image_printپرینت خبر

مشهور شاعیر موللا پناه واقیف سارای دا ابراهیم خانین وزیری اولماقلا یاناشی، هم ده استعدادلی اوشاق‌لاری معین‌لشدیررک خصوصی درس‌لره جلب ائدرمیش. آغابه‌ییم آغا دا واقیف‌دن درس آلارمیش، بؤیوک قابلیت صاحیبی اولموشدور.

افسوس کی، یاریم گئجه گلدی، گئجه گئتدی،
هئچ بیلمه دیم عؤمروم نئجه گلدی، نئجه گئتدی…

بو بیرجه بیت ده، ائله بیل کی، موسیقی کدره قاریشیب، کدر ده بوتون عؤمرون ایفاده‌سینه چئوریلیب. نه‌دیر مؤللیفی کدرلندیرن؟ تکجه یار ووصالی می؟..
بؤیوک قلب‌لی بیر شاعیره خانیم‌ین بو بیتی عصرلری آشیب، زمانه‌میزه قدر گلیب، اؤزو ایله شاعیرین کدرینی بیزه گتیریب چاتدیریب. اونون دیپلوماتیک فعالیتی ده اولموشدور، فرانسیز، روس دیل‌لرینی بیلمیشدیر. آغابه‌بیم آغانین هم حیاتی، هم ده یارادیجیلیغی حاقدا آز قالا افسانه‌لره قاریشمیش آز سایدا معلومات‌لار بیر شاعیر طبلی آذربایجانلی خانیم‌ین ایسه طبیعتی حاقیندا چوخ سؤز دئییر…
ایران شاهی قاراباغ خانلیغینا هجوم ائدر، موحاریبه زامانی چوخ ایتکی حسابینا اولسا دا، آغا محمدشاه قاجار شوشا-نی آلیر. بورانین آب- هاواسی، فسونکار گؤزللییی اونون چوخ خوشونا گلیر. آنجاق شاه بورادا چوخ قالا بیلمیر. ۱۷۹۷-جی ایلده آغا محمدشاه قاجار سو-قصدله اؤلدورولور. بو حادیثه قاراباغ خانلیغی ایله ایران آراسیندا اختلافی داها دا درین‌لشدیریر. بوندان سونرا آغا محمدشاه قاجارین ایکی باجیسی حاکمیت باشینا گلن فتحعلی شاه‌دان قارداشی‌نین انتقامینی آلماغی طلب ائتمه‌یه باشلاییرلار…
ابراهیم خان یئنی‌دن قانلی موحاریبه‌نین باشلانماسی‌نین قارشی‌سینی آلماغا چالیشیر، مسئله‌نی صولح یولو ایله حل ائتمه‌یه چاغیریر. او، قارابغ خانلیغی ایله ایران آراسیندا موناسبت‌لری دوزلتمک اوچون قیزی آغابه‌ییم آغانی، فتحعلی شاه‌ین ایسته‌یینی قبول ائدرک، اونا اَره وئرمه‌یی قرارا آلیر.

چوخ بؤیوک جهیزله آغابه‌ییم آغا تـهرانا گلین کؤچورولور. ایران شاه‌لیغیندا سارای اهلی بو ازدواجا قیسقانجلیق‌لا یاناشیر. قاراباغ‌دان گلن، تزه‌جه حدّ- بلوغا چاتمیش بو گؤزل خانیمی – آغابه‌ییم آغانی ایلک گوندن فتحعلی شاه‌ین گؤزوندن سالماق اوچون یول‌لار آختاریرلار. خدمتچی‌لر بیلیردیلر کی، فتحعلی شاه اؤز آناسینی چوخ سئویر، اونا تایی- برابری اولمایان گؤزل، باهالی پالتارلار تیکدیریر. روایته گؤره، اونلار بوندان استفاده ائدرک ایلک گئجه، بَـی‌له گلین‌ین گؤروشو زامانی، آغابه‌ییم آغایا، فتحعلی شاه‌ین پالتارینی گئییندیریرلر. گؤروش زامانی فتحعلی شاه مأیوس اولاراق او گوندن اونونلا اَر- آرواد موناسیبتینده اولمور.
او، ۱۸۰۱-جی ایلدن ۱۹۳۲-جی ایله دک، عؤمرونون سونونا کیمی وطن حسرتی چکه- چکه، تهراندا یاشاییر. آنجاق بیر آذربایجانلی قیزی‌نین وطن حسرتینه قاتلاشماسی مین‌لرله وطنداش قانی‌نین تؤکولمه‌سی‌نین قارشی‌سینی آلیر. مین‌لرله قیز- گلین‌ین، آغ بیرچک آنانین گؤز یاشی تؤکولمور. بونا گؤره ده شاعیره‌نین بیزه گلیب چاتمیش بو بیتینده تک یار ووصالی‌نین حسرتی یوخ، هم ده بؤیوک بیر وطن نیسگیلی، دوغما یورددان اوزاقدا یاشانان بیر عؤمور تأسفـو دویولور. آغابه‌ییم آغایا اسناد وئریلن بیر بایاتی دا واردیر:

من عاشیـقم، قارابـاغ،
قارا سالخیـم، قارابـاغ.
تهـران جنّـته دؤنسـه،
یاددان چیخماز، قارابـاغ.

بو بایاتی حاقیندا دیل‌لرده تاریخی روایت ده دولاشیر…

#داوامی_وار…