image_printپرینت خبر

.

🔸اینسان‌لارین حایاتیندا هر ایمکان کی، یاشاییش باغیشلایاندیر حؤرمتله قارشیلانیب. تورپاق دا یاشاییش وئریب او اوزدن ایلک یارانیشدان بری تورپاغین حؤرمتی وار و اینسان‌لار قان و جان باهاسینا اونو گؤزه‌تله‌ییب و ییه دوروبلار.
بو بار‌ه‌ده دیل‌لرده تورپاغا آند ایچمک‌لره ده راستلاشیریق:
– تورپاق حقی
– یئر حقی
– تورپاغین یادا، قیسمت اولماسین
– تورپاغیندان قارا یئل‌لر اسمه‌سین

🔸تدقیقاتچی‌لارین آراشدیرمالارینا گؤره، قدیم آذربایجانین موختلیف یئرلرینده تورپاق چرشنبه‌سینه فرقیلی آدلار وئریلیب. ان گئنیش آرادیجیلیق‌لاردان بیری بوجوردو: یالان چرشنبه، خبرچی چرشنبه، اؤلو چرشنبه (قارا بایرام اؤلولر اوچون)، ایلین آخیر چرشنبه‌سی، چرشنبه سوری، کوله چرشنبه و یئر چرشنبه.

🔸تورپاق چرشنبه‌سی یئتیشن زامان، تورپاق آرتیق اکینه حاضیرلانیر و اونا توخوم اکمک اولار.
بو گون یئر قیشین سویوغونون اسارتیندن قورتولور، یئر اویانیر جانلانیر تورپاغا نفس گلیر. آغاج‌لار چیچک‌لنمه‌یه باشلاییر، اوت- بیتگی جوجه‌ریر.
بو چرشنبه یازین گلیشینی و طبیعتین اویانیشینی مژده‌له‌ییر.
تورپاغین اویانماسینی اولو اجدادلاریمیز ان شن- شوخ مراسیم‌لر، نغمه‌لر، آیین‌لریله قارشی‌لامیش‌لار.
افسانه‌یه گؤره، تورپاق چرشنبه‌سی یئرین دونونو ده‌ییشیر، آدام‌لاری قیتلیق‌دان، چتینلیکدن، محرومیتدن قورتارماقلا اؤزونه داها بؤیوک قووه تاپیر.

🔸بو ایناملا باغلی خالق آراسیندا یاییلمیش اسکی بیر میفولوژی تصووره گؤره، آدام‌لارین محرومیت و قیشین قیتلیغیندان اذیت چکدیک‌لرینی بیر گونده سئل (سو)، اود، یئل و تورپاق خاتونون مدد-ینه قوناق گلیرلر.
بورادا یاتمیش تورپاق خاتونو اویالدیب آدام‌لارین آجلیق و قیتلیق چکدیک‌لرینی اونا سؤیله‌ییرلر.
تورپاق خاتون “آدام‌لاری فلاکته سالان اؤزو فلاکته دوشر” دییه یئریندن قالخیر!
سو، اود، یئل و تورپاق خاتون‌لا ال – اله وئریب:

«زامان گلدی آتش گلدی یئل گلدی»
«تزه عؤمور تزه محصول ایل گلدی»

اوخویا – اوخویا ایشیقلی دونیایا چیخیرلار.

🔸دئییرلر همین گون، ایلین عزیز گونو اولان آخیر چرشنبه دیر.
بئله‌جه تورپاغین اویانیشی اولان تورپاق چرشنبه‌سی اؤزلویونده برکتی و محصول آرتیمینی سیمووللاشدیرماقلا اینسان‌لاری مادی نعمت‌لر و بوللوق ایله تأمین ائدیب، آجیندان اؤلمک تهلوکه‌سیندن قورتارماقلا خیلاص ائدیجی، دیریلیک میسیاسی داشییر.

🔸تورپاغین مقدس‌لییی و حایات وئریجی‌لیک گوجو اوندادیر کی، دیگر یارادیلمیش‌لار دا تورپاقدان دیریلیک تاپیر.
سو، اود، یئل و تورپاق تانریجاسی بیرلشیب اینسان‌لاری قیتلیقدان و یوخسوللوقدان قورتاریرلار. ائل ادبیاتیندا سو یاشاییش، اود ایشیق‌لیق، یئل جسارت و توپراق برکت سیمگه‌سی دیر.

