image_printپرینت خبر

من دئدیم:
– اول لوبییه‌لری ایسلادیب، بیر پارچایا بوکوب، سو وئرمه‌لی‌سن.
ایکی هفته گئچدی. لوبییه‌لر فیلیز وئردی. دنیز اونلاری منیم یاردیمیم ایله توپراغا اکدی. نئچه گون سونرا لوبییه‌لر قشح- قشح بؤیودولر. دنیزه دئدیم:
– دنیز بولاری آپار اوخولا.
بیر گون دنیز سئوینه- سئوینه دئدی:
– آنا! آراز! منیم لوبییه‌لریم گول آچیب!
من اؤز اوره‌ییمده دئدیم: «صاباح ایستییرم گئدیب او لوبییه‌لری گؤرم!». صاباحیسی گون اوخول‌لار بیتنده گینه اؤزوم‌له بیر دانیشدیم: «من اؤنجه‌لرده گئدیب، اونون لوبییه‌سینی سوروشموشام، اوتانارام بو سفر ده گئدم.». بیرآز فکرلشندن سونرا دنیزین درسینین دورومون بهانه ائلییب، اولارین اوخولونا گئتدیم.
اوردا تربیت‌سیز بیر اوغلان، گئچمیش‌ده قیزلارا قار توپو آتیب، اونلاری یامانلامیشدی. اورانین دا سرویس شوفرلری هامییا مشکوک اولوب، اوغلانلاری ایچه‌رییه قویموردولار. شوفرلرین باشی قاریشان زمان من ایچه‌رییه گیریب، خانم مشاهری‌نین اوتاغینا گئتدیم. بهانه‌می یادا سالیب، دئدیم:
– سلام خانم مشاهری! اولار من دنیزین معلیمین گؤروب، دنیزین درسینین وضعین سوروشام؟
دئدی:
– «بله، بله، آغا!»
ائله دئدی «آغا» حس ائله‌دیم رئیس‌جمهوردان زاتدانام! اونون اوتاغیندان چیخیب، گولومسه‌ییب، اوخولون اوست قاتینا چیخدیم. اوردا بیر آلتینجی کلاس معلیمی منی گؤروب سوروشدو:
– بوردا نه ایش گؤروسن؟
من دئدیم:
– گلمیشم باجیمین درسین سوروشام.
دئدی:
– یاخجی! دور بوردا ایندی چیخارلار.
معلم بیرآز حرص‌لی ایدی. فکر ائلییرم تربیت‌سیز اوغلان اونون کلاسینین قیزلارینی اذیت ائله‌میشدی. دیلیمی دیشلییب، یولوما گئتدیم. دنیزین کلاسینداکی اوشاقلار، کاپشن‌لرینی ائشیکده آسقی‌یا آسیب، کلاس دا اوتورموشدولار. منده گئدیب بیر طرفده دوروب، اوشاقلارین چیخماسینی گوددوم. اما بیردن آنامی یادا سالیب اؤز اورییمده دئدیم: «یوخ! یوخ! ایندی آنام گلیب دالیمیزجا، یوبانساق نگران اولار!»
معلیمه ساری گئدیب، دئدیم:
– سلام، یورولمویاسیز خانم حسینعلیزاده! گلمیشم دنیزین درسین سوروشام.
دئدی:
– دنیز چوخ یاخجی قیزدی. من اوننان راضی‌یم. سن ده اونا درسلرینده کؤمح‌لیق ائله. مثلا خوانداری کیتابینی گؤتوروب، اوزاقدان اونا املاء دئ!
سورا دا بیردن- بیره، گوله- گوله دئدی:
– هله گؤزوز آیدین! لوبییه‌ز ده گول آچیب!
من اصلینده بو سؤزو بکله‌ییردیم. گئدیب لوبییه‌یه باخدیم. بیز اکدیگیمیز لوبییه‌لرده بیر آچیق صورتی رنگده گول چیخمیشدی. اما بیر دؤنوب باخاندا کیلاسین گول‌لرینین ایچینده بیزیم لوبییه‌نی تاپماق چتین اولوردو. دنیزین کیلاسیندا چوخ گول وار ایدی. بیز کیلاسدا اولاندا سئوینجیمیزی اوزوموزه گتیرمه‌دیک. اما ائشیگه چیخاندا سئوینج‌دن آتیلیب، دوشوب، اوینادیق!!!