image_printپرینت خبر

-هئچ نه، آشکال ماشینی آرخایا باخمادان بیر اوشاغی آلتینا آلیب اَزدی.
-سن ده دوروب باخدین!!!
-نه ائده‌یدیم؟!
-باشیوا خئیر! او واختلار تصاددیخ چیخ! ائله‌نچی یئرلردن اوزاقلاش. قوی گتیریم قورخولوغووو گؤتوروم!…
بیر چیمدیک دوز، آزجا دا سویو تؤکوب تاوایا آلتینی قیزدیریب سو قایناردان دوشندن سونرا،
-هه، بودئی هانا! ماشین‌ین عکسینه باخ! قورخموسان، دور آپاریم سنی راستا کوچه آغزینا.
ناغیلین سونونو اوخودوم،
-آنا منی بوراخ! قوی ایچیمده اویانان حیس‌لریمله یاشاییم!- دئدیکده:
– اضافه دانیشما! ۴ ده کیمی باخار. یوبانساق الدن چیخار، گئجه جنازه دولاندیرا بیلمه‌رم.
ماحمود همیشه‌کیلر کیمی بو دؤنه ده آناسی‌نین دوشونجه‌سینه تسلیم اولوب، ایکی‌لیک‌ده راستا کوچه آغزینا گلیب اوردان دار- دودوک کوچه‌لری گئری‌ده قویوب، بیر تاختا قاپی‌یا چاتدیلار. قاپی آغزی قییمیلداییردی.
-آخیر نووبه کیم‌دی؟- آناسی سوروب دایاندیلار.
ماحمودون ال تئلفونو سس‌لندی، آتاسی‌یدی:
-آبالا هارداسان؟
-آتا خریده چیخمیشیق.
-آخی ائرته‌دن بیر کیتاب یازیب، قولتوغوما وئرمیشدی آنان!
-آتا ائوه دؤندوکده دانیشاریق.
-اولمویا یئنه ده بندچی‌ده‌سیز؟
-هه آتا! یئنه دیلیم‌دن بارا قویدوم، آنام دا ایکی ایاغینی بیر باشماغا دیره‌ییب، گرک گئدک بندچی‌یه، دئدی.
-اولدو، باشا دوشدوم.
آناسی یاخینلاشارکن:
– محمود کیم‌نن دانیشیردین؟
-آتام ایدی، سوراغیمیزی توتوردو.
-بیرسوز دئمه‌دین؟!
-دئمه دیم، آنجاق اؤزو بیلدی.
-جهنمه بیلدی، گورا بیلدی.
-آنا بوشلا ! آتا دوز دئیر، خسته خسته‌خانایا گئدر، بئکار مچیده.
-یاخجی –یاخجی! دده‌وین یولونو توتوب منیم حیرصیمی چیخارتما! من والله ناخوش دولاندیرا بیلمه‌رم.
-آما بیز سنی دولاندیریریق!!!
-آی سنین ایگید آرخان یئره گلمه سین! منه باخ گؤر کیمه گؤره یاخا ییرتیرام.
نووبه‌لری چاتمیشدی. ماحمودون آناسی بندچی‌یله دانیشیب، نووبه ده قالدیلار، بندچی ایسه الی‌نین ایچ اوزونو ماحمودون کوره‌یینه نئچه دؤنه چکرک، “گلن هفته بیر ده گلین گؤروم”- دئدی.
-هه، ایندی اوره‌ییم یئرینی تاپدی!- آناسی دئدی.
-هئچ منه فرق ائله‌مه‌دی!
-یادیندان چیخارت محمود.
-نه‌یی؟!
-زهری، دردی، ورمی!
-دده‌می دئییرسن؟!!!
-هه! دده‌وی دئییرم!
-آدام نئجه دده‌سینی یاددان چیخاردا بیلر؟!
گلیب چاتمیشدیلار ماشین آیاغینا.
-قوی بیر آز دا دم‌لمه‌لی آلاق، دئیرلر فایدادی.
-هه، بو باشقا مسئله!- ماحمود دئدی.
-یوخ، ائله قورخماغیوا گؤره‌دی.
-آخی آنا! اوندا نیه بندچی‌یه گلدیک؟!
-آدام الیندن گلنی گرک ائلیه، بیری سبب ساز اولار.
-آنا، بونلاری اوخوموسان یوخسا ائله- بئله اؤیرنمیسن؟!
-چوخ دانیشما! ائوده دئیرم.
قاپی‌لارینا چاتدیلار، آناسی آچاری سالیب قاپی اوزلرینه آچیلدی، ایچری کئچدیلر. مطبخین اوپئنی اوزه‌رینده یازیلی بیر کاغاذ وار ایدی. ماحمودون آناسی گؤتوروب اویان- بویان ائدیب ماحمودا طرف اوزالدیب، “گور نه یازیب دده‌ن؟!”- دئدی. “بونلارین ایکی کیلاس ساوادلاری باشیمیزا اویون آچیب. زنگ ویر دئه دا، هله منه ناغیل یازیر یانی کی بئله”.
-آی آنا! یازیق کیشی‌نین هر ایشینه قولپ قویورسان ها!…
-یاخجی- یاخجی! آز اونا طرف ساخلا، اوخو گؤرک نه یازیب.
-هئچ نه، یازیب من گئتدیم داغا، گئجیکسم نیگران قالمایین.
-من ده دئیرم به تؤره‌لی سؤز یازیب! دده‌ن یا داغا گئدر یا دا باغا. اوتور او دم‌لمه‌لی‌دن آزجا دم‌لییم ایچ .
ماحمود باشینی بولاییب، سن دئمه آناسی بونو گؤز آلتینا آلیب ایزلیرمیش.
-باشیوی نه‌یه توولاییرسان؟!
-هئچ ائله بئله!
-بیلیسن، کیتاب‌لار سیزی سئفه‌لدیب! دده- بالا بالاخانانی ایجاره‌یه وئرمیسیز.
-آی آنا، قورتار دا! آتام ائله سنین بو دانیشیق‌لاریوین الیندن چؤلون قوشو اولوب، بیابانین داشی! گؤروسن هئچ ائوده تاپیلماییر.
-نئینیرم؟! ائوده ده اولاندا کئچیب او خارابا قالمیش اوتاغینا یا کیتاب اوخویور یا دا او زهرمارین، آدینی دوزه‌لدیب دئیه بیلمیرم، اوننان مشغول اولور.
-کامپیوتری دئییرسن؟!
-هه! هه! او چیخاندان لاپ قاتیب!
اؤز- اؤزونه دئیینیردی آنام. من هله بندچی‌دن اوزولمه‌میشدیم!!!!!!!