image_printپرینت خبر

– یاخشی اولدو، ایندی کی دئو یوخلایاجاق اوندا گئدیب بوداغی کسیب جانینی آلارام، هامینی دا آزاد ائده‌رم.
قارتال بیردن دئدی:
– بیر ایش وار چوخ چتین‌دیر، دئو یئددی یوخونون ایچینده ده اولسا اللی آددیم قالان هرکس اونا یاخینلاشسا بیلیب اویانار.
گؤره‌ک عاشیق‌دان نه خبر. ..
نؤکر، عاشیق ایله خان‌ین اوتاغینا ساری گئتدی. نؤکر ایچری گیریب، خانا دئدی:
– خان آقا! امرینیزی یئرینه یئتیریب، عاشیق-ی قوللوغونوزا گتیردیم.
خان، نؤکری اوتاغیندان مرخص ائدیب، عاشیقی چاغیریر. عاشیق دان سوروشور کی:
– هارالی‌سان؟ هارا گئدیردین؟
عاشیق هارالی اولدوغونو، هارا گئتدییینی خانا تعریف ائدیر، بیر زامان گؤرورکی خانی یوخو آپاردی. عاشیق دا بیراز اوتوراندان سونرا بیر هوشا گئدیر. یوخودا گؤرور کی، گونش گؤیده اوچ اولوب، بیر گؤزل قیزین قاباغینی بیر اژدها کسیب ایسته‌ییر قیزی یئسین. او یاندان بیر قاپلان گلیب، اژدهانی پارتاقلاییب (تیکه- تیکه ائله‌ییب)، قیزی الیندن آلیب آپاردی. او هاندا، خان‌ین حیط‌ده‌کی خوروزو بانلاییب، هم عاشیق-ی، هم ده خانی یوخودان اویالدیر. عاشیق خانا دئییر:
-خان آقا! سنین قیزین دیری‌دیر آمما بیر یئرده گرفتار اولوب. اوچ گونه قدر بیر اَر اونون جانینی قورتاراجاق‌دیر، نیگران اولما، بئله بیر یوخو گؤردوم .
آصلان خان عاشیق-ین یوخوسوندان شاد اولوب، اونا دئییر:
– اگر قیزیم تاپیلیب ساغ سلامات ائوه گلسه، سنی بیر یوللوق عمارتیم‌ده ساخلاییب، هرنه ایسته‌سن وئره جاغام.
خان یئنه نوکرینی چاغیریب دئییر، آتینی یَهَرله‌ییب آماده ائله‌سینلر کی، مارالین آردیجا گئدیب آختارسینلار .اوحالدا عاشیق خانا دئییر:
– خان آقا! من یوخوسونو گؤروب سیزه دئدیم، سیزین قیزینیزی بیر ار گنج اوغلان او گرفتارچیلیق‌دان قورتاریب گتیره‌جک، سیزین گئدیب دولانماغیز دا هدردیر.
خان عاشیق-ا دئییر:
– عاشیق! نئجه کی دئدیم قیزیم گلسه، هر نه ایسته‌سن وئریب بوردا ساخلایاجاغام. ایندی کی بئله دئدین اگر قیزیم اوچ گونه قدر گلمسه هم سنی اؤلدوره‌جه‌یم هم ده قاراداغ خانی، آییل خان‌ین ائوینی باشینا توکوب، وئران ائده‌جه‌یم.
خان، نؤکرینی بیر ده چاغیریب دئیر:
– ال ساخلایین! هله‌لیک اوچ گونه قدر هئچ بیر یئره گئتمه‌یه‌جه‌ییک.آمما آتلی‌لارا دا دئیین آماده اولسونلار اگر اوچ گونه کیمی مارال تاپیلماسا قاراداغ خانی آییل خان‌ین ائوینی باشینا تؤکوب، بوتون آتلی‌لارینی قیریب، هر نه وارینی اودا چکه‌جه‌یم.
نؤکر، خان‌ین سؤزونو آتلی‌لارین باشچی‌سینا دئینده آییل خان‌ین سؤز آپاریب گتیره‌نی ائشیدیر،تئز بیر نفر آتلی تاپیب ماجرانی قاراداغ خانینا دئمک اوچون قارداغا گؤنده‌ریر .

گؤرک مارال‌دان نه خبر اولوب…
قارتال کی دئییر دئو اللی قدم قالان هرکس اونا یاخینلاشسا یئددی یوخودا دا اولسا اویانیب اونو بیر پوف ایله اؤلدورر، مارال الینی آتیب بئلیندن بیر خنجر چیخاردیر کی، او خنجرین ساپیندا بیر آلماس وار گون دوشن‌ده ائله ایشیقلانیر ساناسان گونش‌دیر پارلاییر. قارتالا دئییر:
– منی دئوین یانینا آپاراجاقسان، دئیه‌جکسن بونو بوگون توتوب گتیرمیشم. من اوحالدا خنجری چیخاردیب ایشیغی دئوین گؤزونه سالیب، اونون گؤزلرینی ائله قاماشدیراجاغام کی، بیلمه‌سین گون چیخان ها الدی، گون باتان ها ال. او منه ساری گلنده ارسلان تئز بوداغی سیندیریب دئوین جانین آلار.
بئله قرارلاشیب، قارتال مارالی دئوین یانینا آپاریر. ارسلان دا مارال‌ین دالیسیندا گیزلی- گیزلی گئدیر. دئوه اللی قدم قالانا یئتیشیرلر، دئو یوخودان اویانیب قارتال‌دان سوروشور:
– او کیم‌دیر گئتیرمیسن؟!

#داوامی_وار…