image_printپرینت خبر

بؤیوک تورک امپراتوری‌لری (ساق، هون، گؤی‌تورک، اویغور، خزر و…) زامانی یارانمیش داستان‌لاریندان – تانری قارا خان‌ین دونیانی یاراتماسیندان، اینسان‌لاری خلق ائتمه‌سیندن بحث ائدن «یارادیلیش (دوغوش) داستانی»، ایران- توران محاریبه‌لری‌نین قهرمانی، افسانه‌وی- تاریخی توران حؤکمداری «آلپ أر تونقا» (محمود کاشغری‌نین «دیوان الغات‌الترک»ونده خاقان تیتولو قازانمیش افراسیاب) حاققیندا «آلپ أر تونقا داستانی»، اسکندر ذوالقرنین (الکساندر ماکئدونلو) ایله قارشیلاشان گنج تورک حؤکمداری «شو» حاققیندا یارادیلمیش «شو داستانی»، هون بیرلییی داغیلدیقدان سونرا قدیم تورک طایفالاری‌نین، خان‌لاری‌نین (اوغوز خان، سئوینج خان، ایلخان..) بیر-بیرلری ایله ساواشلارینا حصر اولونموش و ماهیتی، معناسی اعتباریله تورک بیرلییینه، تورک اؤزونه قاییدیشینا چاغیران «ائرقنه‌کون Erqənəkon داستانی»، قارا دنیزدن هندیستانا کیمی نهنگ بیر اراضی‌ده اؤز دؤولت‌لرینی قورموش گؤی‌تورک‌لرین یاراتدیق‌لاری «بوزقورد داستانی»، اویغور ائل‌لری‌نین حؤکمداری «بوغو خان‌ین» چین‌لی‌لرله ساواشینا، تورک وطن‌پرورلییینه حصر اولونموش «کؤچ داستانی» و اسلاما قدرکی دؤورون بو کیمی بیر سیرا باشقا داستان‌لاریندان، ائله‌جه ده اورتاق «دده قورقود»دان، قیرغیز خالقی‌نین «ماناس»یندان، اؤزبک، قازاخ، قاراقالپاق خالق‌لاری‌نین «آلپامیش»یندان، آیریجا قاراقالپاق خالقی‌نین «قیرخ قیز»یندان، جنوبی سیبری تورک خالق‌لاری‌نین «کای»یندان، یاکوت‌لارین «اولونخو»سوندان، آلتای‌لارین «ماآدای قارا»سیندان توتموش یالنیز ائله آذربایجاندا و تورکیه‌ده ۲۰-نجی عصر ده داخیل اولماق‌لا (!) سونراکی دؤورلرده یارانمیش داستان‌لارا قدر («اصلی و کرم»، «آشیق غریب»، «قوربانی»، «عابباس و گولگز»، «شاه‌صنم و غریب»، «قاچاق نبی»، «قاچاق کرم» و س.) هم تاریخ‌لیک، هم بدیع‌لیک و استاتیک باخیمیندان، هم ده کمیت اعتباریله نهنگ و بادیر مندرجات‌لی بیر یارادیجیلیق بو ژانرین تورک خالق‌لاری‌نین تاریخی و طالعی، معنوی دونیاسی و کاراکتئری نئجه یوکسک (و علامتدار!) بیر یئر توتدوغونو آچیق- آشکار گؤسترمکده‌دیر.

تورک داستان‌لاری بدیع- استاتیک باخیمیندان بؤیوک تکامل یولو کئچیب، قهرمانلیق و وطن‌پرورلیک، محبت و صداقت، مردلیک و خئیرخواهلیق ایده‌آل‌لاری‌نین بدیع تقدیماتی عصرلردن عصرلره زنگین‌لشیب و بو باره‌ده تورک خالق‌لاری‌ آراسیندا واریانت و نسخه‌لری أن چوخ یاییلمیش «کوراوغلو» داستانی‌نین خصوصی یئری وار.

«جورج ساند – ۱۹-نجی عصر فرانسیز ادبیاتی کلاسیک- «کوراوغلو» داستانینی «دونیادا أن زنگین و أن گؤزل نمونه» ساییردی و کوراوغلونون اؤزونو «میللی داهی» آدلاندیراراق٬ اولسون کی، بیر آز دا حیسه قاپیلیب، بیر قادین قیسقانجیلیغی و عینادی ایله داستانداکی کیچیک بیر نظم پارچاسی باره‌ده «بو، بوتون ویکتور هوگو یارادیجیلیغینا برابردیر» دئییردی.

«کوراوغلو» حماسه‌سی اورتاق تورک آبیده‌لری آراسیندا نثری‌نین ده، نظمی‌نین ده (خالق شعری‌نین داستاندا استفاده ائدیلمیش اوچ فورماسی‌نین: بایاتی، گرایلی و قوشمالارین) پوئتیک وسعتی، مندرجاتی‌نین چوخ‌جهت‌لییی اعتباریله خصوصی بدیع- استاتیک و میللی- معنوی چکییه مالیک بیر یارادیجیلیق نمونه‌سی‌دیر و بو داستانین مشخصه‌سینی یالنیز بیر آنلاییشلا شرح ائتمک، کونکرئت تصنیفاتینی (طبقه‌بندی) وئرمک چتین ایدی.

«کوراوغلو» علمی ادبیاتدا قهرمانلیق داستانی حساب ائدیلیر، آنجاق مسئله بوراسیندادیرکی، او، آز قالا، قهرمانلیق داستانی اولدوغو قدر ده بیر محبت داستانی‌دیر و بو داستاندا کوراوغلونون نیگارا (تورکمن واریانتیندا آغا یونوس، قازاخ و اؤزبک واریانت‌لاریندا آغا یونیس، میسکال پری، گولنار پری، گولنار- آی…) محبتی‌نین بدیع ایفاده‌سی، اونون ایگیدلیییندن، جسارتیندن و دوشمن‌لره نفرتیندن هئچ ده آز دئییل – نئجه کی، کوراوغلونون میصری قیلینجی‌نین بدیع- استاتیک جاذیبه‌سی، اونون سازی‌نین بدیع- استاتیک جاذیبه‌سیندن آز دئییل.

#داوامی_وار…