image_printپرینت خبر

– او، چوخ گؤزلدیر. گونش اونون سؤزونو یئره سالماز. توووزقوشو یولا دوشدو. مئشه‌نی کئچدی، داغدان آشدی، دنیزین اوزه‌ریندن اوچوب گونش‌ین پنجره‌سینه قوندو. اونو اویاتماغا باشلادی. گونش گؤزونو آچمادان سوروشدو:
– کیمسن، نه ایسته‌ییرسن؟
– من توووزقوشو-یام. سنی اویاتماغا گلمیشم. تئز چیخ ایشلر چتینه دوشوب.
– کیمین ایشیدیر، چتینه دوشن؟
– لاپ ائله منیم. قارانلیقدا قارغا-دان سئچیلمیرم. الوان قویروغومو هئچ کس گؤرمور. گونش حیرصلندی!
– دئمه‌لی من سنین قویروغونا لازیمم. رد اول، بوردان. بیر قویروغا گؤره بوتون دونیانی ایشیقلاندیرماق ایسته‌میرم. توووزقوشو الی‌بوش قاییتدی. سونرا گونش‌ین یانینا بولبولو گؤندردیلر. هامی دوشونوردو، اونون قشنگ سسی وار. گونشی بیر ته‌هر راضی سالار.
دوغرودان دا گونش بولبولون نغمه‌سینی ائشیدنده هیجانلاندی، کؤکس (سینه) اوتوردو، یوخولو- یوخولو دئدی:
– سس‌ین اوره‌ییمی یئریندن اویناتدی. نه آرزون وارسا، سؤیله، سنینچون هر شئیه حاضیرام.
– خواهیش ائدیرم، دونیانی ایشیقلاندیرین. قوی گئجه قورتارسین. گونش ماراقلا سوروشدو:
– مگر سن گئجه‌لر ماهنی اوخویا بیلمیرسن؟
– عکسینه، من هر گئجه اوخویارام. بیر- ایکی گون ده سحر آچیلماسا، سس‌یم توتولاجاق. گونش اونون سؤزوندن پرت اولدو. دئمه‌لی من یالنیز اوندان اؤتری یئریمدن قالخمالی‌یام کی، سن دینجله‌سن، بوغازین آغریماسین، هه؟ بس، اؤز ایستراحتیم نئجه اولسون؟ رد اول، بوردان! بولبول ده کور- پئشمان گئری قاییتدی. بو دفعه گونش‌ین یانینا طوطی‌قوشو-نو گؤندردیلر. او، دنیزین آرخاسینداکی ائوه چاتار-چاتماز قیشقیردی:
– بسدیر، تنبل‌لیک ائله‌دین، اویانماق واختی‌دیر. چونکی من قارانلیقدا یامسیلادیغیم آدام‌لارین نئجه حیرصلندییینی گؤرمورم. گونش جاواب وئرمه‌دی. قورخدو کی، طوطی‌قوشو اونون اؤزونو ده یامسیلایار.
طوطی‌قوشو دا یئره الی‌بوش قاییتدی. ائله بو واخت خوروز خواهیش ائتدی کی، گونش اویاتماغا اونو گؤندرسینلر. یئر ساکین‌لری آراسیندا هئچ کس اونا اینانمیردی. دئییردیلر کی، خوروز گؤزل دئییل، سسی کوبوددور. آما اوندان باشقا گئتمک ایسته‌ین یوخ ایدی. علاج‌سیز قالیب راضی‌لاشدیلار. خوروز اوچا- اوچا دنیزین آرخاسینداکی ائوه گلدی. گونش شیرین یوخودا ایدی. خوروز اونا یاخینلاشیب دریندن نفس آلدی. اؤز نغمه‌سینی اوخوماغا باشلادی. گونش دیکسینیب آیلدی. آز قالا ییخیلاجاغدی. یورغانی اوستوندن دوشدو، بوتون دونیا ایشیقلاندی. گونش گؤزلرینی اوووشدورا- اوووشدورا قیشقیردی:
– بو کیمدیر؟ منیم ائویمده نه گزیرسن؟
– قوققولو قو، قوققولو قو، اویان، آی تنیل، اؤز وظیفه‌نی بیلمیرسن؟ گونش گرنشدی!
– نه وظیفه؟
– آخی سنین وظیفه‌ن ایشیق ساچماق، یئری قیزدیرماقدیر. سن‌سیز یئر اوزونده حیات اولماز. هر یانا ظولمت چؤکر. اوندا اؤز حیاتین دا معناسیز کئچر. گونش‌ین گؤزلری دولدو.
– من اونسوزدا عؤمروم بویو عبث (بیهوده) ایشله‌میشم، هئچ کس قدریمی بیلمیر. منه قیمت وئرمیر. توووزقوشو آنجاق قویروغونا خیدمت ائدیر، بولبول اؤز نغمه‌لرینه قولاق آسیر، طوطی‌قوشو دا عاغیل‌سیزین بیری‌دیر. خوروز اونونلا راضیلاشمادی. دئدی:
– ای، تنبل گونش، سن آدام‌لاری اونوتموسان. آخی اونلار سن‌سیز یاشایا بیلمز. گونش تعجوب‌لندی.
– آدام‌لار نه‌ییمه گرکدیر؟ گویا اونلار اولماسا، ایشیغیم، حرارتیم آزالاجاق.
– بس نئجه؟ آدام‌لار اولماسا، رنگین سولار. سحر چاغی سنین شعاع‌لارین شئه‌لی اوت‌لارین، سونبول‌لرین، چمن‌لرین اوزه‌رینه دوشوب برک وورور، چوخالیر.

