image_printپرینت خبر

آصلان خان امر ائدیر کی، عاشیق‌ین قول‌لارینی آچیب، تئز یانینا گتیرسینلر. آتلی‌لارین باشچی‌سی عاشیق‌ین قول‌لارینی آچیب، آصلان خان‌ین یانینا گتیریرلر. عاشیق آللاه‌لی گؤرور ایکیسی‌ ده لاپ اؤلوم حالیندادیر. آصلان خان اوتانا- اوتانا عاشیق آللاه‌لی‌یا دئیر:
– عاشیق بونلارین جانینی سن قورتارا بیلرسن!
عاشیق آللاه‌لی بیر فیکیره گئدیب، دئییر:
-دان اولدوزو سحر باتاناجاق اگر بیر اوت وار، اونو گتیره بیلسز بونلارین هر ایکیسی ده دیری قالاجاق. اگر او اوت اولماسا آرادان گئتمه‌لی‌دیرلر! آمما او اوتون یئری چوخ اوزاق‌دیر.
آصلان خان دئیر:
– تئز دئنه! هاردا اولمالی اولسا تاپیب گتیرتدیره‌رم.
عاشیق آللاه‌لی آصلان خانا دئدی:
– او اوت آرازین او تایندا یئکانات ماحالی‌نین داغ‌لاری‌نین آراسیندا، داغداغان آدلی بیر یئرده، بولاغین باشیندا گؤیه‌رر.
عاشیق آللاه‌لی‌نین سؤزونو قاراداغ خانی، آییل خان ائشیدیب، دئدی:
– منیم اصلیم یئکانات‌لی‌دیر. او بولاغ دا منیم باغیمدان جوشور. او اوتون نیشانه‌لریندن دئ، بلکه تانیدیم!
عاشیق آللاه‌لی دئدی:
– او اوتا یاشاییش اوتو دئیرلر او ماحال‌دا.
آییل خان‌ین آتی‌نین بئلینده بیر خورجونو وار ایدی، الینی اونا آتیب بیر باغلی دستمال چیخاردیب اونو آچدی، دئدی:
– عاشیق! بو دستمالداکی اوت هامان اوتون قوروسودور.
عاشیق آللاه‌لی اوتو آییل خان‌دان آلیب، هر ایکسی‌نین یارالارینا بیر مرحم کیمی قویوب باغلادی. آصلان خان بیر بالاجا اؤزونه گلیب، قارداغ خانی، آییل خان‌دان عذر ایسته‌ییب، دئدی:
– بوردان بئله هئچ کیم بیزیم قارداش‌لیغیمزی پوزا بیلمز!
سونرا اوز توتوب عاشیق آللاه‌لی‌یا دئدی:
– عاشیق! مارال ایله بو گنج نه واختا قدر اؤزونه گلرلر؟
عاشیق دئدی:
– خان آقا! آللاهیم ایسته‌سه بیز سنین سارایینا یئتیره‌نه، بونلار دا هوشا گلر.
آصلان خان سئوینیب، آییل خانی آتلی‌لاری ایله سارایینا قوناق چاغیردی و نئچه آتلی قاباقجادان سارایینا گؤندردی کی، بونلار یئتیره‌نه بیر بؤیوک جشن توتوب، شیرنی‌خوران‌لیق ائتسینلر.

#سـون.