image_printپرینت خبر

– ایندی من حاضیرام!
سینه‌سینی یئره قویوب، قانادلارینی سردی. مارال، اوشاق‌لار و ارسلان زوموررود قوشونون بئلینه مینیب، له‌لک‌لریندن برک یاپیشدیلار. زوموررود قوشو یئردن قاوزانیب، ایشیق لیق دونیایا ساری اوچدو.گون باتانا بیر آز قالان، اؤزونو ایشیق‌لیق دونیایا یئتیریب، مارال گیلی آزاد ائله‌دی. مارال زوموررود قوشونون بئلیندن یئنیب، ایسته‌دی تشککور ائده، قوش اوچوب باش‌لاری‌نین اوستونده بیر بولود کیمی کؤلگه سالیب، بیردن اؤزونو قویویا ووردو. او هاندا قویونون آغزی باغلاندی، قویودان ایز ده قالمادی.
مارال چئوره‌سینه گؤز گزدیرنده گؤردو اوردان کی قویویا گیرمیشدی، آیری یئردن چیخیبلار،آمما اوزاق‌دان ساغ- سولوندا آتلی قارالتی‌لاری وار. مارال ارسلانا باخیب دئدی:
– او قارالتی‌لار ائله بیل قوشون‌دورلار آت‌لارین اوستونده. بیز ایکی قوشونون آراسینداییق.
ارسلان باخدی گؤردو بلی، ایکی قوشون یاواش- یاواش ساغ‌دان- سول‌دان بونلارا یاخینلاشیرلار. ارسلان مارالا دئدی:
– خنجری گؤتورموسن یا کی قالدی اوردا؟
مارال خنجری بئلیندن چیخاردیب، دئدی:
– خنجری گؤتورموشم.
اوحالدا هر ایکی طرفین آتلی‌لاری لاپ یاخینلاشدیلار. مارال گؤردو بیر طرف ده آتاسی، آصلان خان‌دیر، بیر طرف‌ده ده قارداغ خانی‌نین آتلی‌لاری‌دیر کی، دؤیوشمک ایسته‌ییرلر. مارال بیردن آتاسینی سس‌له‌ییب، دئدی:
– آتا! منم، مارال. ال ساخلایین، هر کس اؤز یئرینده دایانسین، چوخ سؤزلر وار دئمه‌لی‌یم!
قارداغ خانی اوشاق‌لاری گؤروب، مارال‌ین سسینی ائشیدیب، مات قالارکن دئدی:
– هئچ کیم یئریندن ترپشمه‌سین! او قیز آصلان خان‌ین قیزی‌دیر. آصلان خان دا اونا گؤره بیز ایله دؤیوشمک ایسته‌ییردی.
آصلان خان مارال ین سسینی ائشیتجک، آتینی مارالا ساری چاپدی کی، مارال گؤرسون. بیردن ارسلان‌ین گؤزو مارال‌ین چیینینه دوشدو، گؤردو بیر ایلان ایسته‌ییر مارالی بوینوندان چالسین. دئمه او ایلان دا ارسلان اؤلدورن ایلان‌ین جوفتودور. ارسلان مارال‌ین بئلیندن خنجری چکیب، ایلانی وورماق ایسته‌ینده آصلان خان کی کامان الینده بونلارا ساری گلیردی دئدی بس ارسلان مارالی اؤلدورمک ایسته‌ییر. او حالدا اوخو کامان‌دان اؤتوردو، اوخو ارسلان‌ین سینه‌سینده اوتورتدو.
ارسلان اوخلاناماقدا، مارالی دا ایلان بوینوندان چالماقدا… آصلان خان یئتیره‌نه گؤردو ارسلان دیزه چؤکوب، سینه‌سیندن قان آخیر.

#داوامی_وار…