🔸تورپاق مقدس‌لییی تورک میفولوژی گؤروشلری ایله بارابار ائتنیک اخلاق، ده‌یرلر سیستئمینده یورد – وطن – ائل – اوبا آنلاییش ایله ده، یاناشی یارادیلیشین مادی اساسی اولماییندان ایره‌لی گله‌رک ساکرال میفولوژی کؤکلری اعتیباری‌له، دیریلمه، جانلانما آنلاییش ایله علاقه‌دار دیر.
دیرناق آراسی آرتیرماق ایسته‌ییرم کی، تورپاق چرشنبه‌سینه کوله چرشنبه‌سی ده دئییبلر. کوله، کولدن گؤتورولموش بیر کلمه‌دیر کی، قیسا و قیرتیلمیش معناسیندا گلیر بونا گؤره رسمدیر قادین‌لاریمیز بو چرشنبه ده ساچ‌لارینین و هؤروک‌لرینین اوجونو کسیب قیسالدارلار. بو رسم شرقی آوروپادا اؤزللیکله لهستان بؤلگه‌سینده ده وار، اوردا کول چرشنبه ده مؤمن‌لرین ساچ‌لارینا کول تؤکرلر.

🔸چرشنبه سوری‌نین اینانج‌لاری

دئدیک‌لره گؤره سون چرشنبه گئجه‌سینده بوتون آخار سولار دایانار و هامی اونا سجده قیلار. حتی آغاج‌لار بوداق‌لارینی اییب قالخارلار اونون چون ایل آخیر چرشنبه تورپاق حؤرمتینه بوللو شنلیک‌لرله کئچر و اینانارلار آخیر چرشنبه “نوروز “لا اوست – اوسته دوشرسه ایل داها اوغورلو کئچر.
هر کس چرشنبه مراسیمین اؤز ائوینده قالار آمما نوروزو یئددی ایل دال با دال باشقا یئرده قارشی لایارلار.
بوگون ده قونشویا الک- کیبریت- نفت وئرمزلر.
ائولرده عاییله عضولری قدر خونچایا شام تاخیب یاندیرارلار و سو آیدینلیق دیر دییه قاپی یا باجایا سو آتارلار.
قیز- گلین بو گون ده حئیوا چوبوغوندان گؤز مینجیغی دوزلدرلر و چرشنبه گونونو اوشاغا بئشیک دوزتمه‌گی اویارلی بیرلر.
چرشنبه گونو عاییله تزه ائوه کؤچمزدیلر، آمما تزه پالتار بیچمه‌یی یاخشی علامت سانارمیش‌لار. تزه پالتار گییه‌ین، هیچ واخت چیلپاق قالماز دئییب گولردیلر.
بوگون کوسولولر موطلق باریشمالی‌دیرلار و هیچ کسین آغزیندان نحس، کیفیر، و اویومسوز سؤز چیخمازدی.
بو آخشام طبیعت تزه‌لنیر هامی‌نین اوره‌یی ده تزلنمه‌لی ایدی.
آخیر چرشنبه ده یئنی اکیله‌جک تورپاق ساحه‌لرینده، اکین یئرلرینده کوتله‌وی شنلیک‌لر کئچیریلردی، بیر چوخ حاللاردا سایاچی‌لارین، جوتچولرین نغمه‌لری، مراسیم‌لری یادا دوشردی عمومی‌لیک ده آخیر چرشنبه ده تورپاق عزیزلنر آداملار تورپاغی تمیزلمه‌گه چیخار، بوستان و دیرریک‌لرده مختلیف آئین‌لر ایجرا ائدیلر.

بو یئرلر تالا یئری
بورج یئری قالا یئری
قیامت او گون قوپار
ائل کؤچه قالا یئری

باغ سالدیم باغیم آغلار
بوستانیم، تاغیم آغلار
ساغام اؤزوم آغلارام
اؤلسم تورپاغیم آغلار

یئل اسنده گول اینجر
بولبول اینجر گول اینجر
یاد باغبان باغا گیرمه
یارپاق دوشر گول اینجر

