image_printپرینت خبر

منصور گیلین ائوی‌نین آچیق پنجره‌سیندن باییرا باخیب گلن عجازکار موسیقی سسی‌نین سئحرلی آخینینا دوشوب، بیر آللاه بیلیر دونیانین هاراسیندا یاتیرمیش کیمی یاتیر، گؤزلرینی یومور، آییلماق ایسته‌میردی.
قونشونون ائوینین آچیق پنجره‌سینده‌کی نازیک ایپک پرده‌دن ایچری آیدین گؤرونمسه‌ده، اوردا اوتوروب بؤیوک هوسله قارمون چالان آدامین منصور اولدوغونا «لیل‌پار»ین هئچ شوبهه‌سی یوخ‌ ایدی. موسیقی‌نی دینله‌دیکجه، اوره‌یی چیرپینیردی.

گؤزلرینی یومموشدو. سانکی اونون اؤز اوره‌یی بیر قارمون‌-آ دؤنوموشدو. آغ-قارا دیل‌لری واردی و منصور-ون اودلو بارماق‌لاری اؤز قارمون-نون یوخ، اونون قارمون-آ دؤنموش اوره‌یی‌نین، کؤروک کیمی یانان، ائنیب-قالخان سینه‌سی‌نین اوستونده گزیشیردی. منصور قارمون-و یوخ، اونون اوره‌یینی چالیر، دیللندیریردی، «لیل‌پار»ی آیری بیر گؤزل دونیایا آپاریردی.
«لیل‌پار»ین اودلو، پارلاق گؤزلری منصور گیلین پنجره‌سینه زیلله‌نیب قالمیشدی. کاش منصور بیرجه دفعه پنجره‌دن باخیب اونو گؤره‌یدی. گؤره‌یدی و اونون اوره‌ییندن گؤزلرینه‌جن قالخیب بوتون بدنینی بوروین، یاندیران آلوو دیلیم‌لرینین شاهیدی اولایدی!.. یوخ، منصور-ون نه‌اینکی پنجره‌دن باخماق، هئچ باییرا چیخماق فیکری ده یوخ ایدی، دئیه‌سن! عیبی یوخ، چیخماسین، «لیل‌پار»آ باخماسین، آمما قارمون چالماقدا داوام ائتسین. کسیلمه‌سین، بو سئوگی دولو موسیقی سسی.
خلوت‌ده آغلاییردی، «لیل‌پار». سئویردی، منصور-و. منصور-ون بارماق‌لاری، گئجه-گوندوز اونون اوره‌یینین تئل‌لرینیده، آغ-قارا دیل‌لرینده گزیشیر، «لیل‌پار»ین اوره‌یینده‌کی عشق نغمه‌سینی چالیردی. دونیا گؤزل ایدی، حیات دویولماز ایدی…
اؤزونو منصور-آ نئجه گؤسترسین؟ نئجه دئسین کی، آی منصور، من سنی سئویرم! آخی اؤلورم سندن اؤترو. چالدیغین قارمون-دان، سئحرلی بارماق‌لاریندان، موسیقی‌لریندن اؤترو روحوم، جانیم گؤینه‌ییر! یوخا چیخیب، راحاتلیغیم، دینجلیییم!
بیر گون قارشیلاشدیلار، منصورلا. منصور اونا دونوق-دونوق و بیر آز دا سویوق-سویوق باخیب، دیل‌اوجو سالام وئره‌رک کئچدی.
او ایسه محبتله گولومسه‌ییردی. اوره‌یینده‌کی اودون-اوجاغین چینقیل‌لاری گؤزلریندن اطرافا سیچراییردی. ایسته‌ییردی، بو چینقیل‌لاردان بیری، بیر نئچه‌سی سیچراییب دوشسون، منصور-ون اوره‌یینه. منصور ایسه یاش اودون کیمی ایدی. اوره‌یینه دوشن چینقیل، اود، بیر آنداجا جیزیلداییب سؤنوردو. «لیل‌پار» یانا-یانا دوشونوردو: «یعنی بو آدام، دوغوردان‌می او جور گؤزل قارمون چالان منصوردور؟! یعنی بونون ذره‌جه حیسسیاتی یوخ‌مو؟ بو قدر ده صافلیق، سویوقلوق اولارمی، آدام‌دا؟.
عیبی یوخ! بیر گون اودوما ائله یانارسان کی، ائل-عالم ییغیشا، سنی بو اوددان خیلاص ائده بیلمز!…»
بیر گون، دوغرودان دا، منصور آییلان کیمی اولدو. ائله‌بیل، گئجه یاتاندامی، سحر اویاناندامی، گؤزلری‌نین قاباغینا باخیش‌لاریندان اود یاغان بیر جوت گؤز گلدی. آییلان کیمی اولدو. دئیه‌سن، ایچینده نَـسه قاینار بیر حیسس دوغولدو، بوتون بدنینی گزیب-دولاشدی. «لیل‌پار»ین گؤزلرینی، اوزونده‌کی، دوداق‌لارینداکی سیرلی تبسومو خاطیرلادی. او گوندن ده «لیل‌پار»ی هر جور بهانه‌لرله تکرار-تکرار و یاخیندان گؤرمه‌یه جان آتدی. هامیدان خلوت بیر نئچه دفعه قیسا‌-مدتلی گؤروشلری اولدو. بیری-بیرینی سئودیک‌لرینی بیلیردیلر و ائولنمه‌یه قرار وئردیلر. هر شئی ائله سورعتله باش وئردی کی…
منصور-ون ائلچی‌لری گلنده عالم ده‌یدی، بیر-بیرینه. «لیل‌پار»ین آناسی هئچ جور راضیلیق وئرمک ایسته‌میر، «اونلار بیزیم تاییمیز دئییل. سونرا پئشمان اولاجاقسان!» – دئییردی. آتاسی سوسوردو. سوندا «لیل‌پار» قالخیب گلدی. «لیل‌پار» سئویردی، سئویلیردی. توی گونونو چوخ اینتظارلا گؤزله‌ییردی. بعضن اونا ائله گلیردی، او، منصور-آ یوخ، اونون چالدیغی قارمونـا أره گئدیر.
منصور اونون گؤزلرینده آدامدان چوخ قارمونـا، آداما ‌اوخشایان، یئری‌ین، دانیشان، گولن، آغلایان موسیقی‌یه بنزه‌ییردی. بیر سؤزله، منصور اونونچون سئحر ایدی، ایده‌آل ایدی و او قدر چوخ‌معنالی ایدی کی…

#داوامی_وار..