بس، تورپاغی اکیب- بئجرن، یاشیل‌لاشدیران کیمدیر؟ گونش دئدی:
– البته آدام‌لار.
– دئ گؤرک، سو گؤتورمک اوچون یئرده‌کی قویولاری کیم قازیب؟
-آدام‌لار قازیب. بوندان نه اولسون کی؟
– سن مشهور بیر مثلی اونوتموسان. قولاق آس، گؤر اوردا نه دئییلیر؟ آی‌ین عکسی گؤل‌لره دوشور، اولدوزلار سایریشیر، هر قویودا گونش‌ین شکلی گؤرونور. گونش اونون سؤزلری ایله راضی‌لاشدی.
خوروز دئدی:
– قادین‌لار بولاق باشیندا توپلاشاندا سن اونلارین کوزه‌سینده (بارداغ) گؤرونورسن. یاخشی دئییبلر، گؤیده بیر گونش وار، یاخشی ائو صاحیبی‌نین ایسه کوزه‌سی بیر گونش‌‌دیر. گونش اونونلا راضی‌لاشدی.
– نه دئییم، بلکه ده سن حاقلیسان، آنجاق یئریمدن قالخماغا هوسیم گلمیر.
– اوندا رنگین سولاجاق، سؤنوب گئده‌جکسن. لاپ کوتان (یئری قازان دمیر) کیمی! یادیندادیر کندلی‌نین کوتانی دا ایش‌سیز قالدیغیندان تامام پاس باسمیشدی.
– ائله‌دیر، ائله‌دیر، سن حاقلیسان.
– ایندی گؤردون، آدام‌لار اولماسا، دونیایا ظولمت چؤکر. سن ایسه اینسان الی ایله دوزلدیلن هر شئی‌ده برق ووران مین‌لرله گونشی گؤره بیلمزسن و… گونش فیکره گئتدی:
– آی خوروز، نغمه‌لرین چوخ شیرین‌دیر، آنجاق باشا دوش کی، من اؤزومچون یاشاماق، دینجه‌لمک ایسته‌ییرم.
– آی، آی، آی تنبل گونش، یالنیز اؤزو اوچون یاشایان هر کس، باشقالاری اوچون اؤلموش کیمی‌دیر. یالنیز یاخشی ایشله‌ین‌لر، یاخشی دا دینجه‌لیر.
گونش یاتاقدان قالخدی، وار- قوه‌سی ایله یئری ایشیقلاندیردی. او واختدان بری خوروز هر سحر گون دوغمامیش یاتاقدان قالخیب اؤز نغمه‌سینی اوخویور. او، اولجه اوزونو گونشه توتوب دئییر:
– قوققولو قو، قوققولو قو، اویان، ایشه باشلاماق واختی‌دیر. سونرا او، تورپاغا موراجعت ائدیر. اویان، اؤز شیره‌نله توخوم‌لارا و کؤک‌لره قوت وئر. خوروز اوچونجو ماهنیسی‌نی آدام‌لار اوچون اوخویور. یئرینیزدن قالخین، اویانین، گون چیخیب، تورپاق سیزی گؤزله‌ییر، اویانین.

#سون.

قایناق‌:
usaqarzulari.tr.gg