image_printپرینت خبر

آسلان بیر آز اوتقوندو، ال‌لرینی محکم چالدی بیر- بیرینه، سسین اوجالدیب دئدی:
ائل دئین گولر گئدر
هر سیرّی بیلر گئدر
مردی توپراق یاشادار
نامردلر اؤلر گئدر

عزیزیم کئچدی مندن
اوخ ده‌یدی کئچدی مندن
مرد‌لره کؤرپو اولدوم
نامردلر کئچدی مندن

قافلان بونو ائشیدن زامان چوخ منقلب اولدو دئدی:
– یاشا آسلان قارداش! یاشا! بو بایاتی‌یا دا قولاق وئر:

مرد آنادان مرد اوغول
نامرده آغا، مرده قول
قورخاق تهمت آرتیرار
باش اوجالدار مرد اوغول

آسلان قول‌لارینی سالدی قافلان‌ین بوینونا دئدی:
– ایچدیغین سود حلالین اولسون! قارداش سن ده شاعیر ایمیشسن.
قافلان بیر شیرین گولومسوندو، الینی چکدی ساققالینا دئدی:
-یوخ باباریال هر دن بیر سؤز یادیما گلیر. جاوانلیقدا کی قوشوم اوچموشدو، بیر مارالا وورولموشدوم او سئوگی منی سؤزه گتیرردی، من ده بو سؤزلردن سؤیلردیم:
قیزیل گول دسته- دسته
بولبول قونار گول اوسته
بوردا بیر یار سئومیشم
آلا گؤز، بویو بسته

نوروز گولو چمنده
چیچک‌لنیب چمنده
سن گلیب گول دره‌سن
گؤزوم قالیبدی سنده

من عاشیق ورزقانا
گئده‌رم ورزقانا
گؤزلیم قوربان اولوم
سنین تک قیز دوغانا

بولبول‌لر سوزر باغی
دولاشیب گزر باغی
جمالین گول غونچاسی
آچیلسا بَزر باغی

هئی جاوانلیق!…
قافلان‌ین بو آهی آسلانی دا تیترتدی، ائوی ائو آدانلیغی دا، آسلان سازی گؤتوروب باشلادی حزین- حزین اوخوماغا:
بیر دونوم وار ایپک‌دن
آه چکمه‌رم اؤرک‌دن
هئچ کس راضی قالمادی
چرخی دؤنموش فلک‌دن

فلکین غم ایشیندن
دولدور وئر غم ایشیندن
اؤله‌یدیم قورتولایدیم
فلکین قمیشیندن

جَییر ۱ داغی، ائل داغی*
کورونا چکدی داغی
جاوان داغی داغیدار
نئجه چکیم بو داغی

قافلان بونو ائشیدمک همان حالدان گئتمک همان…
آسلان‌ین رنگی قاچدی، اوره‌یی تیتیره‌دی، چیغیردی قافلان! قافلان!
قافلان‌دان سس گلمه‌دی. اوحالدا سازدان سس گلدی:
فله‌یین چرخی دؤنسون
سو گلسین آرخی دؤنسون
لب‌لریندن اوُپوش وئر
آغزیمین تلخی دؤنسون

بو سس آسلانی باشا سالدی، دوداق‌لارینی قویدو قافلان‌ین دوداق‌لارینا هئی نفس وئردی، هئی نفس وئردی.
قافلان یاواش- یاواش آییلدی. گؤزلرینی آچدی دئدی:
-بو ساز سؤز اولماسا نیسگیل‌لر اورک‌لری تیکه- تیکه یاریب زَهَر یالادار.
گئنه سازدان سس گلدی:
باغدا گول سولمایاجاق
گؤزلریم دولمایاجاق
فله‌یین چرخی دؤنوب
آیریلیق اولمایاجاق

ایکی قارداش قوجاقلاشیب ،سازی دیل‌لندریب اوخودولار:
گتیر سازینی قارداش
پوزما یازینی قارداش
بؤیو قوچاق ایگید اول
چکیم نازینی قارداش

عاشیق اوللام ساز چاللام
فلک چوخ، من آز چاللام
اوبانین توی گونودو
باهار چاللام، یاز چاللام

عاشیق گزر داغلاردا
آسلان گزر باغلاردا
نیندن تویوق آپارما
کهلیک گزر داغلاردا

عاشیق گزیر ماحالی
سؤزله بَزه‌ر ماحالی
چوخ گزیب چوخ دولانان
اولار هر ایشدن حالی

آسلان اوخودو:
داغلار باشی دومان‌دیر
ائلین حالی یامان‌دیر
دؤوران گینه ده‌ییشیب
بلکه آخیر زامان‌دیر

قافلان جواب وئردی:
عزیزیم قیشا قالماز
گلن گون قیشا قالماز
الله کریم الله دیر
بو یورد بایقوشا قالماز

آسلان سؤیله‌دی:
اؤلکه‌م آذربایجان‌دیر
داش توپراغی مرجان‌دیر
آنانین شیرین دیلی
منه اوره‌ک‌دیر، جان‌دیر

*آچیقلامالار:

جَییر: بیر یوُکسک داغ آدی‌دیر زیوه کندیندیده
*بایاتی‌لارین بیر- ایکیسی دوکتور جوادی‌دن‌دیر و قالانی، آنام بیلن بایاتی کیتابیندان و مهدی الهیاری‌نین مطلبیندن نقل اولموشدو .
اوردا کی دیل- دوداق سؤزدن اوسانار
سوروشون مطلبی تئل‌لر سؤیله‌سین
دوداق دانیشارسا اود توتوب یانار
گرک‌دیر زخمه‌لر، تئل‌لر سؤیله‌سین

«بولود قاراچورلو»