image_printپرینت خبر

جواد هئیت تبریز، تئهران، استانبول و فرانسادا تحصیلاتینی داوام ائتدیریب و ایران‌ین ان تانینمیش دوکتورلاریندان ایدی. آنجاق اونو اؤز تای توش‌لاریندان فرق‌لندیریب آییران، اونون تورکجه دیل، تاریخ و ادبیات آلان‌لاریندا گئنیش آراشدیرمالاری اولموشدور و بو آلان‌دا دا، جواد هئیت ان تانینمیش ایران‌لی‌‌، آذربایجان‌لی شخصیت‌لردن‌دیر.

جواد هئیت، اسلامی انقلاب‌دان همن سونرا، «وارلیق درگی‌سی»نی یولا سالدی و بؤیوک جهد و حؤصله ایله، ایلیم‌لی یؤنتم و یؤنه‌دیجی‌لییی‌ایله ، آیریجا اعجازلی داواملی‌لیق روحیه‌سی‌یله بو درگی‌نین یاییملانماسینی ۱۳۹۳-نجو ایله کیمی، ۳۵ ایل بویونجا داوام ائتدیردی. بئله‌لیک‌له، گونوموزده بو درگی‌دن سؤز آچینجا، وارلیق مکتبیندن سؤز آچیلیر کی، بو مکتب‌ بیر چوخ ماراق‌لانان‌لاری اؤز ایشیغینا ییغمیش و اونلارا یؤن وئرمیش اولدو. بو درگی‌ده بؤیوک اوستاد‌لار بیر اوجاق‌دا و بیر آماج اوغرونا توپلانیب، یازیب یاراتماغا، اؤیتمه‌یه و شاگیرد بئجرتمه‌یه باشلادیلار و بیر چوخ ماراقلی، باشاریلی و مفکوره‌لی گنج همین مکتب‌ده اؤیره‌نیب عرصه‌یه گلدیلر.

دوکتور جواد هئیت وارلیق مکتبی‌نین تملچی‌سی و قوروجوسو اولسا دا، بو یول‌دا بؤیوک اوستادلار و مهم شخصیت‌لر اونونلا یول‌بیر، امک‌داش و فیکیرداش ایدیلرکی، او اؤز خاطیراتیندان اونلاردان آد آپاریب. او جمله‌دن: حمید نطقی، محمدعلی فرزانه، حمید محمدزاده، غلامحسین بیگدلی، کریم مشروطه‌چی ، عزیز محسنی، میرهدایت حصاری، حسن مجیدزاده، عبدالکریم منظوری خامنه، تیمور پیرهاشمی، صمد سرداری نیا، علی کمالی، اسماعیل هادی، علیرضا صرافی، رسول اسماعیل زاده، ابراهیم رفرف، حسن راشدی و محمدرضا هیئت.

دوکتور هئیت وفات ائتدیکدن سونرا وارلیق مجله‌سی ایکی درگی قالیبینده، بیری محمد رضا هئیت، اؤلکه خاریجینده و بیری «آنا وارلیق» عنوانی ایله آیدین سرداری نیا-نین مودورلوغو ایله یاییملانماقدادیر.

جواد هئیت بو کیتاب‌دا، اؤز یاشاییش و فعالیت‌لریندن سؤز آچماقدان علاوه، تانینمیش شخصیت‌لرله خاطیره‌لرینی و گؤروشمه‌لری‌نین شرحینی گتیرمیشدیر؛ شریعتی ایله ساواک چنگینده اسیر اولدوغو چاغ‌لاردا گؤروشدویو خاطیره‌لر و اونون آزاد اولماسی اوچون گؤستردییی چابالار، اوستاد شهریار-ین آلتی آیا یاخین اونون ائوینده قالماسی و شهریاری اؤز آنا دیلی، تورکجه ایله باریشدیرماق اوچون ادبی توپلانتی‌لارین قورولماسی، علیرضا نابدل (اوختای)-یین ساواک خسته‌خاناسیندا گؤز آلتیندا اولان زامان معالجه اولونماسی، مصدق دؤورانی‌نین سیاسی شخصیت‌لری ایله گؤروشمه لری، حیدر علی‌یئو، ایلهام علی‌یئو، ائلچی‌بی، تورگوت اوزال و بیر چوخ داخیلده و خاریج‌ده اولان سیاسی شخصیت‌لرله گؤروشمک و …
بونونلا بئله، اونون دولایی‌سیز و رادیکال سیاسی مبارزه‌لره ائله اینانجی یوخ ایدی، حتتا یاشاییشیندا دا بئله بیر سیاست سئچمه‌دی. او چالیشیردی یاشامین آنا ایلکه‌لرینی پوزمایانا قدر، آماجینا توخونمایانا قدر شاه و شیخ ایله کئچینه‌رک، ایسته‌دیک‌لرینی دیالوگ ایله اؤنه سورسون.

بؤیوک هئیت عایله‌سی‌نین ایران و آذربایجان‌ین علمی و ادبی جامعه‌سینه بیر چوخ خدمت‌لرین قایناغی اولدوغو البته کی جواد هئیت‌ین آتاسی، علی هئیت‌ین تلاش‌لاری و اونون بیر ضیالی کیمی عایله و جامعه‌ده رول اوینادیغی اولمادان بلکه ده مومکون اولمازدی.

علی هئتی اوتوز ایلدن آرتیق پهلوی دؤورونون عدلیه‌سینده خیدمت ائتمیشدی و ایران‌ین سیاسی صحنه‌سینده سایقین مقامی وار ایدی. اؤولادی‌نین دئدیینه گؤره، اونون آذربایجان مسئله‌سینه و تور دیلینه درین قایغیسی وار ایدی. آیریجا اخلاقیاتا، دوزلویه باغلی اولان انسان سئور بیریسی ایدی.

دوکتور جواد هئیت‌ین وفاتیندان سونرا یاییملانان بو کیتاب، حسن راشدی و اکبر آزاد-ین همتی ایله حاضیرلانیب، آوای منجی یاییم ائوی طرفیندن ایشیق اوزو گؤروب.