image_printپرینت خبر

کؤلگه‌سی یئره گیرن زامان کیلیکو الی بوش قاییتدی. یولدا بیلگه بیر یاشلی آدام (پیر مرد حکیم) اونا دئدی:
-بولودلار بورادان چوخ اوزاق‌دا، یوکسک شمال‌دا یاشاییر. اوفوق خطینه چاتدیقدا، گؤزلری‌نین اوجونداکی یئنی خطه ساری گئده‌جکسن. بلکه اورادا بیر نئچه بولود تاپا بیلرسن. آلچاق کؤنول‌لو اولسان، مؤحکم اراده‌لی و معرفت‌لی اولسان، آختاردیغینی تاپاجاقسان. مغرور و اؤزونو بیه‌نن اولارسان سا، ائوه الی‌بوش قاییداجاقسان.
من دئدیم اؤیله اولسون.
ائرته‌سی گون، کیلیکو دوشدو یولا. گونش اونو یاخالادی:
-هارا گئدیرسن بئله‌سی؟ منیم ایشین‌لاریم‌ (شعاع‌لاریم)دان قاچا بیله‌جه‌یینی می سانیرسان؟!
-منی راحات بوراخ! اوزون بیر یولچولوغا چیخمیشام. گئت آیری‌سی‌نین کلله‌سینی یاندیر.
بیر آز سونرا کیلیکو، بیر فیل ایله قارشیلاشدی. فیل بیر گؤل‌ده دولاشیردی. فیل او قدر یئر توتوردو کی، سو قابی‌نین ایچینه اوردان سو دولدورا بیلمیردی. چوخ پیس! او آیری نوقطه‌ده گرک سو ایچسین. یاشلی بیلگه آدام‌ین دئدییی بیرینجی خططه یئتیشدی و اورادا بیر قویو تاپدی. چوخ بؤیوک بیر ایلان اوردا بورولوب اوتورموشدو.
ایلان فیشیلدادی:
-نه ایسته‌ییرسن؟
کیلیکو بیلگه آدام‌ین دئدیک‌لرینی خاطیرلایاراق جواب وئردی:
-خواهیش ائدیرم اجازه وئرین بیر آز سو گؤتوروم. چوخدان‌دیر یول گئدیرم، سوسوزلامیشام.
-چالیشیب سو قابیوی من توتمادان قویویا ساللایا بیلسن اوندا سو گؤتوره بیلرسن.
کیلیکو اویناماق ایسته‌میردی، آما او قدر سوسوز ایدی کی، دالی اوتورانمازدی. بیر ده‌یه‌نک گؤتورور، سو قابی‌یله بیرلیکده، وار گوجویله ایلان‌ین باشینا تولازلادی. یاری گیجه‌لمیش ایلان کفایت قدر سرعت ایله تَپکی (عکس‌العمل) وئره بیلمه‌دی و کیلیکو سو آلماغی باشاردی. اوووففف! قورتوم- قورتوم سرین سودان چکدی باشینا، جانلاندی و یئنی‌دن یولا دوشدو.
گؤزلری‌نین سونوندا ایکینجی خططه یئتیشدیکده، دابان‌لاری یورقون‌لوق‌دان زوققولدوردو.
بیر آز او یانلیق، بیر دولقون، شیشکین و پوتا بولود عایله‌سی، گؤی اوزونده سووه‌ل‌لَنیردی.
-هورااااااا، من قازاندیم! -دئیه، باغیردی.
او سون گوجونو توپلاییب، بولودلارا ساری گئتدی. سونوندا، کؤلگه‌نین راحات‌لادیجی تازالیغیندان و نملی تورپاغین قوخوسوندان لذت آپاردی!
بو بالاجا آدامین گؤرونتوسو ایله اَیله‌نن بولودلار، اونون اوزونه بیر نئچه دامجی دامجیلادیلار و کیلیکو اونلارا ائله گولومسه‌دی کی، بوتون آغ دیش‌لری گؤرسندی.
بیلگه آدام‌ین سؤزونه گؤره، کیلیکو اونلاری سلام‌لادی، سونرا دئدی:
-سلام بؤیوک بولودلار! منیم آدیم کیلیکو-دور. آشاغی گونئی‌دن (جنوب پایینی) گلیرم. سیزی تاپماق اوچون چوخ اوزون مدت یول دؤیموشم. گونشی کندیمیزدن قووماق اوچون سیزین یاردیمیزا احتیاجیم وار. یولونا چیخان هر شئیی قُووورور. حئیوان‌لاریمیزین اوتلاماسی اوچون یالنیز داش- چانقیل وار، آرتیق بیر دامجی سویوموز یوخ‌دور.
آتا بولود، بو ایستک‌دن تعجب‌لنه‌رک آنا بولودا دئدی:
-اوردا بیر نئچه عموغلوموز، عمی قیزیمیز یوخ‌دور مو؟
-یوخ، یوخ‌دور.- دئیه جواب وئردی. چوخدان‌دیر یولا چیخیبلار، یولدادیرلار.
آتا بولود اوزونو توتدو کیلیکویا، دئدی:
-آه، نه یازیق کی، بیزسیز اداره ائده‌جکسن. آشاغا گونئیه گئدن بوتون بولودلار سویونو ایتیردی. سیزه گلسک عئینی شئی بیزیم ده باشیمیزا گله‌جک.
اوشاق بولودلار راضی‌لاشمیرلار، اصرار ائدیرلر کی:
-آما آتا، اؤتوره بیلمه‌ریک گونش بو کندی یاندیریب، قووورسون. بیز گرک اونا یاردیم ائله‌یک، بو بیزیم ایشیمیزدیر، اونودموسان می؟

