image_printپرینت خبر

قارتال دوستاغین قاپی‌سینی باغلاییب دئوین یانینا گئتدی …
قالدی مارال ایله ارسلان دوستاقدا، بیر اوتاق‌دا.
ارسلان‌ین اوره‌یی مارال‌دان اؤتور اسیر، آمما دیلینه گتیره بیلمیر. دئمه مارال دا او گون ارسلانی گؤرندن اونا وورولوب او دا بیر سؤز دئمیر. بیری- بیرینه هر دن گؤز آلتی باخیرلار آمما بیر سؤز دئیه بیلمیرلر. آخیردا ارسلان باشینی قاوزاییب، اوتانا- اوتانا مارال‌دان سوروشدو:
– سن بوردا نه ائدیرسن؟آدین نه‌دیر؟
مارال گولومسه‌ییب، ارسلانا جواب‌دا دئدی:
– منیم آدیم مارال‌دیر. قاراباغ خان‌لار خانی‌نین قیزی‌یام. اوشاق‌لارین ایزینی توتوب، قارتالی اؤلدورمه‌یه گلمیشدیم. سن بوردا نه ائدیرسن؟
ارسلان بیر آه چکیب، دئدی:
– منی بیر اووچو گؤزلریندن اوخلاییب، کؤنلومو آپارمیشدی. اونون آردیجا گزیردیم کؤنلومو تاپیب آلماق اوچون. بورا دوشوب گلمیشم.
مارال ارسلان‌ین سؤزونو آنلادی، آمما اؤزونو سیندیرمادی کی، او دا ارسلانا وورولوب! مارال سوروشدو:
– بس ایندی سنین کؤنلون اووچو الینده‌دیر، سن‌ده اورک اولماز دئوی اؤلدورمه‌یه! من اؤزوم گئدیب بو گئجه دئوی اؤلدوره‌رم، بوردان چیخماغا دا بیر یول تاپارام.
مارال بو سؤز ایله ایسته‌دی کی ارسلان اونو سئودییینی دیله گتیرسین. ارسلان مارالین اوزونه باخیب، دئدی:
– منیم کؤنلوم سنده‌دیر! اوگون آراز چایی‌نین قیراغیندا آپاردین.
مارال یئنه گولومسه‌ییب، دئدی:
– کونلونو وئررم، بیر شرط ایله کی، دئوی اؤلدوروب، اوشاق‌لاری بوردان قورتاراسان! بو اوشاق‌لار ایکی طایفا آراسیندا بیر بؤیوک ساواش سالاجاق. اگر بونلاری تئزلیک‌له بوردان قورتارماسان ناحاق قان‌لار تؤکوله‌جک. بو قارتال هر آی بیر طایفادان بیر اوشاق گتیریر، او طایفا دئییر بس بوطایفانین ایشی‌دیر. بوطایفا دا دئییر بس او طایفانین ایشی‌دیر! قارتال دا کی، گئدیب دئوین یانینا یئتیشیب آمما یاقوت قاشلی اوزویو ده ساغ قانادی‌نین آلتیندا گیزله‌دیب. دئو قارتال‌ین گؤزلرینه باخیردی کی، ذهنینی اوخویا گؤره اوگون نه ایش‌لر گؤروب. بیردن الینی باشینا آتیب اوجا یوغون بیر سس ایله دئدی «وای باشیم!»، ائلیه بیلمه‌دی قارتال‌ین ذهنینی اوخوسون. ایسته‌دی قارتال‌ین گؤزلرینه باخا، دئوین باشیندان بؤیوک بیر آغری قالخدی. قارتال بیلدی کی، یاقوت قاشلی اوزویون اثری‌دیر کی، دئوگؤزلرینه باخاندا باشیندان آغری توتوب بونون ذهنینی اوخویا بیلمیر.

#داوامی_وار…