عزیزیم اوبا یازدان
خوشلانیر اوبا یازدان
جننت باغیندا اولسام
واز کئچمرم تورپاقدان

⭕️ایلین آخیر چرشنبه‌سی‌نین مراسیم‌لری

🔶 آلیش – وئریش

چرشنبه سوری گونو عادتدن دیر ائو اهلی آلیش وئریشه چیخماغی اویوملو بیلیب و بعضی آلیناجاق‌لار رسم ایدی همان گون گرک آلینا ایدی.
بوگون کیچیک منطقه‌لرین مرکزینده بؤیوک و طنطنه‌لی بازار اولار،
بوتون میللت تازا پالتارلارینی گئییب اؤز قیز- اوغلان اوشاق‌لاری ایله یئددی لوین و یا چرشنبه یئمیشی، اویونجاق، کیبریت (ایستی‌لیک)، سوپورگه (تمیزلیک)، آینا (ایشیق‌لیق)، گول (گؤزللیک) و شیرنی (داماق دادی) آلماق اوچون بو بازارا گلردیلر، ناهارا قدر بازاردا دولانیب گزردیلر. بو بازارلار آخیر چرشنبه اولدوغونا گؤره طنطنه‌لی و شولوق اولاردی.
بازارلاردا بوللوجا یئددی لوین و یا چرشنبه یئمیشی ساتاردیلار. یئددی لوین، یئددی چئشید قورو مئیوه‌نین قاریشیغیندان عیبارت اولان مئیوه مجموعونا دئیرلر. هر کس ایسته‌دیغی قدر آلیب اونو نوروز بایرامینان قاباق گئجه‌سی عایله عضولری، خصوصیله اوشاقلار آراسیندا پایلیییب و معین مقدارینی دا نوروز بایرامی گونو گؤروشه گلن‌لر اوچون بایرام سوفره‌سینه دوزردیلر.
قادین‌لار بازاردان آلدیغی سوپورگه‌نی چیخالدیب دامی سوپورردیلر، ایناناردیلار بو گون گرک ائوین دامی پیسلیک‌لردن آرینسین.

🔶 یئمک‌لر

قادین‌لار شام یئمه‌یینه اریشته پیلوو دمله‌ییب و اوستونه أت قیله‌سی و قوورما قویاردیلار. دئدیک‌لره گؤره مادی دورومو پیس اولماماق اوچون ایلده بیر سئری او دا چرشنبه آخشامی دویو دمله‌نردی.
یومورتا دوغورقانلیق سیمبولو اولدوغونا گؤره بو گون قیزلار- گلین‌لر رنگ به رنگ، بوللو یومورتا بویویاردیلار.
حتی بوگون ده اؤلموش اجدادلارین دا روحلاری شاد اولسون دییه جور به جور خؤرک‌لر، شیرنی‌لر، تاپی‌لار، پیشیریلردی چونکی بئله بیر اینانج واریدی کی اؤلموش اینسان‌لارین روحلاری اؤز ائولادلارینین دولانیشیغی‌نین یاخشی اولدوغونو گؤروب شادلانار.

قادین‌لار قورو و چئشیدلی مئیوه‌لر حاضیرلاییب سمنی حالواسی چالیب و بایرام خونچاسی بزه‌یه‌ردیلر و هامی چالیشاردی کی وارلی‌نین دا، یوخسولون دا سوفره‌سینده بو نعمت‌لردن اولسون.
بو حاضیرلیق لار آخشام قاش قارالانا قدر داوام ائدردی. آخشام گون باتان چاغی ساجی آسیب بوغدانین آرینیب سئچیلمیشیندن و سود ده یاتیردیلیب قوروموشوندان گرکلی قدر قاویریب اونونلا یاناشی اؤنجه‌دن سودا ایسلانمیش نوخودو ساج اوسته قاویراردیلار سونرا ایلکین گؤتوروب ائوین باشینا توولایبب، سپردیلر. اینانیردیلار بئله‌جه برکت چوخالار.

🔶 چرشنبه اودو یا نادارا

آخشام قاش قارالاندا بؤیوک – بؤیوک تونقال‌لار قورولار.
عاییله عضولاری هامیسی نردیوانلا داما چیخارلار. ائوین بؤیوگو دامین وسطینده قورو تیکاندان اود یاندیراردی، یادا تونقال قوراردی، ائله‌کی آلووی گؤیه اوجالسین.
او گئجه کیمسه ائوده اوتورماز، شوگومو پیس دییردیلر.
تعریفله‌یرلر کی، بیر قوجا دامدا ال‌لرینی قوزایار گؤیه دئیر: آللاه سنه مین شوکور، بیلدیر بو واخت اون تومن سرمایامیز واریدی، ایلی باشا- باش ایشله‌ییب قازانیب، یاخشی دولاندیق و اون تومن ده یئرینده دیر.
سونرا ایشاره ائده‌رک اوشاق‌لارا دئییر:
«هه بالالار باشلایین»
اوشاق‌لار دا سس- سسه وئره‌رک اوخویارلار:

