image_printپرینت خبر

ایسته‌ییردیم جوجه‌لره سو گتیرم، گینه آنام باشلادی دئیینمه‌یه..!
– بیر قاریش ائوده نه جوجه‌سی؟! هئچ اؤزوزه یئر وار کی، تویوق – جوجه ساخلاییرسیز. تئز آپار قاییتار بونلاری.
دوشدوم ال – آیاغا:
– آنا! سن آللاه قوی قالسین‌لار. جوجه‌لری ساخلاساق، داها شولوق ائلمه‌رم. ائوی تؤک – داغیت ائلمه‌رم. نه دئسن سؤزونه باخارام…
بیر آز دیل تؤکوب، شیره‌بازلیق ائله‌دیم، آنام راضی اولدو.
آنام گؤرمه‌دن آتاما گؤز ووردوم‌ کی، بیز قازاندیق.
دَبـبه قاپاغیندا سو گتیردیم، بیر آز دا دَن تؤکدوم جوجه‌لرین قاباغینا، آناما تای “یئه جانین اولسون‌، یئه آجیندان اؤلرسن ها!” دئییردیم.
گونده اون – اون‌بئش دفعه دَن وئریردیم، سو وئریردیم. هئی آلیردیم الیمه تینجیخدیریردیم جوجه‌لری.
آنجاق بیر هفته اولمامیش، ساری جوجه‌لرین ایکیسی ده اؤلدولر.
-من دئدیم دا بونلار تئز اؤلر، قالمازلار! ساققالیـم یوخ، سؤزوم کئچمیر! – دئدی آنام!
قارا جوجه‌دن ائله خوشوم گلمه‌سه ‌ده “باری بو اؤلمه‌سین آللاه!” – دئدیم اوره‌ییمده…
شانس‌دان پیس اوزلو چیخیب، اؤلمه‌دی قارا جوجه! هفته‌لر، آی‌لار کئچدی. قاپ- قارا جوجه‌نین باشیندا، آغ‌آپپاق تئل‌لر اوزانیب، اوزونه تؤکولموشدو. ائله دوزلو – موزلو اولموشدو کی، آنامین دا خوشونا گلیردی.
او قدر الیمده جوجه‌یه دَن وئرمیشدیم‌، دانیشدیریب، اوینامیشدیم کی، او دا منیم سسیمه، سس وئریردی! ائله بیل منیم‌له دانیشیر. من ده کئف ائله‌ییردیم. یولداش‌لاریم‌دان دا چوخ سئویردیم جوجه‌نی!
بیر گون اوباشدان چاغی، شیرین یوخودایدیم کی، عجیب بیر سس‌له اویاندیم. قولاق آسدیم، آنام‌لا، آتامین سسی حیه‌ط‌دن گلیردی. تَـر – تَله‌سیک قاچدیم حیه‌طه. آیاغیمی آتیردیم باشماغا، گؤردوم جوجه دیمدییین توتدو گؤیه، قویروغون باسدی یئره، وار گوجویله قوققولوقوقووو ائله‌دی. دئمه جوجه، خوروز ایمیش! بانلاماغا باشلادی.
ائی وای!!! ایندی قونشولار گَـلر قاپییا، آنام اوزون دیده – دیده، – دئدی. آتام دا حیرصلی باخیردی. آما من کئف ائله‌ییردیم. نئچه دفعه قوقولدایاندان سونرا، ساکیت اولدو.

بیز ده، تزه‌دن گئدیب یاتدیق. گون‌اورتا چاغی، یئنه قوقولداماغا باشلادی.
قوقولوقوقو…. قوقولوقوقو….
آنام: “درد، زهریمار! کس سسینی”.
آخشام آتام ایشدن گلمک همن، آنام قویمادی یازیق بیر چای ایچیب، دینجلسین. خوروزو، ووردو آتامین قولتوغونا کی، آپار بونو نه ائله‌ییسن ائله، داها بو ائوده قالا بیلمز، – دئدی.
باشلادیم آغلاماغا: “آنا! سن آللاه قوی قالسین دئییب، خوروزو آتام‌دان آلدیم.
خوروز دا قوقولوقوقو ائلمه! – دئدیم: ظولوم – ظولوم، آغلایا – آغلایا…
آنام منی قوجاقلادی:
– قیزیم، خوروزدان اؤترو آدام آغلار. بونو ساتاریق، یئنه بالاجا جوجه آلاریق.
– یوخ من اؤز خوروزومو ایستیرم. بونو من بؤیوتموشم. بو منیم یولداشیم‌دی. سن آللاه ساتمایین.
ائله یالوار – یاخارنان آغلاییردیم کی، نجور داش اورک‌لی آدام اولسایدی، یوموشاردی! هاندا قالا آنام!
یازیق بیلمیردی نه ائله‌سین. بیر آز فیکره گئدیب، سونرا دئدی:
– “خالان‌گیلین حیه‌ط‌لری یئکه‌دی. بؤیوک کَــردی‌لری ده وار، گؤره‌سن بو خوروزو ساخلارلار”.
خُـلاصه ایندی نئچه آیدی، هر هفته خالام‌گیله، خوروز گؤرمه‌یه گئدیرم. هله آتام دئییب، بیردانا تویوق دا آلاجاق.

#سون.