image_printپرینت خبر

او گون ده شام‌دان سونرا آنام بؤیوک ننه‌م ایله، نار دانالاییردیلار. من ده هرگونه تای، نار قابیق لاری ایله ، رنگ‌لی میداد یئرینه، آغ صفحه‌لری بویاییردیم. بیردن بؤیوک ننه‌م سس‌لندی:
– ناردانا قیزیم گلسین! گلسین، اونونلا ایشیم وار.
سئوینجک بؤیوک ننه‌مین یانینا گئتدیم. بؤیوک ننه‌م دئدی:
-گؤزلرینی یوم، گؤر نمنه وئره‌جاغام قیزیما!
گؤزلریمی یومدوم. بؤیوک ننه‌مین الی‌نین قولاغیما سونرادا بوینوما ده‌یمه‌سینی حیس ائتدیم. بیردن گؤزلریمی آچاندا گؤردوم بؤیوک ننه‌م بیله‌ییمه ده نار دانالاری ایله جورله‌دییی بیلرزییی باغلاییر.

بیردن سیچرادیم گؤیه، «به! به!…». بؤیوک ننه‌م دئدی:
-ناردانا بالام، هله دؤز!
جیبیندن بالاجا گوزگوسونو چیخارتدی. «گل باخ بویون- قولاغیوا! گؤر بیه‌نیرسن؟»
او قدر خوشوم گلمیشدی کی، باخا- باخا هئی دییردیم:
-ال‌لرین آغریماسین ننه. آنا، سنین ده ال‌لرین آغریماسین. قیزیل گوشوارا- بویون‌باغیمدان دا گؤزل‌دیر بونلار.
یاقوتا بنزیردیلر. گوله-گوله گئتدیم اوتاغیما. تئز- تئز گوزگویه باخیردیم. نار دانالارینا باخیردیم. اوتاغیمین ال- آیاغینی ییغیشدیردیم. تختیم اوسته اوزانماق ایستیردیم کی، آنام الینده بیر بوشقاب میوه گلدی. دئدی:
-قوناق‌لاریمیز گلینجه گل بیر ایکی دانا میوه یئه!
اوتوردو کناریمدا. بیرلیک‌ده میوه‌لری یئدیک. یئیه- یئیه آنام ایسته‌دی ناردان اولان سوس‌لمه‌لریمی بویون- قولاغیمدان چیخارتسین. آغلادیم. اوره‌ییم ایسته‌میردی اونلاردان آیریلام. اما آنام دئدی:
– آخی قالسا بویون- قولاغیندا، قوناق‌لارین گلینجه، خراب اولار ها. اؤزون بیلرسن.
گؤیلوم اولماسا دا، سؤزونه باخیب، چیخارتدیم هامیسینی.
آنام آچیب قویدو بوشقابا، بوشقابی دا قویدو باشیم اوستونه.
قوناق‌لارین گلن واختی اولدو. آنام شاما فیسینجان پیشیرمیشدی. شام میزینی دؤشه‌دیک. بیر طرف‌ده ده کورسو قورموشدو آنام‌‌گیل. کورسونون اوستونه، قیرمیزی ساتین‌دان اوزو اولان کورسو یورقانی چکمیشدیلر اونون دا اوستونه آنامین جهازی اولان تیرمه‌ سالینمیشدی. ساری اود ساماوری کورسونون بیر یانیندا ساماوار میزی‌ اوسته قایناماقدایدی. کورسونون اوستونده گؤزل قاب‌لاردا نوخود-کیشمیش، پشمک، قارپیز، بیر طرفینه ده لبلبی، پخله، قیپ- قیرمیزی نارلار دوزولموشدو. باخاندا دئییردیم بس نارلار اوزوم‌لر ایله قیشین سویوق‌لوغوندان، کؤمورون ده اوزو قارالیغیندان دانیشیرلار. پیالالاری دا، دانالانمیش نار ایله دولدوروب، کورسونون دؤوره‌سینه دوزموشدولر. اما نظره گلن نار باخدیقجا بالالارینا، اورکدن قان آغلاییردی.

شامی یئدیک هارای مدد ایله گئتدیک کورسونون دؤوره‌سینده اوتوردوق. آللاه گؤسترمه‌سین، ائله بیل آجلیقدان قورتولموشدوق. بؤیوک ننه‌م قارپیزی میس مئجمئی‌یه قویاندا دئدی:
-همیشه اوزوز گولر اولسون! یا نصیب، یا قیسمت، گلن چیلله‌نی کیم گؤره کیم گؤرمه‌یه!
بونو دئییب، قارپیزی چکدی آتاما ساری. آتام قارپیزی کسنده، دئمه بئناوا قارپیزین قورخودان رنگی قاچمیشدی! قارپیز دئمه” خیرچا” دئ. هاممی باشلادی گولمه‌یه. آتامین رنگی قیزارماقدا، قارپیزین رنگی آغارماقدا!

#داوامی_وار…