بیر گون آدام بی قافلان بی‌ین یاخینلیغینا گئدیب دئدی: سالاملار اولسون سنه ائی قافلان بی. کئفین نئجه‌دیر‍؟
قافلان بی چاشیب، دئدی: سالام آدام بی. خئیر اولا. نه عجب منیم کئفیمی خبر آلیرسان؟
آدام بی بیغلارینی ائشیب، دئدی: هه… عجبی یوخدو قارداش. دئییردیم بیز گرک بو کوره‌نی بئله‌سی بؤلک. سونرا بارماغی ایلا قافلانین یئریندن اؤزونه ساری گؤرسه‌تدی.
قافلان بی بو ایشدن باش تاپمادی. جیرماغینی توپراغا مؤحکم چکیب، دئدی:
-قاچ قاپیزدا اوینا قوی یئل گلسین!
آدام بی‌ین باشیندان اوت قالخدی. دئدی:
-قافلان بی ائله دئییرسن هه… دور گؤر من ده نه ائده‌جه‌یم…
قافلان دئدی:
-الیندن نه گلیرسه، ائت!

آدام بی قضبله‌ندی آما جیرماقلاری قافلان بی قدر ایتی دییلدی.
باشینی آشاغا سالیب، سویو سوزولموش گئتدی. آما بئکار اوتورمادی. اوتوروب، دوشوندو. هئی دوشوندو، هئی دوشوندو، سونوندا بیر توفنگ دوزه‌لدیب، یولا دوشدو.
یازیق قافلان دونیادان خبرسیز اؤز مئشه‌لییینده یئییب، ایچیب، گزیردی.
بیردن آدام بی توفنگی ایله گلدی، دئدی:
– هه قافلان بی! ایندی نئجه‌سن؟ تئز اول بو مئشه‌نین بیرازین منه وئر!
قافلان بی اوزون دیشلرینی قیجیردادیب، آدام بیه گؤرستدی. سونرا دیرناقلارینی جیرماغیندان چیخادیب، یئره چکدی. بیر نریلده‌ییب، دئدی:
-وه…..‌اووووووووو. سن نه دئیرسن؟ ایشیمیزه-گوجوموزه باخ! ایندی گلیب، سنین‌کینی سنه وئره‌رم.
آما بو ایشی فایدا وئرمه‌دی. آدام بی بیر قورشون آتدی. قورشون داشا دییب، اونو پارچا-پارچا ائتدی. قافلان بی‌ین باغری چاتلاییب، تو دابانا قووت قاچدی. قورخوسوندان داها دا او طرفلره دولانمادی.
آدام بی آیاغینی، آیاغی اوسته آشیردی راحات-راحات مئشه‌ده اوزانیب، کئفه باخدی.

آما آز زاماندان سونرا اورا دا قوریوب، آغاجلاری آزالدی.
آدام بی بیر اویانا باخدی-بیر بویانا باخدی. گؤردو آغاجلار قورویوبدو. یاپراقلاری تؤکولوبدو. کؤلگه‌سی ده قالماییب. اؤزو-اؤزونه دئدی:
– دوروم گئدیم بیراز مئشه لیک تاپیب، یاتیم. بئکار اوتورماقدان ایش چیخماز.
توفنگینی گؤتوروب، قافلان بیی آختارماغا گئتدی…

اوزون سؤزون قیسساسی، هر سئری قولدورلوق‌ ایلا، قافلان بی‌ین مئشه‌لی‌ییندن بیرآزینا صاحاب چیخدی.
قافلان بی‌ین مئشه‌لییی بئله‌لیک‌ ایله گونو-گوندن کیچیلیردی.
بیر گون آدام بی گئنه‌ ده مئشه‌لیک اوچون قافلان بیی آختارماغا گئتدی.
ها گزدی-هو گزدی، قافلان بیی تاپا بیلمه‌دی.
آرتیق نه قافلان بی وار ایدی، نه ده مئشه‌لیک. بیر آدام بی قالدی بیر ده قوپ-قورو بیر توپراقلیق کوره.
آدام بی آلتیندا یاماغا بیر آغاج کؤلگه‌سی ده تاپا بیلمه‌دی.