نادارا ها، نادارا
سو گلدی قندهارا
شاهیم شیروان ایچینده
اوینار مئیدان ایچینده
قیلینجی قان ایچینده
مئیدانین آغاج‌لاری
بار گتیرمز باش‌لاری
آغا دایینین قاش‌لاری
هئی دؤیوشر قوچ‌لاری
ایکی دانا ها، ایکی دانا
ایکی دانا بیر قوش ایدی
باغچایا قونموش ایدی
بگ اوغلو گؤرموش ایدی
اوخ اینن وورموش ایدی
اوخ مندن بئزار بئزار
درین- درین قویو قازار
درین قویو دا بیر کئچی
هانی به بونون قیچی
قیچی قازاندا قاینار
پیشیک یانیندا اوینار
پیشیگیم هارا گئدیرسن؟
گئدیرم بابام ائوینه
بابام ائوی ییخیلسین
قیز-گلین آتدا قالسین

بو قوشماجالار قورتولاندان سونرا گنج قیز- اوغلان بیر-بیرینین آردینجا آلووین اوستوندن یئددی یول بو طرفدن- او طرفه آتلاناراق اوخویاردیلار:
نادارا ها، نادارا
شاه گلدی قندهارا …..
و بوتون دام‌لاردا بو مراسیم اجرا اولوب اوخوناردی.
ائو اهلینی پیس روح‌لاردان، پیسلیک‌لردن قوروماق اوچون دامین اطرافین ارسین ایله جیزیق چکرمیشلر.
أره وئریلن قیزلاری تونقالین باشینا دولاندیرار و دئیرلر قوی اودلو-اوجاق‌لی اولسون.
چرشنبه اودو ساعات‌لارجا یاناردی، ایناناردیلار اود سؤنسه اوجاق دا سؤنر. همین اودون اوستونه اوزرلیک ده دولاندیراردیلار.
سونرا او اودون کؤزوندن بیر آز ائوه سالارمیشلار. او گئجه ائوین چیراغینی یا اوجاغینی او کؤز ایله یاندیرارمیشلار.

🔸چرشنبه آخشامی دب‌لردندیر بیر-بیرینین ائوینه باجادان شوخلوقجا آیدینلیق دییه سو سپرمیشلر.
بیرده او قیزلار کی بخت‌لری آچیلماق ایسته‌ییردیلر اوجاق یاندیراردیلار کی، او ایل اؤز ائولرینین اوجاغین یاندیرسینلار.
همین گئجه کورک مینیب آستانادان کئچرلر، و سوپورگه‌نی یاندیریب و آتارلار.
(بوردا دیرناق آراسی آرتیرمالی‌یام کی اینسان‌لارا سویوق‌لاردان قورتولماق او زاماندیر کی اودون مرزیندن کئچه‌لر و سویوغون لشگری اودون او طرفینده قالا و بو همان ایلین سون چرشنبه‌سی دیر. بیزه قاری سویوغون سیمگه‌سی‌دیر و قار کلمه‌سیندن آلینیب سوپورگه و اونون دسته‌سی قاری و عجوزه آروادین میندیی آغاجدیر کی ناغیل‌لاردا پیس و ایرنج شخصیتی وار، او اوزدن چرشنبه آخشامی قارلیغی سویوقلوغو شیکست وئرمک اوچون سوپورگه‌نی یاندیریب آتارلار کی، عجوزه قاری محو اولسون).

🔶 شال ساللاماق

چرشنبه آخشامی شال ساللاما، اولاردی، شال سالامایا موختلیف کوشن‌لرده فرقیلی آدلاردا دئییبلر.(توربا ساللاماق، قورشاق سالدی، شال سوخدو، بیلدی بیلدی)
گنج اوغلان‌لار، بی‌لر ال‌لرینه بیر شالدان توربادان آلیب اونو دام‌لاردا قونشونون باجاسیندان ایچری سالاردی ائو صاحابی شالا قورو یئمیش‌لردن، جویزدن، بادام‌دان، رنگلی یومورتادان، الده توخونموش جوراب‌دان، شیرنی‌دن باغلاردی و جاوانلار شالی باجادان چیخارداردی.
گنج اوغلان‌لار ایسته‌دیگی قیزین ائوینه گئدیب شالین سالیب بختین یوخلاردی، قیزین آتا- آناسی راضی اولسایدی اونون شالینا قیرمیزی آلما باغلایاردی بئله‌لیکله اؤز مئیل‌لرینین اولماسینی بلیرته ایدیلر.

