image_printپرینت خبر

کئچمیشده موغان ماحالیندا ال ایش‌لری، اؤزل‌لیکله توخوجولوق صنعتی ان چوخ دیرلی بیرصنعت ایمیش و بوتون جاماعات اؤزل‌لیکله خانیم‌لار، ایلین چوخ چاغین توخوجولوق ایله کئچیریب، بو یول ایله عائله اوچون گلیر الده ائدیرمیشلر.

موغاندا خالچا، فرش، قالی یا هانا توخوماق پاییز و قیشدا، چوخ اولارمیش و بو چاغ‌لار هر بیر آیدا هر بیر عاییله‌ده آزی بیر خالچا کسیلرمیش. خانیم‌لار قیشین آخیر خالچاسین ائله تنظیم‌لرمیشلر کی، بایراما اون- اون بئش گون قالمیش قورتارا چون هم ائوی واختیندا تمیزلیه‌لر هم ده بیر نئچه گون دینجه‌لیب، داها بایرامدان سونرا چؤل ایش‌لرینه حاضیرلاشالار.

بایرام آیندان بئش- اون گون کئچمیش آلاجهره آدلی بیر قوش «چیسدادا چیسدادا چیسدادا» سسیله اوخوماغا باشلاییر و بو قوش ایندی ده وار. بو قوشون گلمه‌سی و اوخوماسی خالچا یا هانا توخوجولاری اوچون بیر خبردارلیق دیر و اونو گؤستریر کی، بایراما بیر شئی قالماییب و واخت داریخیب. هاناسیندان چوخ قالان هر بیر کیمسه قونشو خانیم‌لاریندان ایمجی چاغیرار تا واختیندا هانا کسیله و هانانین قیرخینی بایرام گون‌لرینه کیمی سوپورولوب تمیزلنه. آلاجهره قوشو بونون اوچون ائل آراسیندا هاناقوشو دا آدلانیر.

کئچمیش چاغ‌لار، رادیو، تلویزیون، ساعات، ایل سایار (تقویم) و… اولمادیغی اوچون، آلاجهره قوشونون چیخماسی و اوخوماسی بایرامین بیر خبرچیسی کیمی تانینیرمیش. آلاجهره «چیسدادا چیسدادا» اوخویان حالدا، هانا آرخاسیندا اوتوروب توخویان خانیم‌لار دا اونلا سس سسه وئریب دئیرمیشلر؛

هاناسی یازا قالانین دیلی گوده اولار دیلی گوده اولار
جهره‌سی یازا قالانین دیلی گوده اولار دیلی گوده اولار