image_printپرینت خبر

آصلان خان آتلی‌لار ایله آرازین کؤرپوسونو آتلاییب بو تاینا کئچنده، گؤردوکی، مارال‌ین آتی کؤرپونون پایاسینا باغلانیب، آمما اؤزوندن خبر یوخ‌دور. او حالدا گؤردو اوزاق‌دان بیر قارالتی گلیر. سئوینجک اصلان بَی او قارالتی‌یا ساری مارال! مارال! سسله‌ییرکن آتینی سوروردو. آمما، او قارالتی مارال دئییلدی بلکه بیر حاق عاشیقی، ساز چیینینده عاشیق آللاه‌لی ایدی.
آصلان بی عاشیق‌ین قاباغینی کسیب اوندان سوروشدو کی:
– آی یولچو قارداش! سازیندان بللی‌دیر کی، عاشیق‌سان. یولونون اوستونده بیر قیز گؤرمه‌دین؟
مارالی نم- نیشان ایله اوندان سوراقلاشدی. عاشیق آللاه‌لی دئدی:
– گؤرمه‌میشم. سیز هاردان گلیبسیز؟
آصلان بی-ین آتلی‌لاری‌نین بیریسی دئدی:
– آی عاشیق! اگر مارالی گؤرموسن دئنه،گؤرمه‌میسن داهاآرتیق سؤز سوروشما.
آصلان خان آتلی‌لارینا دئدی:
– بو عاشیقی دا ؤوزونوز ایله منیم عمارتیمه گتیرین!
عاشیق آللاه‌لی بیر سؤز دئمه‌دن اونلار ا قوشولدو. مارالی آختارماغی داواملادیلار، هر یئری آختاردیلار آمما مارال‌دان خبر اولمادی. ایکی گئجه- گوندوز آختاراندان سونرا اومود‌لاری کسیلیب، عمارته قاییتدیلار. آمما بیر نئچه نفر ده چؤلده قالیب مارال‌ین دالیسیجا گزیرلر کی، بلکه مارال‌دان بیر خبر تاپسینلار. آصلان خان عاشیقی دا اؤزو ایله عمارتینه آپارمیشدی. آصلان خان‌ین گؤزونه داها یوخو گلمیر، چوخ ناراحات‌دیر، فیکیری مین یئره گئدیر. آخیردا بو فیکره یئتیردی کی، حتما مارالی قارداغ خان‌لاریندان اوغورلاییب. بونا گؤره کی، اونلارین طایفالاریندا تازالیقدا بیر اوشاق یوخ اولوب، حتما ظن‌لری بیزه گئدیب، اونون وَرینده مارالی اوغورلاییبلار. آصلان خان قاراباغ- دان قاراداغا بیر ائلچی یوللادی کی، مارال‌دان بیر خبر گتیرسین. ائلچی گئدندن سونرا بیردن یادینا دوشدو کی او عاشیقی دا عمارته گتیریبلر. آصلان خان نؤکرینی چاغیریب دئدی:
– بیز ایله بیر عاشیق گلدی، تئز اونو منیم اوتاغیما گتیرین!
نؤکر امرینه اطاعت ائدیب، عاشیق‌ین اوتاغینا گئتدی، اوتاغا یاخینلاشاندا گؤردو بیر یالوارما سسی گلیر. یاواش- یاواش قاپینی آچیب گؤردو عاشیق‌دیر آللاها یالواریر. ائله آللاه ایله راز و نیازا غرق اولوب کی، نؤکرین اوتاغا گیرمه‌سینی ده بیلمه‌دی. نؤکر عاشیقی نئچه دفعه سس‌لدی.
-عاشیق! آی عاشیق؟!
گؤردو عاشیق‌دان جواب چیخمادی. الینی عاشیق‌ین چیینینه قویاندا بیردن عاشیق اؤزونه گلیب، دئدی:
– آی گؤزل بنده، گئجه‌نین بو واختی بوردا نه ائدیرسن؟!

#داوامی_وار…