image_printپرینت خبر

ابتدایی صینیفی‌نین اوچونجو، دؤردونجو کلاس‌لاریندان کیتاب قوردو اولموشدو. کیتاب الیندن دوشموردو. آتاسی وئردیگی جیب پولونو توپلاییب اؤزونه کیتاب آلیردی. چوخلوق دا عمومی کیتابخانادان کیتاب امانت آلیب اوخویوردو.
یئر به یئر دانیشدیغی آغیزیندان یئکه سؤزلر هامینی تعجوب‌لندیریردی.
آتاسی شوخلوقجا “آخیردا بو اوشاق باشلی گورا گئتمز، دیلی باشینا بلا اولار” – دئییردی.
آناسی کؤوره‌لیب:
“آغزیندان قارا یئل‌لر آپارسین کیشی، او نه سوزدور اوشاغا دئییرسن؟!” – آجیقلانیردی.
یادینا گلدی بیر گون اوخولدا حاکمیت‌له باغلی بیر جشن واریدی.
اداره‌دن نئچه نیظارتچی ده گلمیشدی. برنامه‌نین بیر قیسمتینده کوکلالار نمایشی واریدی.
اوشاق‌لار حئیرت‌له آرخاسی قارانلیق، اؤنو ایشیق صحنه‌ده اویناشان، دانیشان قولچاق‌لاردا باخیردیلار.
لاپدان قیشقیردی: او کوکلالار اؤزباش‌لارینا ترپنمیرلر. قارانلیقدا کی گؤرونمز ال‌لر اونلاری ترپدیرلر، اونلارین یئرینه دانیشیرلار.
او گیزلی ال‌لر قارانلیقدا گیزله‌نیب‌لر. باخین اونلاری ایپله اوینادیرلار. او کوکلالاری گیزلی ال‌لر اوینادیرلار….

مودور، ناظیم اونا گؤز آغاردیب سوکوتا دعوت ائتمیشدیلر، اداره نیظارتچی‌لری ده تعجوبلو اونا باخمیشدیلار.
سونرالار گنج چاغلاریندان ژورنالیست اولوب گیزلی ال‌لری و چوخ ال‌لرده اوینایان کوکلالاری افشا ائتمیشدی.
پرده دالینداکی گیزلی‌لری آشکارا چیخارتماق ایشی اولموشدو. سونرالار دوشوندو بو یئرده اوغرولارین، اَیری‌لرین یوخ، اونلاری گؤرنلرین گؤزلرینی چیخاردیرلار!!

بو خارابا ماغارانین دار، دودوک پیلله‌لرینی ائویندن ده یاخشی تانیییردی. ساچی بوردا توکنمز سورغو- ساواللا آغارمیشدی. خفیه اورگانیندان چیخاندا، بیر نئچه آددیم اوزاقلاشدیقدا، بیلرکن یوخسا بیلمز‌دن، قاپیدا دوران کئشیک عسگر تتیکی چکدی، الینده کی سیلاحینی شاققیلداتدی، یازیچی دیکسینرکن دونوخوب یئرینده دوردو.
آتیلمایان گولـله‌نین یاندیریجی آغریسی‌نی دوز کوره‌یی‌نین اورتاسیندا، اوره‌یی‌نین دالیندا حیس ائتدی. ایستی- ایستی بیر شئی اوره‌ییندن ایچینه تؤکولدو. گؤوده‌سینی سویوق تَر باسدی. ایندییه‌دک اؤلومو بو قَدَر یاخیندا حیس ائتمه‌میشدی.
ایندی ایسه هر بیر قلم الینه آلدیقدا دوز او نوقطادان کوره‌یی‌نین اورتاسی سانجیر… اوره‌یی ایستی-ایستی ایچینه تؤکولور…