image_printپرینت خبر

نئچه ایل‌لر بو یولون یولچوسو اولدوم. یولون یاریسی‌نی بیتیرمیشدیم. اوزاق‌دان بیر سس قولاغیما ده‌یدی. نئیله‌دیم‌سه بیلمه‌دیم هانسی طرفدن بو سس گلیر. ایستر- ایستمز یولومو داوام ائتدیردیم. بو دؤنه او سس منی گئری‌دن چاغیردی. باشا دوشدوم دؤنوب آرخایا باخمالی¬یام، دؤنن کیمی کیچیک قارداشیمی دوشوندوم.
– داداش توتدوغون یول یانلیش‌دیر دئدی!
آغزیندان اؤپوب، الینی سیخیب، کوچه‌میزه قاییتدیق. گؤردوک آز یاشلی اوشاق‌لار، اوشاق اویون¬لاریندان بیرینی اویناییرلار:

ال- اله دویمه -دله
بیز گئدیریک بابام گیله،
بابام گئدیر باشماق آلا،
بیر تای سنه بیر تای منه…

آیاق‌لاریما باخدیقدا ،گؤردوم آیاق‌لاریم یالین‌دیر، نئچه واختی آیاق‌قابی‌سیز گزیشمیشم، داها کوچه‌میزدن ال چکمه‌دیم.