image_printپرینت خبر

چنلی‌بئله گلیب چیخماق بیلمه‌ین ائیوازین خفتینی چکن «آلا گؤزلو نیگار خانیم» آغلاییر و اونون آغلاماغینی گؤرن کوراوغلو بیر طرفدن صدقی-اورکدن کدرلنیر، حتتا سارسیلیر:

اوره‌ییمی ائله‌ییب قان،
آغلاما، نیگار، آغلاما،
اولوم گؤزلرینه قوربان،
آغلاما، نیگار، آغلاما…

– او بیری طرفدن ایسه عینی گرایلی‌دا:

… مئیداندا نعره چکرم،
گؤیدن اود- آلوو تؤکرم،
داغ‌لار، قایالار سؤکرم،
آغلاما، نیگار، آغلاما…

– دئیه جوشار، غضب‌لنیر و اونون ادعاسی ایله ایمکان‌لاری اوست- اوسته دوشدویو اوچون بیز (اوخوجو، دینله‌ییجی) اونا ایناناراق، بیلیریک کی، کوراوغلو دئدییینی ائده‌جک، چونکی بونا قادیردیر.

کوراوغلو ایله نیگارین محبتی اونا گؤره تأثیرلی و ایناندیریجی‌دیر کی، داستاندا یالنیز کوراوغلونون بیرطرفلی سئوگیسی یوخ، اونلارین قارشیلیقلی سئوگیسی («لیلی و مجنون»داکی کیمی! «رومئو و ژولیت»داکی کیمی!) اؤزونون یوکسک بدیع- استاتیک ایفاده‌سینی تاپیب.

بو دفعه ده کوراوغلونون سفردن قاییتدیغینی گؤزله‌ین نیگارین سؤیله‌دییی نغمه‌یه فیکیر وئرک، گومان ائدیرم کی، بو نغمه اونو ایچینده‌کی سئوگی و صداقت باره‌ده چوخ سؤز دئییر: «کوراوغلو… بیر ده باخدی، وآللاه، کیمدیرسه، بیر ساز چالیر، بیر اوخویور، گل، گؤره‌سن! قولاق وئریب، گؤردو چالیب- اوخویان نیگاردی. آما ائله چالیر، ائله اوخویور کی، گؤیده گئدن قوش‌لار گؤردو نیگار «یاغی» قوروغونون یانینداکی چمن‌لییی‌نین باشیندا دایانیب، اوزونو ده اونا توتوب، دئییر:

آی آغالار، آی قیزلار،
آی بو گلن یار اولایدی!..
حاقدان بئله‌یمیش یازی‌لار،
آی بو گلن یار اولایدی!..

باغچالار اولماسین بارسیز،
هئیوا‌لار اولماسین نارسیز،
هئچ گؤزل اولماسین یارسیز،
آی بو گلن یار اولایدی!..

آی بی‌مروت، چیخدی جانیم،
مژگان‌لارین تؤکدو قانیم،
سنه قوربان نیگار خانیم،
آی بو گلن یار اولایدی!..

بو اپیزودون گؤزل و علامتدار جهتی بیر ده اوندادیر کی، کوراوغلو نیگاردان چوخ اوزاق‌لاردادیر و گؤزله اونو گؤرمک مومکون دئییل، آنجاق بو سئوگی‌نین مقیاسی ایله‌دیر کی، بوتون طبیعت قانون‌لاری‌نین ضددینه اولاراق، گؤزله گؤره بیلمه‌یه‌جه‌یینی ده سنه گؤستریر، ائشیده بیلمه‌یه‌جه‌یینی ده سنه ائشیتدیریر.

بو جهتی ده یقین، خصوصی قئید ائتمک لازیمدیر کی، نیگار، کوراوغلو اوچون یالنیز اؤز یاری، اؤز خانیمی دئییل و کوراوغلونون دئدییی کیمی: «چنلی‌بئلده دلی‌لرین ده، خانیم‌لارین دا آناسی نیگاردی».

یئنه بیر ماراقلی جهتی وورغولاماق ایسته‌ییرم: آرتیق دئدیییم کیمی، کوراوغلو بوتون وارلیغی ایله نیگاری سئویر، نیگار اونون ایلک و سون محبتی‌دیر، آنجاق عینی زاماندا، کوراوغلو قادین گؤزل‌لییینی گؤرن و قیمت‌لندیره بیلن (و قیمت‌لندیرن!) بیر صنعتکار، بیر آشیق‌دیر. او، تصادوفن «قارص» پاشاسی‌نین قیزی «حورو خانیمی» گؤرنده، باخین، اوچ‌تئللی سازی اونا (یعنی کوراوغلونون اؤزونه!) بو قوشمادا بیر آز دا مزه ایله نه‌لر سؤیله‌ییر:

… سیاه ساچ‌لار دال گردنه دوزولو،
قارا گؤزلر خومارلانیب سوزولو،
ائله باخما، ایندی جانیم اوزولو،
خانیم، هانسی بخت‌ورین یاریسان؟

#داوامی_وار…