image_printپرینت خبر

سن محبت تانریسی‌سان
هانی سنین، سئویش‌لرین،
سئوگی‌لرین،
بو دونیانین اوره‌یینده؟
آدام‌لارین گؤزلرینده؟
«داعش»‌ی وار بو دونیانین
«بوکوحرام»،
«طالبان»نین قانلی الی
تانری آدی‌یلا جان آلیر.
تانری لوطفن کوسمه ‌مندن!
ایسته‌ییرم، اؤزوم اوچون،
یئنی دونیا، قورام ایندی.
اینسان‌لیغا اویغون اولان
اینسان‌لارا
یاراشیق‌لی بیر یاشاییش ساهمانلایام!
من قوردوغوم بو دونیادا،
هئچ اینسانی،
هئچ بیر اینسان اؤلدورمه‌سین،
ایسته‌ییرم،
اینسان‌لاردان آلام بوتون بومبالاری،
تامام سیلاح‌لاری پوزام، یئر اوزوندن
تانری منه وئر بو گوجو.
من شاعیرم!
قانادلاریمدا وار باریش
دوداق‌لاریمدا وار واریش.
توت الیمدن، قالدیر منی!
گل ال ـ اله وئرک ایندی
قویما قارا،
دایاز فیکرلی اینسان‌لار
دونیامیزی اودا چکسین.
تئرور نه‌دیر؟
اؤلوم یاغدیرماق‌لار نه‌دیر؟
اینسان بئله قانیق اولماز
اینسان‌لارا محبت وئر،
قوی سئل اولسون
سئوگی، سئوینج
آشسین، داشسین بو دونیادا.
سیلاح‌لاری، بومبالاری،
یاندیر پارلاق حاقّ اودوندا!
قوی اوشاق‌لار
قورخماسینلار، اؤلمه‌سینلر
راحات ـ راحات اویناسینلار.
قوی دونیامیز گؤزل اولسون
اورک‌لره گووه‌نج دولسون
دونیا گول‌لو، گؤزل اولسون
اوخول‌لارین ایچینده‌کی،
سس‌لر، سؤزلر
بوغولماسین.
تانری گؤرورموسن ایندی؟
شاعیر سوسقون اؤلوم‌لره
یانلیز ایچینده هایقیریر.
تانری گیلئیلی‌یم سندن،
ظالیم اینسان‌لاری یاراتدیغین اوچون
قان ایچن آدام‌لار یاراتدیغین اوچون!
منه یالان دونیا، پای آتدیغین اوچون!

بیلیرسن‌کی،
بیرجه سنه گوجوم چاتیر
سؤزلریمدن سئوگی آخیر
دوپ- دورو، آیدین و آچیق
بیرجه سنه دئیه بیلدیم
اوره‌ییمدن گلن‌لری
گیزلی، گیزلی بو سؤزلری،
تانری سندن گیلئیلی‌یم،
گیلئیلی‎یم…