گون‌لرین بیری ایدی. دووشان‌لار بیر آغاجین کونده‌سی اوسته، بئش‌داش اوینوردولار. باشماق تیکن بؤجه‌یی چرخ سوره- سوره گئدیردی. بیر داشین دیبینده بیر کول اوت بیتمیشدی. بو کولون ایچینده دئمه بیر آغاج قوردو دینجه‌لیردی. ائله باشماق تیکن چرخ ایله اوردان کئچنده بیر چیغیرتی سسی، باشماق تیکنی اؤز طرفینه چکدی. بیردن باخدی گؤردو چیخیب قوردون قویروغونون اوستونه! اونا باخیردی کی، بیردن اؤزو ده دوشدو چایا. ایسته‌دی اوچا، قانادلاری ایسلانمیشدی، داها اوچا دا بیلمه‌دی. ال- آیاق ائله‌ییب، اؤزونو سودان چیخارتدی. قالدی آوارا… بیر طرف‌دن قوردون قویروغو یارالانمیشدی، بیر طرف‌دن ده اؤزو اوچا بیلمیردی. او اَله باخدی، بو اَله باخدی، بیردن گؤزو ساتاشدی دووشان‌لارا. سئویندی. دووشان‌لاری سس‌لَدی. آما نه قدر سس‌لدی، دووشان‌لار سسینی ائشیتمه‌دیلر.
فیکیرده ایدی کی، آللاه نئیله‌ییم، نئیله‌مه‌ییم؟ گؤزو اوزاق‌لاردان بیر قارالتی گؤردو کی، بالا- بالا بونا یاخینلاشیردی. بیر آز یاخینلاشاندا، گؤردو: بیر آیی بالاسی، فیل بالاسی، بیر ده یوماغا اوخشایان بیر حئیوان کی گؤز چتینلیک‌له سئچیردی، بونا ساری گلیرلر. باشماق تیکن سئوینجک آتیلدی، دوشدو، بلکه بونو گؤره‌لر، ایمدادینا چاتالار. بو آندا بؤجک گؤردو سو ایچیندن بیر قورباغا، آتیلا-آتیلا گلیر اونو شیکار ائتسین. تیر- تیر، تیتره‌دی. دئمه یوماغا اوخشار دا گؤرور. او سبب‌دن اؤزونو تاپشیریر یئله کی، تئز یئتیشسین بؤجه‌یه.
آیی بالاسی دا، فیل بالاسی ایله هؤوله‌سک، بؤجه‌یین دالیسیجا گئتدیلر. بیر آز قالیردی کی باشماق تیکَنه یئتیشسین. آجی تیکان‌لاریندان بیرینی آتدی قورباغایا طرف. قورباغانین باشی قاریشدی اؤزونه. بؤجه‌یی نجات وئرن چاغدا دووشان‌لار بیردن باشا دوشدولر. دیک یئرلریندن قالخدیلار. کؤتویون اوستوندن یئره آتدیلدیلار. گؤردولر قورد بیر طرف‌ده، باشماق تیکن بیر طرف‌ده، باشماق تیکنین چرخی سویون ایچینده. دئدیلر:
– بیزی نییه سسله‌مه‌میسن کی سنه یاردیم ائدک؟
او طرف‌دن ده آیی بالاسی ایله فیل بالاسی یئتیشدیلر. فیل باشلاییردی آستا- آستا پوفله‌مه‌یه کی، آیی بالاسی دئدی:
– ال ساخلا! اؤنجه آغاج قوردونون قویروغونو درمان ائتمه‌لی‌ییک.
دووشان دئدی:
-بیزیم الیمیزدن گلر.
دووشان‌لارین بیری گئتدی، بیر آز یارپاق، بیر نئچه تیکه ده آغاج بوداغی گتیردی. باشلادی یرپاق‌لاری چئینه‌دی، سونرا قوردون قویروغو اوسته تؤکدو. بیر- ایکی یارپاغی دا، یارانین اوستونه دولادی. سونرا او ال- بو الینه، آغاحین نازیک بوتالاریندان قویوب باغلادی. آیی بالاسی بئلیندن چانتاسینی چیخارتدی. اوتوردو یئره. بیر یارپاق ایله باشماق تیکه‌نی یئل‌لَدی. قانادلاری قوروماق همان اوچا بیلدی. سونرا فیل بالاسینا دئدی:
-گئت سویون ایچیندن بؤجه‌یین چرخینی گتیر.
هامی حئیوان‌لار ییغیشدیلار آغاج کؤتویونون دؤوره‌سینده اوتوردولار. دئدیلر، گولدولر. بیردن باشماق تیکن آیی بالاسی ایله، همراهلارینا دئدی:
-هارا گئدیرسیز؟ یوماغا اوخشایان حئیوانین آدی نه دیر؟
بیردن قورباغا دیله گلدی:
-هامی‌یا درمان ائله‌دیز آما من قالدیم ها.
قاه‌قاهایلا حئیوان‌لار گولنده، آیی الینی آتیب، تیکانی قورباغانین قارنیندان چیخارتدی. قورباغا اوجادان قورولداماغا گلدی. آیی بالاسی دئدی:
-بو دا سنین درمانین، داها ایسته‌ییز نه دیر؟ بو اورمانین آخیرینده بیر اوجا داغ وار. من، فیل بالاسی، کیرپی، او داغا چیخماق ایسته‌ییریک.
بیردن بؤجَک دیل‌لندی:
-سونرا….
فیل بالاسی دئدی:
-سونراسی یوخ‌دور کی. او تایا آشماق ایسته‌ییریک. کیرپی ده یولدا بیزه راست گلیب. سیز ده گلیرسیز، گلین.
