قالمیش…
شهرین هالای- بولایی چاغیریر بیزی. بیزیم شهره آغناشمامیزدان، یاشام دئییلن شئی جالانیر کوچه- باجانین دامارلارینا. اداره‌ده، توکان- بازاردا، مدرسه‌ده، سلمانیدا- خیاطدا، آلیشوئریشده، ترافیکده یا هر یاندا… سانکی یاشیل حیسلریمیز تالانماقدادیر هر دقیقه، هر آن…

🔸بعضن یاشامی آت کیمی چاپیریق، بعضن ده آتلی کیمی چاپدیریریق… نسه‌لر بیزی اؤزونه چکیر، نسه‌لر ده قوور بیزی اؤزوندن. گونباتان چاغی یورغون آرغینلیق ائوین هاواسینی بورویور. ائوه قاییدینجا عاغلیمزدان نه کئچر سیزجه؟ پیتزا، سالاد اولویه، پیراشکی، سوسیس، تون ماهی و… تئز یئییب، ییغیشدیریب، قضیه‌یه فیصله وئرمک.
آرتیق تاس کباب، کوفته، یئتیمچه، بورانی گلمه‌ییر عاغلیمیزا. سحردن چیینیمیزده کیف، الده موبایل، بانکدان ووروب فیلان اداره‌دن چیخیب بو یان- او یانا فیرلاناندان سونرا، کیمین حالی وار پیشیر دوشوره فیکر ائله‌سین یا دا دوز- عمللی سوفره دؤشه‌سین؟ هئچ او قدیمکی یاغ- یوغلی خؤرکلری کیم دیر یئین؟ کیمدیر خوروش یئین؟ داها هئچکیم شیله شوربا سئومیر.

🔸هله تک یئمکلر دئییل کی… پنجره دالیسینداکی عطیرشاهی یا دا شمعدانی‌لارین یئرینی، تورشو برنی‌لری‌نین یئرینی، مورببا شوشه‌لری و خیارشور دببه‌لری‌نین یئرینی فیل مجسمه‌سی، کریستال قاب- قاجاق، گوموش گوللر، پلاستیک گولدان‌لار توتوب.
کئچمیشیمیزه، تاریخیمیزه و شعوروموزا سایقیلی داوراناراق یارارلی اولماقلا بیرلیکده، معنوی، هنری- فرهنگی وارلیقلاریمیزی اونودمامالی‌ییک.
بیزلر کئچمیشی، باشیمزا گلن هر نه‌لری ایله اونوتدوغوموز کیمی، سانکی توپلوموموزون یاشادیغی بوتون یاخشی و پیس گونلری ده، هئچ یوخ‌ایمیشلر کیمی، گله‌جه‌ییمیز اوچون ده هئچ بیر ذهنیت، هئچ بیر تصوروموز یوخدور دئیه‌سن.
کولتور تاریخیمیزی و فولکلوروموزو قورجالاییب، یئنیدن گؤنده‌مه گتیریب، اینجه‌له‌ییب، قورویوب گلیشدیرمکله گلن نسیل‌لره لایقینجه بیر میراث بوراخماق اولار.