image_printپرینت خبر

تبریز شهرینی ۱۶۳۶ میلادی ایلینده گزن فرانسیز سیاح، ژان بابتیست تاورنیه، بو داغا گؤره بئله یازمیشدیر:
“شهر ائشیگینده «عین علی و زین علی» آدلاندریلان بیر داغ وار، اؤنجه‌لر بو داغین باشیندا آتشکده و کیلسه واریمیش، سونرالار مسلمان‌لار اونو مسجد ائله‌ییبلر. سرداباسی اولان بیر ویرانه عبادتگاه دا بو مسجدین یاخینلیغیندا واردیر کی، نئچه قبر ایچینده یئرلشیر و بیر چوخ مرمردن ستون بیر- بیری‌نین اوستونه قالانیب. دئیلن‌لره گؤره اصلینده بو مسجد بعضی ماد پادشاه‌لارینین مقبره‌سی ایمیش.

«عینالی» و «عینال، زینال» آدلاری ایله ده تانینان عون‌بن علی مقبره‌سی، تبریز شهری‌نین تاریخی آبیده‌لریندن و الخانلی‌لار دؤورونه عایددیر. سیرخاب سیرا داغلاری‌نین باشیندا یئرلشن بو مزار الخانلی‌لار سبکی ایله تیکیلیبدیر. مقبره‌نین بیناسی ۹ اوتاق، ۶ گونبز، هشتی و ائیواندان اولوشور و قجرلر دؤورونده اونون خراب اولماسینی اؤنلمک اوچون شمال طرفینده بیر اوتاق تیکدیلر.

عئینالی‌دان قدیم بیر رسیم. عون‌بن علی بقعه‌سی زیروه‌ده، و ربع رشیدی داغین اته‌یینده گؤرونمکده‌دیر.