image_printپرینت خبر

او هاندا آلا دئو منی طلسم ائله دی من اولدوم قارتال، او دا اولدو بیر اوشاق. آلا دئو منه دئدی منیم آردیمجا گل بو اوشاغی دا گتیر. من اونو پنجه‌لریمده گؤتوروب آلا دئوین آردیجا او تپه‌نین دالیسینا گئتدیم. آلا دئو تپه‌نین اوستونده دوروب، دوستاغی گؤستردی و بیر آچار منه وئریب دئدی، اورا دوستاق‌دیر، آپار بونو دوستاغا سال اییرمی نفر ده کی قیچ‌لاری زنجیرلی‌دیر دوستاق‌دان چیخارد بورا گتیر. اگر ایسته‌سن من دئیه‌نه باخمایاسان، جانین منیم قاشیمدا بیر توک‌ده‌دیر، اونو چیخاردیب سنی اؤلدوره‌جاغام. او گوندن منیم ایشیم بودور، هر آی‌ گئدیب ایشیق‌لیق دونیادان کی، بیزیم اؤز دونیامیز اولور بیر اوشاق اوردان گتیرمه‌لی‌یم. او اوشاغی دا کی گتیردیم، اوردا دوستاغا سالمیشام.
قارتال ارسلان‌دان سوروشدو:
– سن اوردا نه ائدیردین؟
ارسلان حال ماجرانی قارتالا ناغیل ائدیب، دئدی. دئمه او قیز دا قارباغ خان‌لاری‌نین خانی، آصلان خان‌ین قیزی مارال خاتون‌دور. قارتال کی اوشاق‌لارینی آپاریرمیش او خان‌لار بیری- بیرینین طایفاسیندان شبهه‌لی (شک‌لی) اولورموش، و خان‌لارین آراسیندا بیر بؤیوک کدورت یارانمیش ایمش. ایش اورا یئتیرمیشدی کی، بیری- بیری ایله محاربه ائتمک فیکیرینده ایدیلر کی، محاربه ایله اوشاق‌لارینی آزاد ائله‌سینلر. آمما مارال خاتون قاباق‌لارینی آلمیشدی، چون بیرگون بیراوشاغی آپاراندا او گؤرموشدو، هرکسه دئییردی اینانمیردیلار. آمما آصلان خان‌ین قیزی اولدوغونا گؤره سؤزونو یئره سالمیردیلار. مارال خاتون منی گودوب، آردیمجا گلیب، یئریمی تانیمیشدی. دونن قویویا ائنن‌ده اونو دا توتوب دوستاغا سالمیشام.
ارسلان مارال‌ین آدینی ائشیدجک هر شئی یادیندان چیخدی، قارتالا دئدی:
– منی ده تئز اونون یانینا آپاریب، دوستاغا سال.
قارتال دئدی:
– آلا دئو یوخودادیر، سنین بوردا اولماغینی بیلمیر. اگر سنین بوردا اولماغینی اونا دئمه‌سم سونرا بیلسه منی اؤلدوره‌جک.
ارسلان قارتالا دئدی:
– قورخما! منی تئز مارال‌ین یانینا آپار بلکه بیر نقشه چکیب اؤزوموزو دئوین الیندن قورتاردیق.
قارتال کی دئوین الیندن زارا گلمیشدی و ارسلان‌دا کی جانینی قورتارمیشدی، ارسلانی مارال‌ین یانینا آپاریب، دوستاغا سالدی. ارسلان ائله بیل ایتیردییی دونیاسینی تاپدی. سئوینجک قارتالا دئدی:
– بیر دئوین نئجه اؤلدورمه‌سینی منه دئیه‌جکسن. بیر ده بیزیم قیچ‌لاریمیزین زنجیری‌نین قیفلینی باغلامایاجاقسان.

#داوامی_وار…