🔶 پای آپارماق

بو آخشام گنج گلین‌لره، قیزلارا، باجی‌لارا پای گئدردی. آتالار – آنالار اؤز قیز ائولادلارینا کی گلین کؤچوب‌لر هدیه آلیب اوستونه آینا- شیرنی، گول، جوراب قویوب قیزین ائوینه یوللایاردی، پای آپارانین دا خلعتی اولاردی.
آمما نیشانلی قیزلارین بو مراسیمی داها ییغیناقلی و شنلی کئچیریلردی. آلدیقلاری پای دا داها گؤزه چارپیجی اولاردی.

🔶 قولاق آسما یا فال

چرشنبه آخشامی بیرینین آغزیندان فال توتارمیشلار. بئله کی، گلیب بیر ایگنه‌نی ساپلاییب معین ائتدیی شخصین قاباغیندا یئره آتاردیلار. او آدام بیلمزدی گودردیلر او آدام کی، ایسته دی دانیشا صؤحبتینین معین و ایلک قیسمی بونون فالی اولاردی.
یا قیز – گلین قاپی دالیندان قولاق آساردیلار، یا دا داما چیخیب قونشونون دامینین باجاسیندان باخیب قولاق آسارمیشلار ایلک سؤزو کی ائشیدردی اونو او ایلینین فالی و توتدوغو نیتینه حئساب ائدردی.
قولاق آسما رسم ایدی اونا گؤره هر کس اویوملو و خوش صؤحبت‌لر ائدردی.

🔸چرشنبه اویون‌لاری

چرشنبه آخشامی هئچ کس یاتمازدی. سحره‌جن ائل -طایفا بیر یئره ییغیشیب، اوخویوب، اوینویوب، شنلیک ائدردیلر.
بو گئجه‌نین اؤزونه عایید اولان اویون‌لاری واریدی کی بیر به بیر سحره‌جن اوینایاردیلار.
یومورتا چاققیشدیرماق، شاه وزیر، تک یا جوت، باشدان آتیلما، قاییش قاپدی، کله قوردانی، آل منده، بیر قوشو وار بو خرتنه، ائو قوروملاماق، اوینالینان اویون‌لاردان ایدی.

🔶سمنی خونچاسی

چرشنبه آخشامی کندده بیری اؤلسه ایدی و عاییله‌سی یاسلی اولسایدی اونلارین ائوینه سمنی خونچاسی آپاراردیلار.
خونچا دا گؤیردیلمیش چیم، قورو سونبول، بایرام پایی، نوروز شیرنی‌سی، بهمز، مئیوه، نوغول قویولاردی.
سمنی خونچاسی آپارانلار بوینونا کئچیرتدیگی توربادان ائوده – حیط‌ده اوینایان اوشاق‌لارا قوز، فیندیق، قیرمیزی بویانمیش یومورتا، قاخ، کیشمیش، وئریب حیط‌لری گزیب اوخویاردیلار:

من سئحیرلی سونبولم
من خئییرلی سونبولم
تارلالار اویلاغیم دیر
یاماج‌لار یایلاغیم دیر
اینسانلارا گره‌کم
برکتم چؤرکم
یولچولار یولداشی‌یام
آغ گونلر یایانام من
اینسانا هایانام من
من دونیانی گزرم
من دونیانی بزرم
من خئییرلی سونبولم
من سئحیرلی سونبولم