اوشاق‌لاری ایله غرور دویان آنا بولود آرتیردی:
-گؤیون بو گوشه‌سینده‌کی بولودلارین ان احتیاج‌سیزی و ان کؤمکچی‌سی منیم اَریم دئییل‌می؟ اولماسایدی ده‌ییشردی!
آتا بولود بو دانیشمالارا حساس اولدو.
-بیز یالنیز باشیمیزا گونشی آشاغی گونئی‌دن اوزاقلاشدیرا بیلمه‌یه‌جه‌ییک. کؤمک اوچون بولود اوردوسونو چاغیرمالی‌ییک.
بیر نئچه ایلدیریم شاخاندان سونرا بولود اوردوسو ییغیلدی.
بولودلارین ان یاشلی‌سی دئدی:
-سو وئرمک اوچون تارلالار (مزرعه‌لر) اولسا گئدیب او یئرلره باخارام.
بُوز- ماوی بولود آرتیردی:
-من ده، یئنی قویو دولدورارام، منیم‌کی دولوب‌دور، باشقا ایشیم ده یوخ‌دور.
اوزون بیر دارتیشمادان (جر و بحث) سونرا، نهایت هامی راضی‌لاشدی: آیری چؤل‌-چمن‌لره سو وئرمه‌یین واختی گلیب.
کیلیکو چوخ سئویندی. او، سئویندیییندن داملالارین آلتیندا رقص ائتمه‌یه باشلادی.
اونلار یولا دوشدولر؛ کیلیکو یئرده یول بویو آتیلیب دوشه‌رک، بولودلار ایسه گؤیده سوروشه- سوروشه گئتدیلر. بولودلار بورادا- اورادا بیتن بیتکی‌لره سو سپه‌لیر، سوسوز قالمیش حئیوان‌لارا لئیسان یاغدیریردیلار. کنده یاخینلاشینجا، گونش دهشت‌‌لی شعاع‌لاری ایله اونلارین یولونو باغلاماغا چالیشیردی.
-قوی بیز کئچک! منیم بولود دوست‌لاریم سنین قصدن سوسوز قویدوغون چؤل‌لره و کند ساکین‌لرینه سو وئره‌جک‌لر.
یاشلی بیلگه قاباغا گلدی و فیرتینالی (طوفانلی) سسی‌یله دئدی:
-یاشام بو دونیادان بسلندیییندن بری، اولدوزلار و بوتون عنصرلر هامی‌نین یاخشی‌لیغی اوچون ایش‌بیر‌لییی آپاریرلار. کیمسه بونو ده‌ییشه بیلمز. سن گؤیون شاهی، سلطانی دئییلسن گونش، حددینی- یئرینی بیلمه‌لیسن. گئت باشقا اؤلکه‌لری قیزیشدیر. آلت- اوست ائتدییین دؤنگولر (چرخه‌ها) نورمال گئدیشینه داوام ائده‌جک.
من دئدیم، اؤیله اولسون.
بو غضب‌دن تاثیرلنن گونش، شعاع‌لارینی اوزاق‌لاشدیردی و اوفوق-ون آرخاسینا سیغیندی، ایستی‌سینی و توزونو دا اؤزویله آپاردی.
بولودلار کنده یاغیش یاغدیردی، او قدر یاغدیلار کی، دام‌لار و قورو کوچه‌لر یویولوب تمیزلندی. کندلی‌لی یاغیش‌دا قاب- قاجاق‌لارینی و چیرک پالتارلارینی یوووب، دولچالارینی و کوزه‌لرینی دولدورماغا تَلَسدیلر. چیچک‌لر بوی‌لارینی دوزه‌لتدیلر، اینک‌لرله کئچی‌لر داملالاری آلماق اوچون چؤهرئیی دیل‌لرینی چیخارتدیلار. اوشاق‌لار سو ییغیشان یئرلرده آتیلیب دوشدولر.

آخشاما قدر هرکس یاغیش آلتیندا ماهنی اوخویوب اوینادی. اونلار امین ایدیلر گونش گئری‌ گلیب پالتارلارینی قوروداجاق و اورک‌لرینی قیزدیراجاق.
او گون‌دن بری، کیلیکو هر سحر سئوینجلی و یاخشی روحیه ایله یوخودان دورور، آرتیق یاندیران داغ یول‌لاردا اونون باشماق‌لاری اریمیر.

#سون.