image_printپرینت خبر

 

مین ایل اؤنجه دوغولان تورک شعری، ۱۱-نجی یوز ایل‌ده یوسف حاجب خاص ایله، ۱۲-نجی یوز ایل‌ده احمد یسوی ایله گلیشدی. سونرالار نوایی، نسیمی و قاضی برهان‌الدین ایله یئتیشکین‌لشدی و فضولی ایله داها دا ووقارلی اولدو. بو شعر ۱۸-نجی یوز ایل‌ده اؤزونو ملا پناه واقف و مخدومقلی‌نین چیین‌لرینه سؤیکه‌نه‌رک ۱۹-نجو یوز‌ایله چاتدیردی کی بیزلر تیلیم‌خان، حکیم هیدجی، ماذون قشقایی، ذلیلی ترکمن، محمدباقر خلخالی، معجز شبستری، افشار اورمی، خورشیدبانو ناتوان، سیدعظیم شیروانی و ابوالقاسم نباتی کیمی شاعیرلرین ظهورونا تانیق‌لیق ائدک.

نباتی اوشتوبین کندی‌نین اهالی‌سیندن‌دیر. اوشتوبین آراز چایی‌نین ۷ کیلومئترلییینده (ایندیکی ایران و آذربایجان جمهوروسو سینیری) یئرلشیب. نباتی آنادان اولاندا آراز بیر چای ایدی و هله سینیر اولمامیشدی. آراز-ین سینیر اولدوغو ایندیکی چاغدا دا اوشتوبین‌ین تپه‌لریندن چیخیب باخسان، سینیرین او تاییندا، قاراباغین تا درین‌لیک‌لرینه کیمی گؤرمک اولار.

۱۹-نجو یوز ایل‌‌ده، آذربایجان‌نین بیر حیصه‌سی‌ روس‌لارین اشغالی آلتینا کئچدی. بیز بو گون هله ده بیلمیریک بو اولایی تاسوف‌له خاطیرلایاق یا اوندان شاد اولاق. نباتی او ساواشی و قوهوم قارداش‌دان آیری دوشمه‌یه یاخین‌دان تانیق اولدو. بو اوزدن ده شعرلری هجران قوخویور، حسرت و آیریلیق قوخویور. بو ایسه، اونو پارچالانمیش آذربایجان‌ین ائلچی‌سی ائتدی. آنجاق سینیر، اونون ملا پناه واقف شعرلریندن کومه توپلاماسینا مانع اولمادی، یا دا سرحد، حمزه نگاری قاراباغی‌نین نباتی شعرلریندن دویونجان ایچمه‌سینه مانع اولانمادی. بو باخیمدان او، آذربایجان‌ین مدنی بیرلییی‌نین ده ائلچیسی ساییلیر.

ایندیسه عالیم قاسیموف (آذربایجان‌ین تانینمیش خواننده‌سی)، نباتی‌نین شعرلرینه باشقا شاعیرلردن داها چوخ ماراق گؤستریر و «دخی بیر بو یانه گلمز» و «یوخدو یوخ» شعرلر اونون سسی ایله ابدی‌لشدی.

نباتی دیوانی ایلک دفعه ۱۲۸۵ ایلینده ( مشروطه فرمانی‌نین ایلی) تبریزده چاپ اولدو اوندان سونرا دا دفعه‌لر یئنی‌دن نشر اولدو. حال حاضیردا نباتی دیوانی‌نین گؤزل ائلئمانی تبریز شهرینده قورولوب، هم ده اولدوقجا اویقون بیر مکان‌دا؛ بیلیم‌یوردو گیریشینده.