🔶 ناو مراسیمی یا آتیل – باتیل مراسیمی

ناو مراسیمی (ناودان یا همان سو یئریندن آلینمیش بیر کلمه‌دیر) چرشنبه‌نین صاباحیسی گونون ده کئچیریلن گؤزل مراسیم‌لردن دیر.
آداملاردان یئری سؤکولنده، ییغیشیب او کوشه‌نین یاخینلیغین دا اولان سویون قیراغینا (بولاق باشی، آرخ قیراغی، چشمه سویو، گؤل باشی) گئدرلر.
اینانج‌لارا گؤره، سون چرشنبه‌نین سویو داها آرتیق ایشیقلی، آیدین، خسته‌لیک گؤتورن دیر.
اینانارلار کی سو پری‌لری اینسان‌لارین دیلک‌لرینی ائشیتمک اوچون یول گؤزله‌ییرلر.
سویون باشینا گلن عاشیق‌لار سازلا – سؤزله جماعاتی سو باشینا چکرلر. سویون یانیندا شنلیک ائلییب ساعات‌لارجا چالیب اوینایارلار. جاوانلار اود یاندیرارلار جانلاری ایسین‌سین.
قادین‌لار و بخت عرفه‌سینده اولان قیزلار آلدیقلاری تزه ساخسی کوزه‌لرله، منسه، یاریم سهنگ ایله سو گتیرمک اوچون چشمه باشینا گلرلر اؤزلریله آزاجیق یاشیل‌لاشمیش بوغدا، قایچی، سورمه، آینا، داراق، دیرناق توتان گتیررلر. اوردا ایلک تزه‌لنمیش سویا باخیب گؤزلرینه سورمه چکرلر، دیرناق‌لارینی توتوب ساچلارینی دارار، آینایا باخار، ساچینی هؤرر، قایچی‌لا ساچینین اوجوندان کسیب اونلاری سویا وئرر بیرده بوغدانین گؤی‌لرینی ده سویا دوغرایارلار. بو آرادا بیر آجی سوغانی دا دیشله‌ییب سویا آتارلار. سونرا دؤنوب سودا ال – اوزلرینی یویوب و اییلیب کوزه‌لرینی تزه سو ایله دولدورارلار. سونرا دؤنوب بولاغین گؤزوندن یئددی دنه بالاجا داش گؤتوروب کوزه‌نین ایچینه سالارلار.
ایستکلی‌سی اولان قیزلارین کوزه‌لرینین دؤوره‌سینده قیرمیزی لنت اولار کی، بیلینسین‌لر.
قیزلار چشمه‌نین باشینا اویوملو اودلودوغوندان دولایی یومورتا دوزرلر.
کیشی‌لر ده اوچ بؤیورتکن قانادی قیریب ائوه گتیرر قاپی‌نین دروازانین باشینا، یا دا آستانایا کئچیررلر. ائله‌جه ده بو یئددی داش و بؤیورتکن قانادلاری او بیری ایلین سون چرشنبه‌سینه دک قالار.
سونرا هامی گلیب سو باشیندان آتلانارلار و دئیرلر:

آتیل -باتیل چرشمبه
بختیم آچیل چرشمبه
سویون باشی بیزیم دیر
چاخماق داشی سیزین دیر

قیزلار گتیردیی سودان ائوین دؤرد بوجاغینا سپیب و بعضأ ده همان سودان ساخلاییب مونجوق سالماق مراسیمینه ساخلایارلار.

ناو گونو سو باشیندان قاییدان یئنی – یئتمه‌لر و جاوانلار اؤزلری گزیب قاپی آغزینا دستمال، یا دا پاپاق آتارلار. ائو ییه‌لری اونلارین اوستونه قوز، فیندیق، شیرنی قویار. اگر دستمال آتان اوغلان بیرینین قیزین ایسته‌سه، اوندا دستمالین

🔶 جیدیر مراسیمی

تزه سو باشیندان قاییدان اینسان‌لار، کندین مئیدانیندا توپلانارلار.
گنج‌لر آت چاپار و یاریش کئچیردرلر.

کند و یا قصبه‌نین اهالیسی‌نین اکثری بوردا توپلانیب یاریشا تاماشا ائدرلر. اونو آلقیشلاییب آتیل- باتیل‌لارینی قورتاریب، تازا منسه‌لرده ائولرینه سرین و تمیز ایچمه‌لی سو گتیرن گنج قیزلارین دا هامیسی، گؤزلری سورمه‌لنمیش حالدا، بو یاریش مئیدانینا گلر، قادین‌لار قیزلار آت چاپدیران گنج‌لره تاماشا ائدرلر.

جیدیر مراسیمی تورکمن‌لر ایچینده ان قدیم دؤورلردن چوخ یاییلمیش بیر ایدمان و اگلنجه‌دیر. جیدیر مراسیمینده قادین‌لار و قیزلاری ائودارلیغا علاقه‌دار، ایشلر و آرزولارا یؤنله‌دن و گنج‌لری ایگیدلیک و قهرمانلیغا یؤنله‌دن بیر رسم و عادتدیر.

یاشامینیز و یولونوز هر زامان چرشنبه آیناسی کیمی ایشیقلی، آخیر چرشنبه‌نیز موبارک اولسون.

🔶 قایناق‌لار:
۱- ایران تورکلرینین اسکی تاریخی (پروفسور زهتابی)
۲- ۴بای، ۴ فصل (ناصر منظوری)
۳- ایل آخیر چرشنبه‌لر (بهرام اسدی)