image_printپرینت خبر

 

 

یاتیب- دینجه‌لندن سونرا حئیوان‌لاری بیر یئره ییغماق اوچون توتَـه‌یینی گؤتوروب چالماق ایسته‌دی. آما توتـه‌یینی تاپا بیلمه‌دی. سن دئمه، توتـک سئحرلی‌یمیش و آغاجا ده‌ین کیمی آغاج بؤیومه‌یه باشلاییب.

او قدر بؤیویوب کی… عزیز آغاجا چیخماق ایسته‌دی. بیر آز چیخدی، یورولدو، داها دیرماشا بیلمه‌دی. دوشدو آغاج‌دان و قیشقیردی:

– آغاج، اَییل، توتـه‌ییمی گؤتوروم!

– اَییله بیلمرم، قامتـیم اَییله‌ر، بئلیم آغرییار.

– بس نئیله‌ییم، قویون- قوزونو بیر یئره ییغمالی‌یام، آخی اونلار آنجاق توتـک سسینه ییغیلیر.

– بیلمیرم‌، اَییلمک فیکریم ده یوخدور!

 

عزیز بیلمه‌دی نئیله‌سین کی، آغاجی فیکریندن دؤندرسین. ایسته‌دی، آغاجی اودلا قورخوتسون. گئتدی اودون یانینا:

– اود، آغاجی یاندیر، اَییلسین، توتـه‌ییمی گؤتوروم.

– گئده بیلمرم، هوسیم یوخدور!

 

عزیز اودا حیرصلندی. چای‌ین یانینا گئدیب دئدی:

– آی سو، خئیرخواه سو، تمیز سو، اود  سؤندور، اود آغاجی یاندیرمیر، آغاج دا اَییلمیر. توتـه‌ییم قالیب آغاج‌دا، گؤتوره بیلمیرم.

– چوخ ائله منه لازیم‌دی…

 

عزیز کوسوب اؤکوزون یانینا گئتدی. دردینی اونا دانیشدی.

آخیردا دا دئدی:

– اؤکوز، سویو ایچ، چای قوروسون! منه کؤمک ائله‌میر!

– تزه‌جه ایچمیشم، داها باجارمارام! عزیز جاناوارای تاپیب دردینی اونا دانیشیب دئدی:

– قورد، آی قورد، اؤکوزو یئه!

جاناوار دئدی:

– یاخشی‌سی بودور، بیر آز گؤزله‌ییم، هاوا قارالسین، سنین قویون‌لارینی یئییم.

عزیز بونو ائشیتجک قاچدی اووچونون یانینا:

– اووچو عمی! منه کؤمک ائله، جاناواری وور!

– اوودان تزه گلمیشم، یورغونام، بیر ده رئزین (پلاستیک) چکمه گئیینه بیلمرم! عزیز بی‌کئف اولدو.

سیچان‌ین یانینا قاچدی:

– سیچان، آی سیچان، اووچونون رئزین چکمه‌سینی دیدیشدیر!

– شام یئمه‌ییمی یئمیشم، صاباح یئیه‌رم!

 

عزیز پیشی‌یه شکایت‌لندی:

– پیشیک! آی پیشیک، قاچ، سیچانی یئه! منه کؤمک ائله‌میر!

– او قدر یئمیشم کی، قارنیم پارتلاییر!

 

عزیز بئزیب- بی‌کئف اوتوردو. بو واخت ایت گلیب چاتدی. عزیز دردینی اونا دا دانیشاندا ایت پیشی‌یه حیرصلندی. میریلدانیب پیشی‌یین اوستونه، پیشیک ده سیچان‌ین اوستونه جومدو.

 

سیچان قاچیب اووچونون رئزین چکمه‌سی‌نین ایچری‌سینه گیردی. اووچو سیچانی قوووب، رئزین چکمه‌لرینی گئیدی. چاتیب توفنگی جاناوارا توشلادی. جاناوار توفنگی گؤرن کیمی اؤکوز سمته گؤتورولدو. اؤکوز سویا دوغرو قاچدی. سو ایسه اودا ساری آخماغا باشلادی. اود سویو گؤرن کیمی آغاجا طرف. آغاج آلووو گؤرن کیمی اَییلدی کی، بوداق‌لارینی قوروسون. عزیز سئوینجک توتـه‌یینی بوداق‌دان گؤتوردو. چالیب قویون‌لارینی بیر یئره ییغدی.

 

*ائله او واختدان اینسان‌لار ایت‌لرله مؤحکم دوست اولدولار.