image_printپرینت خبر

گلینجیک‌ ایلک اولاراق قدیم مصر، یونان، روم، بین‌النهرین، چین و قدیم روسیه‌ده حاضیرلانمیشدی.
ایتالیادا گلینجیک‌ اورتا عصرلردن بری مؤوجود اولماغا باشلادی، سونرادان فرانسه، اسپانیا، انگلستان، آلمان، هلند، استرالیا و تورکیه‌ده ده اینکیشاف ائتدی.
ایلک اویونجاغین یارانماسی حیکایه‌سی قدیم زامان‌لارا دایانیر. دؤرد مین ایل بوندان اول، قدیم مصرده، مصرلی‌لر «اوزیریس تانری»سی‌نین هئیکلینی گلینجیک‌ شکلینده آغاج‌دان دوزلتدیلر.
آرخئولوژی (باستان شناسی) قازینتی‌لار سایه‌سینده، کشفیات ایچریسینده تاپیلمیش نمونه‌لر تاریخده‌کی أن قدیم گلینجیک‌‌لرین نئجه گؤروندویونو اؤیرنمک ایمکانی وئردی. دینی آیین‌لرده ایستفاده ائدیلن اویونجاق‌لار ترپندییینده سس چیخاریردیلار. گلینجیک‌‌لرین ساچ‌لارینی عوض ائدن کتان ایپ‌لرینه بوکولموش گیلدن (خشت) مونجوق‌لار سس چیخاراراق تانری‌لارین ساکیتلشمه‌سینه خیدمت ائدیردی.
مصر کرالیچه‌سی (ملکه) کلئوپاترا، بو گون دونیانین بیر چوخ موزه‌سینده ساخلانیلان بؤیوک اویونجاق کلکسیونی‌نین ایلک صاحیبی اولوب.
مشهور قدیم آفریقا کوکلالاریندان (عروسک) بیری «آکوابا» ایسه ایده‌آل گؤزللییین تصویری و سونسوزلوغا قارشی قورویوجو کیمی ایستفاده ائدیلیردی. بو سئحرلی، یووارلاق شکیللی باشی اولان، تاختادان دوزلدیلمیش قادین هئیکلجییی آفریقا قبیله‌لرینین قیزلارینا ائولنمه زامانی و دونیایا ساغلام اؤولاد گتیرمک مقصدی ایله وئریلیردی. بو عنعنه بوگونه قدر قورونوب ساخلانیلیب: «آشانتی قبیله‌»سی‌نین سونسوز و حامیله قادین‌لاری سئحربازلاردان (جادوگر)، «آکوابا» کوکلالارینی الده ائدیر و اوشاق‌لارینی ساغلام دونیایا گتیرمک اوچون بئللرینه باغلاییرلار.