image_printپرینت خبر

ایش بوردادیر کی، نئجه او قویودان چیخیب، ایشیق‌لیق دونیایا گله‌جکلر. مارال‌ین آتاسی، اصلان خان‌ین، لاپ دا صبری توکه‌نیب، عاشیق‌ین دئدییی سؤزدن ده ایکی گون کئچیر. اگر ساباحی‌سی گون مارال گئتمه‌سه، آصلان خان هم عاشیق آللاه‌لی‌نی اؤلدوره‌جک هم ده کی قاراداغ خانینا لشکر چکیب، بوتون آتلی‌لارینی اؤلدوره‌جک. چون قاراداغ خانینا دا سؤزچو یولاییبلار، اونلار دا آصلان خان‌ین ایشیندن خبردار اولوب، بوتون آتلی‌لارینی دؤیوشه آماده ائدیبلر.
بو یاندان دا مارال ایله ارسلان وآزاد ائله‌دیک‌لری اوشاق‌لار آلا دئوین ساراییندا قویونون ترکینده قالیبلار، ایشیق‌لیق دونیایا چیخا بیلمه‌یه بیر یول تاپا بیلمیرلر، آوارا دولانیرلار. بیر یومورو تپه وار ایدی، بیردن مارال‌ین گؤزو او تپه‌یه دوشدو، ارسلانا دئدی:
– گئدک او تپه‌نین اوستونه گؤرک اوردا نه وار؟!
ارسلان، اوشاق‌لار ومارال او تپه‌یه ساری گئتدیلر. تپه نه تپه!… هر طرفینه باخیرسان قوجا آغاج‌لارین ریشه‌لری اوزه چیخیب، بوداق‌لاری هؤروک کیمی بیر- بیرینه دولاشیب. مارال‌گیل تپه‌نین اوستونه یئتیریب گؤردولر بیر درمان داشی وار چوخ بؤیوک‌دور، مین نفر ایله ده اونو یئریندن ترپتمک اولماز. او داشین آراسیندا بیر ده‌لیک واردیر. مارال او داشین اوستونده اوتوروب ،خنجرینی قینیندان چیخاردیب، ساپینا زول وورموشدو. ارسلان‌ین الی بیردن مارال‌ین قولونا ده‌ییب، خنجر الیندن داشین اوستونه دوشدو، ساپینداکی آلماس چیخیب دیغیرلاندی او داشین آراسیندا کی بوش یئره دوشدو. آلماس دوشمک همن داش پارچالاندی، بیر بؤیوک چینار آغاجی گؤرسندی. چینار آغاجی‌نین دالی‌سیندان بیر زوموررود قوشو چیخیب، قانادلارینی آچیب مارالا دئدی:
– سن منی و بالالاریمی بو دوستاق‌دان قورتاردین، دئنه گؤروم مندن نه ایسته‌ییرسن؟
زوموررود قوشونون قانادلاری ائله بؤیوک ایدی کی، آچاندا ائله بیل او ال- بو ال بیر باتمان زمین‌ین اوستونو اؤرتوردو. مارال زوموررود قوشونا دئییر:
– من سیزدن بیر زاد ایسته‌میرم، فقط بیزی ایشیق‌لیق دونیایا چاتدیرسان ائله بیل بیزه هر نه وئرمیسن.

#داوامی_وار…