image_printپرینت خبر

قویونون تکیندن قووزانان سس بیردن کسیلیر. قوروجو کیشی چئینه‌مک‌دن قالیر و قاییدیر قویویا باخیر. بیردن- بیره اوجا بیر قیشقیرتی قویونون دیبیندن قولاغا چاتیر. کیشی اِهمال- اِهمال تیکه‌سینی چئینه‌ییر و قولاق آسیر. نعره گئتدیکجه اوجالیر. کیشی یئدییی تیکه‌نی اودور. قویودان گلن چیغیرتی قولاغی اذیت ائدیر. قُوروجو کیشی یئریندن دوروب، غضب‌له قویونون باشینا گلیر و اَییلیب باخارکن نعره کسیلیر. سس، یالواریش‌لارلا قولاغا چاتیر: ” آغا، آغا، آغا!”
قُوروجو کیشی بیر اُووج داش- کسسک گؤتوروب آتیر قویونون دیبینه. قویودان گلن اینیلتی تهدیدلرله قاریشیر: “های، های، آهای!”
قوروجو کیشی آیاغا قالخیب، ساعاتا باخیر و اؤزونو حاضیرلارکن او یان- بو یانا باش اوزالدیر. ایکینجی قوروجونو گؤزله‌ییر. قویونون دیبینده‌کی سس یئنه سیزیلتی‌یا چئوریلیر. اینیلتی کسیلیب، نعره‌یه چئوریلیر. کیشی قاییدارکن نعره داها اوجالیر. کیشی یاخین‌لاشاراق قویویا باخیر. قویونون سسی ایلتیماس و یالواریش‌لارلا دولودور: “آغا، آغا، آغا!”.
قُوروجو کیشی اَییلیب چیغیریر: “خفه‌لن! ” و سونرا غضب‌له قویونون داشینی چئویریر آغزینا‌. قویون دیبندن قالخان سس تهدیدله قووزانیر: “آهای، های، های!”
نئچه لحظه سونرا قویونون دیبیندن بیر شئی قویونون داشینا توخونور وقویونون دیبنیدن قووزانان اوجا بیر اینیلتی‌دن سونرا، کیشی قویونون آغزینا بیر داش داها قویور و اینیلتی سسی قویون تکیندن یئنه اوجالیر.
ایکینجی قُوروجو گلیر. قاباق‌کی قورجو یوک یاپینی گؤتوروب، تله‌سیک یولا دوشور. ایکینجی قُوروجو چانتاسینی تختین اوستونه قویوب، بؤرکونو چیخاردیر و کئشیک دورماغا آماده اولور. اینیلتی‌نین سسی او قدر اوجادیر کی، قوروجو کیشی‌نین دیققتینی چکیر. یاخینا گئدیر، قویونون آغزینداکی داش‌لاری قیراغا وئریر. سیزیلتی کسیلیر و سس ایلتیماس‌لارا قاریشیر: “آغا، آغا، آغا !”.
کیشی اَییلییب چیغیریر: “های!”
سس داها یالواریش‌لی اولور: “آغا، آغا!. کیشی قالخیب گلیر و چانتاسینی آچیب، بیر تیکه چؤرک قوپاردیب، آتیر قویویا. آزجا گؤزله‌ییر و سس کسیلیر. کیشی قاییدارکن تختین اوستونده اوتوروب، آماده اولور کی یئمه‌یینی یئسین. سس یئنه یالوارماغا چئوریلیر: “آغا! آغا!” کیشی قاییدیر و قومقومانی سویونان دولدوروب آغزینی باغلارکن گلیر قویونون یانینا، سسله‌نیر: “هی!” و قومقومانی آتیر قویونو تکینه.
سس کسیلیر، کیشی قاییدیر سوفره‌سی‌نین باشینا کی یئمه‌یینی یئسین. اینیلتی سسی یئنه اوجالیر. قُوروجو کیشی یئنه قویونون باشینا گلیر. سس ایلتیماسلارلا دولودور : “آغا، آغا!” کیشی چیغیریر: “هی!” قویونون دیبیندن یئنه بوسس قووزانیر: “آغا، آغا، آغا!” کیشی قالخیب، فیکیرلشیر. سونرا اوزونو کندیره چئویریب، یئنه اَییلیر قویویا و چیغیریر: “هی !هی! هی!”. سس یالوارماغا چئوریلیر. کیشی گئدیر و شوبهه ایله کندیری میخ‌دان آییریب گتیریر. آزجا دوشونور و یان یؤوره‌سینه باخاراق، کندیری سالیر قویویا. قویونون سسی بالا- بالا دَییشیلیر. سس، چوخ سئوینجک، اومود و ممنونیت‌له دولودور: “آغا، آغا، آغا،آغا !” قوروجو کیشی کندیری ییغماغا باشلیر. چوخ زحمتی‌نن کندیری یوخاری چکیر. قویونون سسی اِهمال – اِهمال عوض‌لشیر. سئوینجک، اومودلو، نیفرت‌لی و هده قورخولو اولور: “آغا، آغا، آغا، آغا، آغا!”. بیردن- بیردن بیرجوت چوخ یئکه اَل ، قویونون آغزیندان یاپیشیر. قُوروجو کیشی اؤزونو ایتیررکن چوخ قورخولو حالدا، قویویا باخیر. بیردن- بیره کندیری اؤتوروب و چاره فیکرینه دوشور. بیر غول اؤزونو قویودان یوخاری چکیر. قُوروجو کیشی اَل آیاغینی ایتیریب قاچیر. غول اَییلیب یئردن بیر آغاج گؤتوروب و قهقهه ایله، قُوروجو کیشی‌نی قُووالاییر.