هردن منصورون اؤزو ده قارا، بؤیوک بیر هؤرومچه‌یه دؤنوب، ائله بیل اونو دؤرد طرفدن ساریییر، تورونا سالیب بوغماغا چالیشیردی. بوغولوردو، داریخیردی. او، سئحرلی قارمونـو گؤرمک، سسینی ائشیتمک ایسته‌ییردی. ائچینده‌کی سئوگی هله ده او قارمون-آ اولان اومید حئسابینا یاشاماقدایدی. گون‌لر، آی‌لار اؤتسه ده منصور نه قارمونـو اوزه چیخیر، نه اونون سئودییی موسیقی‌لری سسلندیریردی. دئیه‌سن، هئچ بئله بیر هوسی ده یوخ ایدی. بلکه «لیل‌پار» اؤز گلیشی، سئوگیسی‌یله اونا اونوتدورموشدو، او قارمونـو دا، موسیقی‌نی ده؟! بلکه، حقیقتن منصوردان اؤترو قارمون دا، ان گؤزل موسیقی ده ایندی «لیل‌پار» ایدی؟! بو جور دوشونجه‌لر «لیل‌پار»ی خیلاص ائدیردی، اوزونتودن، اومیدسیزلیکدن.
اؤزونه گووه‌نی آرتیر، منصورون اونو چوخ سئودییینه اؤزونو ایناندیرماغا چالیشیردی.
بیر گون ائوده ایکیسی ایدی. «لیل‌پار» مئهریبانلیق‌لا دیوان‌دا (مبل) ایلشمیش منصور-آ یاخینلاشیب قول‌لارینی اونون بوینونا دولادی و بالاجا بیر سسله دئدی:
– منصور، قارمونـو نئیله‌میسن؟… ایکیمیزیک، بلکه بیر هاوا چالاسان، دینله‌یک؟!
منصور یئریندن دیک آتیلدی. گؤزلری بره‌لدی. صیفتی‌نین جیزگی‌لری بیر آندا ده‌ییشدی. کوبودجاسینا (خشن) دئدی:
– نه قارمون، آآآز؟! باشین خاراب اولوب؟
– نئجه یعنی نه قارمون؟.. بیز ائولنمه‌میشدن اؤنجه نئجه گؤزل چالیردین؟!. هر گون آچیق پنجره‌نیزدن باییرا باخیب گلن موسیقی سسی آدامین عاغلینی باشیندان آلیردی. ائله گؤزل چالیردین، اوتانماسایدیم، آدامی قینایان اولماسایدی، قاچیب گلر، بوینونا ساریلار، اوزوندن، بارماق‌لاریندان اؤپردیم!
– آززز، سن نه سفئه‌له‌ییرسن؟ نه قارمون، نه موسیقی، نه قارمون چالماق؟.. آللاه سنه عاغیل وئرسین، عاغیل!.. دلی الینده قالمیشام ائئئی!.. آی کول‌باش، او قارمون چالان من دئییلدیم ائئئ، خالام اوغلو ایدی. بیر نئچه گونلویه گَـنجه‌دن بیزه قوناق گلمیشدی.
قارمونـونو دا اؤزیله گتیرمیشدی. گئجه-گوندوز قارمون چالیردی… یوخ، بیلمه‌میشدیک، ایشیمیزی- گوجوموزو آتیب، بیر تاختا‌باشدان اؤترو گئجه-گوندوز قارمون چالاجاقمیشیق!.. بلکه سن ده موغنّـی‌لیک (خواننده) ائده‌سن، گئدیب توی‌لاردا چالیب- اوخویاق، پول قازاناجاق؟!..
«لیل‌پار» هئچ بیر سؤز دئمه‌دن اوزونو چئویردی. چوخ ساکیتجه گؤزلریندن آخیب تؤکولن گؤز یاش‌لارینی گیزلتمه‌یه چالیشدی.
ائحتیاط‌لا پنجره‌یه دوغرو گئتدی. همین پنجره کی، باهار واختی همیشه آچیق اولوردو و همین قارمون-دا چالینان (اولماز-اولماز) خالق ماهنیسی‌نین خوش صدالاری بوردان باییرا آخیب گئدیردی. باییردا قیش هاواسی اولماسینا باخمایاراق، پنجره‌نی آچدی. ایچی اود توتوب یانیردی. اوزونه ده‌ین سویوق هاوا اونا بیر آز توختاقلیق وئردی. بو دفعه باییردان، هم ده چوخ اوزاقلاردان بیر موسیقی سسی سوزولوب گلیردی. بو سس اونون اؤز اورهیینین سسی ایدی. اوره‌یی یئنه قارمون کیمی سسلنیردی.
کیمسه چالیردی، اونون اوره‌یینی. هر حالدا منصورون بارماق‌لاری دئییلدی. «لیل‌پار»ین اورهیینین سولاری چوشان دالغالارا بنزه‌ییردی.
اونون اورهیینین دیل‌لرینده گزیشن هر کیمسه بو سولاردا ییرغالانان قاییق کیمی ایدی. «لیل‌پار»ین اوره‌یی اوخویوردو:
ساحیل ساکیت، چکیلیب‌دیر آیاق‌لار،
چوشان دالغا قایالاری قوجاقلار،
دئین‌ده کی، گَـل، قاییق‌لا اوزَ‌ک، یار،
چاتیب قارا قاش‌لارینی، نه‌دن سن،
اولماز-اولماز، اولماز-اولماز دئییرسن؟!
#سون.
قایناق: ادبیات فزئته‌سی