image_printپرینت خبر

بو سفر چوخ یاخشی اولوب، چونکی اونون قیش تعطیل‌لری‌دیر. قیش تعطیل‌لرینده او همیشه بؤیوک ننه- بؤیوک باباسی گیله گلر. و بو سفر بؤیوک ننه‌نین پیشییی لاپ بو تعطیل گون‌لرین ایچینده بالالارینی دوغاجاق‌دیر.
بؤیوک ننه دئییر:
– «مینئت»ین بو ایش‌لری دوغوم حرکت‌لری‌دیر. آما هله اصلی حرکت‌لری دئییل.
او دئییر:
– «مینئت» بیر آزدان سانجی وئریب، بالالارینی دوغا‌جاق.
آنجاق ایندی‌لیک ائوی دؤوره دولانیر بو گون سحردن.
قیش تعطیل‌لری همیشه خوش کئچر بؤیوک ننه و بؤیوک بابا گیلده چونکی او، بوردا چوخلو اوینایار، هم ده بؤیوک ننه هر گون دادلی یئمک‌لر و کئیک‌لر پیشیرر.
بؤیوک ننه کئیک پیشیرنده، بؤیوک بابا همیشه‌کیندن داها دوزلو اولار. ایستر بؤیوک ننه‌نین ایشینه قاریشسین، بو اوزدن ده آرخاسیندا دوروب اونو گودَر گؤرسون هر ایشی اولدوغو کیمی گؤرور یا یوخ! او، اؤزونو دونیانین ان یاخشی کئیک پیشیره‌نی‌ بیلیر. او دئییر کئیک‌ین یاخشی قابارماغی اوچون نه‌لر ائتمه‌یینی هامی‌دان یاخشی بیلیر. هم ده کئیک‌ین قالیب‌دان نئجه چیخارتماغینی دا باشاریر. او دئییر یوز کیلومئترلییه کیمی اونا تای کئیک پیشیرن یوخ‌دور و اؤزونو کئیک امپراتورو آدلاندیریر.
او، بئلینه بیر آشپزخانا اؤنلویو باغلاییر، باشینا قزئته کاغاذیندان بیر بؤرک دوزه‌لدیب قویور، و بؤیوک ننه‌نی او قدر بئزدیریر کی، سونوندا بؤیوک ننه اونو بوراخیر کرئپ‌چی‌لییینی ائله‌سین. بئله‌لیک‌له بؤیوک بابا کؤنلوجه ایشینی گؤرور: خمیری بیر کفگیر ایله قاوورما تاواسینا قویور، بیرینجی کرئپی‌نی قاوورماغا باشلاییر و اؤنلویونو چئویریرکن، ماهنی اوخویوب اوینایا- اوینایا کرئپی آتیر کی، تاوادا توتوب او بیری اوزونو قیزارتسین. آنجاق اونو همیشه‌کی کیمی تاواسی ایله توتماق ایسته‌دیکده ال- آیاغینی ایتیریر و کرئپ تاپبیلتی‌یله یئره دوشور. بؤیوک بابا اَییلیب دؤرد ال آیاق‌لی اونو یئردن گؤتورمه‌لی اولور. بئله اولونجا دا بالاجا اوغلان ننه‌سی ایله اوجادان بابانین بو ادالارینا قاققا چکیب گولورلر.