image_printپرینت خبر

دووشان دهشت ایچینده یئریندن گؤیه توللاندی، هاوادا چئوریلیب یئره دوشدو و باشاردیغی قدر سرعت‌له قاچدی. قاارکن یولون کناریندا بیتمیش بالقاباغا ده‌یدی. ضربه‌دن بالقاباق ساپیندان قوپاراق یووارلانماغا باشلادی. یووارلاندی، یووارلاندی، آخیردا گئدیب کونجود تارلاسینا گیردی. نتیجه‌ده کونجود توخوم‌لاری هاوایا اوچدو. بو زامان بیر قیرقوول تارلا اوزه‌ریندن اوچوردو و بیر کونجود توخومو اونون گؤزونه گیردی. قیرقوول کور- کورانه بیر بامبوک آغاجینا اوتوردو. اینجه بامبوک اَییله‌رک آلتیندا یاتان ایلانی اَزدی. ایلان قورخودان یئریندن سیچرادی و گئدیب ده‌یدی آغزیندا خیار چئینه‌ین بیر قابانا. قابانین آغزینداکی خیار دوشدو قویویا. قویونون دیبینده بیر ناقا آدلی اژدها یاتیردی. بو خیار پارچاسی دوشدو ناقانین باشینا و اونو یوخودان اویاتدی. اژدها چوخ غضب‌لندی. ناقا قویودان آتیلیب قابانا هجوم ائتدی:
-ایندی اؤلدوره‌جم سنی!
-ائی آغام!-قابان یالواردی،- گوناه‌کار من دئییلم! منه طرف قاچان ایلان ایدی…
ناقا ایلانی قوودو و تئزلیک له اونو توتدو.
-اؤله‌جکسن!- دئدی.
-آغام، من بونو تصادوفن ائتدیم!- ایلان اؤزونه برائت قازاندیرماغا چالیشدی- منی اَزَن بامبوک ایدی…
ناقا باموک‌ون یانینا گئتدی و دئدی:
-سنین سونون گلدی!
-حؤرمتلی آغام،- آغاج ناله چکدی، -منیم بونونلا هئچ بیر ایلگیم یوخ‌دور! منی اَیَن قیرقووول ایدی…
ناقا درحال قیرقوول‌ون ایزینه دوشدو:
-اؤلمه یه حاضیرلاش!
-ای آغام، قیرقووول یالوارماغا باشلادی،- بونو قصدن ائتمه‌دیم! گؤزلریمی توخوم‌لا تیخایان کونجود ایدی. هئچ نه گؤرمه‌دیم…
اژدها کونجودون یانینا گئتدی:
-حیات‌لا وداع‌لاش!
-منیم بونونلا هئچ بیر ایلگیم یوخ‌دور.،- کونجود خیشیلتی ایله دئدی. –منی سیلکه‌له‌ین بالقاباق ایدی.
ناقا بالقاباغی تاپیب دئدی:
-اؤلومون یاخین‌دیر!
-آنجاق آغام،- بالقاباق دئدی،- گوناه منیم دئییل! منی ایته‌له‌ین دووشان ایدی…
ناقا دووشانی تاپیب، دئدی:
-اؤلوم سنه! اؤلوم!
-منیم گوناهیم دئییل!- دووشان آغلادی- بیر داها بو باش وئرمه‌یه‌جک! موز یارپاغی‌نین آلتیندا جاناوار منی قورخوتدو…
ناقا موز یارپاغی‌نین آلتینا باخدی. آنجاق قورباغا اورانی ترک ائتمیشدی و اورادا هئچ کیم یوخ ایدی. ناقا دووشان‌ین اوستونه جوماراق دئدی:
-آی بالاجا یالانچی! اورادا جاناوار یوخ‌دور! ایندی سنین سونون چاتدی!
یازیق دووشان اونون قارشی‌سیندا دایاندی و باشدان آیاغا باشلادی تیتره‌مه‌یه. بورنو دا قورخودان یامان تیتره‌ییردی. دووشان‌ین بورنونون نئجه تیتره‌دییی‌نی گؤرن اژدها گولدو، غضبی سویودو و قویوسونا گئری قاییتدی. او گوندن بری دووشان‌ین بورنو هله ده تیتره‌ییر!