بؤجک دئدی:
-من ده گلیرم.
دووشان‌لاردا دئدیلر:
-بیز ده گلیریک.
خلاصه هامیسی حاضیرلاشیب یولا دوشدولر. باشماق تیکن چرخینه میندی، گئتدیلر…گئتدیلر…آنجاق گون باتدی. آی چیخماق‌دا، اولدوزلار دا گؤی‌دن، یئره گؤز ووردولار.
بیرداش اوستونده اوتوردولار دینجه‌لسینلر. بیردن باشماق تیکن سس‌لندی:
-باخین…باخین… داغ اته‌یی اوددا یانیر. قویون گئدیم گؤروم نه خبردیر؟!
اوچدو…اوچدو… داغ اته‌یینه یئتیشدی. گؤردو داغدا اوددان خبر یوخ. چیراق‌لار یانیر، آمما… چیراق‌لارین قانادی وار. قورخدو. سونرا یاخینلاشیب، سلام وئردی. دئدی:
-سیزدن نییه اود پارلاییر؟ دئدیک بس داغ اود توتوب!گلدیم گؤرم نه خبر؟
گولدولر. بیری دئدی:
– ائله آدیمیز دا آتش بؤجه‌یی‌دیر.
باشماق تیکن دئدی:
– آنجاق چوخ گؤزل‌سیز. ایستیرسیز دوست‌لاریم‌لا تانیش اولاسیز؟ اما بیرآز اوزاقدادیرلار. هاوا قارانلیق اولدوغونا خاطیر دؤزدوق سحر اولسون، یولا دوشک.
آتش بؤجک‌لری گولدولر. دئدیلر گل بیز ایله اوچاق. گئدک دوست‌لاریوین گؤروشونه. قورخمایین قارانلیقدان. بیز یول‌لارا ایشیق سالاریق.
بیرلیکده یولا دوشدولر. اوچوب باشماق تیکنین دوست‌لارینا یئتیشدیلر. خوش-بئش دن سونرا بیرلیکده یولا دوشدولر. باش لاری اوسته اونلار اوچوردولار. گؤیه عجیبه گؤزل‌لیک وئرمیشدیلر. اونلار اوچدولار… باشماق تیکن چرخینی سوردو. کیرپی، آیی بالاسی، فیل بالاسی … یولارینی گئتدیلر. آز گئتدیلر…چوخ گئتدیلر، یول سونا چاتدی. هامیسی سلامت داغین زیروه‌سینه یئتیشدیلر. داغین باشی یامان دومان‌لیق ایدی. آتش بؤجک‌لری‌نین باشچی لاری دئدی:
-بیر آز دینجیمیزی آلاق!
سرین بولاق‌دان سو ایچدیلر. یئمک‌لرینی یئدیلر. بیر آز دینجلدیلر. باشماق تیکن سوروشدو:
-آیی بالاسی! بیزی دالینجا سالمیسان، هارایا آپاریرسان؟ دئمه‌دین نه اوچون داغا چیخماق ایستیردین؟
آیی بالاسی دئدی:
-بیرینجی‌سی بو کی، من ایدمانچی‌یام. ایشیم داغدا- داش‌دا گزمک‌دیر. ایکینجی، بو داغا گلمک‌دن بیر هدفیم وار. آتامین دوستو حکیم‌دیر. اونا یاردیم ائتمک اوچون گئدیرم داغین دالیسینداکی اورمانا. اورانین خسته‌خاناسی یوخ‌دور. حئیوان‌لار اوردا تهلوکه‌لی خسته‌لییه دوچار اولوبلار. او سبب‌دن اوردا خسته خانا قورمالی‌ییک. اؤزوم تک گلیردیم، یولدا فیل بالاسینی گؤردوم. جریانی اونا تعریف ائله‌دیم. منیمله یول‌بیر اولماق ایسته‌دی. یولون یاری‌سیندا کیرپی بیزه راست گلدی. او دا جریانی بیلیب، بیزیمله یول بیر اولماق ایسته‌دی.گلیب سیزین اورمانا چاتدیق. سیزینله تانیش اولوب، بیرلیکده یولا دوشدوک. ایندی بیلدیز می نه‌دن داغ‌دان آشماق ایستیرم؟ اگر دینجه‌لدیز، آرتیق یولا دوشک چونکی بیزی اوردا گؤزله‌ییرلر.
هامیلیق‌جا داغی آشدیق. بیر آز یولدان گئدندن سونرا اورمانین آغاج‌لاری گؤروشدو. سئوینجک آددیملاریمیزی یئیین‌لتدیک. اورمانا بیر آز قالاندا ، گؤزل قوش‌لار اوچا- اوچا بیزه طرف گلدیلر. باشیمیزین اوستونده فیرلانیب، سونرا بیزه یول گؤسترمک اوچون، اؤنوموزده اوچدولار. بیزی آغاج‌دان قورولان بیر ائوه آپاردیلار. اورادا آتامین دوستونو گؤردوم؛ او بیر یاشلی بایقوش ایدی کی، هر نه‌یی بیلردی. بیر آز دانیشدیق. دینجلدیک. سونرا هامی حئیوان‌لار ال‌بیر اولوب، آغاج‌دان گؤزل بیر تیکینتی، تیکدیلر. خسته‌لری اورا گتیردیلر. داوا-درمان‌لارینا یئتیشدیک. اونلاردان گؤز اولدوق. بئله‌لیکله خسته‌لیک‌لری کئچدی، توختادیلار. هامی ائولرده حامام جورله‌دیک. اورماندا‌کی حئیوان‌لاردان ایسته‌دیک داها بیر ده خسته‌لنمه‌مک اوچون گونده بیر دفعه یووونسونلار.
#سون.