image_printپرینت خبر

شاطیر گونبزی بیناسی‌نین یاخینلیغینا گلنده آشاغا تیکینتی‌سی یعنی زئرزمی‌یه بنزه‌ین بؤلومونون قورولوشو، دؤرد گؤز یا دؤرد باجاسی وار، یعنی دؤرد جغرافیایی یؤن‌لر «قوزئی، گونئی، دوْغو و باتی»نی گؤسته‌ریر. دوْکتور «رضا زرگری» بئله دئییر کی: اوْرا بیر سو ایلاهه‌سینه منسوب اوْلان معبددیر‌. بینانین قاپیسی اردبیل شهری‌نین اوْرتاسی یعنی «شیخ صفی» توربه‌سینه دوْغرو باخیر. بینانین آشاغاسی ایسلام‌دان اؤنجه‌یه قاییدیر، آنجاق اوست طرفی «ایلخانلی» دؤورونه عاییددیر.
اردبیل شهرینده قدیم یاشلی کیشی‌لر و حتتا «سوما» کندی‌نین قوْجالاری بئله دئییرلر کی: اسکی زامان‌لار شاطیر گونبزی‌نین ایچیندن «شیخ صفی» توربه‌سینه و حتتا «شیخ کهلرانا» یئر آلتی یوْل‌لار وارمیش. بو یوْل‌لار ایندی باغلانیلیب‌دیر. اوْ دئییردی من اوشاق ایدیم هله اوْ بینا آیاق اوسته اؤز صلابتینی قوْروموشدور. اردبیله ۱۳۷۵-نجی ایلده زلزله گلنده اوْنون اوست بؤلومونون چوْخ تیکینتی‌سی اوچدو، اسکی زامان‌لار بیر کتیبه قاپی‌سی‌نین اوستونده واریمیش، ایندیده کتیبه‌نین یئری بوْشلوق گؤرسه‌نیر. قوْجا دئییردی: شوروی مامورلاری بیر نئچه دفعه اوْرانی اوچورتماق ایسته‌ییردیلر بیر ایکی یئرینده سؤکموشدولر آنجاق اوْرانین سؤکمه‌ییندن داها واز کئچدیلر.
اوستو اوچورولموش کرپیج‌لی بینا هندسی شکیلینده معمارلیق باخیمیندان آذربایجاندا مرسوم اوْلان ال تیکینتی‌لریندن‌دیر کی، بونا بنزه‌ین بینالاردان ۸-نجی قرن ده زنگان شهری‌نین «سلطانیه»سینده «چلبی اوْغلو» مقبره‌سینی آد آپارماق اوْلار. شاطیر گونبزی بیناسی‌نین زئرزمییه اوْخشار آشاغا بؤلومو، داش قیریغی و اهک مالاتی ایلا دوزه‌لمیشدیر. سوْنرالار مرممت اوچون ائله همن آشاغاسینی اوچ مرتبه‌لی بؤیوک داش تیکه‌سی و آغ سیمان‌لا جورلاییب‌لار. آنجاق بو ایش کیفیت‌سیز و بینانین آشاغا اوست بؤلومونو بیر- بیریندن آییریب و معمارلیق گؤزللییینی آلیب‌دیر.

#داوامی_وار..