آتیلاندا ایکی اووجونو اییلن اوشاغین کوره‌یینه دایاییب، قیچ‌لارینی تمامن آچیب، قوش تک اوچارمیش کیمی آتیلیب او بیری اوشاغین اوزه‌رینه کئچردی، آخیردا دا اؤزو اییلیب الینی دیزینه قویاردی و سیرا ایله آتدانیب اویناردیلار.
ایندی همن بو حرکت‌لرین بنزه‌رینی ژیمناستیک کیلاس‌لاریندا چوخ باهادان اوشاق‌لارا اؤیره‌دیرلر. خره‌ک‌دن آتیلماغا بنزه‌ردی بو اویون. بیز لاپ موفته‌سینه، هئچ آتا- آنالارا خرج آچمادان همن ژیمناستیک حرکت‌لری بیر-بیریمیزی یامسیلایاراق اؤیره‌نردیک. مثلا اوتاغین بوجاغیندا دقیقه‌لرجه باش آیاق دوراردیق، باشیمیز یئرده،آیاق‌لاریمیز ایسه جوت‌لنمیش، گؤیده اولاردی! هر کس داها چوخ ترسه دایانسایدی او قازاناردی. حتی ال‌لریمیز اوسته دایاناردیق. سحری یورغان دؤشک‌لری ییغمامیش، اوتاغین اورتاسیندا، بئش اون دانا ماللاق سالاردیق، آیاق‌لاریمیز بیر- بیرینه ایلیشردی، هارای بیدادلاریمیز، میرتداشما سسیمیز یئددی همسایانی اویالداردی! بیر دن گؤرردین پنجره‌یه بیر داش آتدیلار!
یا گئدیب اوتاغین بوجاغینا دایاناردیق. آیاق‌لاریمیزی او دووار– بو دووارا دایاییب، میمون کیمی، دووارا دیرماشاردیق و ال‌لشردیک باشیمیز تاوانا ده‌یسین. من بو ایشی هئچ باشارا بیلمه‌دیم. باشاران‌لاری دا (او جومله‌دن عم‌اوغلومو) همیشه قیسقاناردی!