image_printپرینت خبر

 

– نه عجب سحرین گؤزو آچیلمامیش مئشه یولونا چیخمیسیز؟ – دئیه، اونلاردان سوروشدو.
– گلمیشیک اوخوماغینی یاخیندان ائشیدک، – شاهین دئدی.
– چوخ گؤزل اوخویورسان، بیزیم اوچون اوخویارسان؟ – شاهانه اوتانا- اوتانا سوروشدو.
– البته، نه اوخویوم سیزه؟
– موغامات! – دئین کیمی علی ائله هوسله موغام اوخوماغا باشلادی کی، قوش‌لا سسینه سس وئردیلر.

اوندان سونرا اوشاق‌لار دوستلاشدیلار. دوست‌لار هر گون بولاق باشیندا گؤروشر، علی اونلارا ماهنی اوخویاردی.

گون‌لرین بیر گونو قورخولو، دهشتلی بیر حادیثه باش وئردی. سحر شاهین، شاهانه ایله بولاق باشیندا نه قدر گؤزله‌دی، علی گلیب چیخمادی. گئتدیلر علی‌گیله، ائوده دئییلدی. قونشولار دئدی علی تئزدن سورونو مئشه‌یه آپاردی.

آخشام‌چاغی حئیوان‌لار اوتلاق‌دان علی‌سیز قاییداندا لاپ نیگران قالدیلار. علی‌نی هر یئرده آختاردیلار، تاپمادیلار.
بیلمه‌دیلر نئیله‌سینلر. چیخدیلار داغ‌ین باشینا. گؤردولر اوردا دا یوخدور.

باجی- قارداش دوست‌لارینی آختارماقدا اولسون، سیزه کیمدن دئیک، کیمدن خبر وئرک، علی‌دن!
او، سحر سورونو اوتاراندا بیر ده گؤردو ائله طوفان قالخدی کی، یئری- گؤیو توزاناق بورودو. گؤی‌دن دئوه‌اوخشار، عیبه‌جر بیر مخلوق علی‌نین باشی‌نین اوستونو کسدیردی، بیر گؤز قیرپیمیندا اونو قاپیب، یئنه ده گؤیه قالخدی.

– شاهین، شاهانه! – علی دوست‌لارینی سسله‌سه ده اونو ائشیدن اولمادی.

توزاناق قورتاراندان، دومان چکیلندن سونرا علی باخدی کی، اطراف آغ‌آپپاق بولودلاردیر. اؤزو ایسه همین بدهئیبت‌ین قارشیسیندا، اوچان خالچانین اوستونده‌دیر. سئحرلی خالچا بولودلارین آراسیندا یاواش- یاواش اوچوردو.

– بیلیرسن من کیم‌سن؟ – عفریت خیریلتی سسله سوروشدو. من گؤی عفریته‌لری‌نین آغاسی‌یام. ایسته‌سم بیزدن آشاغیدا یاشایانلارین باشینا ائله دولو یاغدیرارام کی، بوتون ائولر داغیلار. الیمدن هر پیس‌لیک گلیر!
– مندن نه ایسته‌ییرسن؟ – دئیه، علی قورخا- قورخا سوروشدو.
– قولاق آس، دئییم! منیم اوچ یوز یاشیم وار. قوجالیرام، گوجوم آزالیر. سنه قولاق آساندا ایسه حیس ائدیرم گوجوم آرتیر. سنی گتیرمیشم منیم اوچون اوخویاسان!
– بوراخ منی، یئتیم اوغلانام، چیخیم گئدیم! – علی دئدی.
– یاخشی الیمه دوشموسن، سنی هئچ یانا بوراخماران دئییلم!
– سنین اوچون اوخویاجاغام! منی زورلا گتیرمی‌سن، اوخویوم، سن ده پیس ایشلر گؤرمک اوچون گوجلنه‌سن؟!
سسیم سنین کیمی عفریت‌لره گوج وئره‌جکسه، باتسا یاخشی‌دیر! من دوست‌لار اوچون اوخویارام!
– گؤرموشم، دوست‌لارین اوچون اورکدن اوخویورسان. ایسته‌سن، اونلاری دا گتیررم یانینا. ایسته‌سن، اونلاری داشا دؤند‌ره بیلرم، داها اونلار اوچون داریخمازسان. ایسته‌یینی دئنن، هر شئی ائده بیلرم. – دئییب، عفریت قهقههه چکدی.
– اوخویارام سنین اوچون، بیرجه دوست‌لاریما ده‌یمه! – دئیه، علی آغلامسینیب دئدی. او، عفریت‌ین نیّـتینی آنلادی.
– عاغیل‌لی اوغلان‌سان! اوندا منه بیر قشنگ ماهنی اوخو!

علی باشلادی کدرله اوخوماغا. اوخویاندا گؤزلریندن بیر داملا یاش دوشدو آشاغی. بو او واخت ایدی کی، دوست‌لاری شاهین و شاهانه علی‌نی تاپماق اوچون داغا چیخمیشدیلار. همین گؤز یاشی دوشدو دوز شاهانه‌نین یاناغینا.

علی اوخویان کیمی بولودلار دا آغلاماغا باشلادی. ائله یاغیش باشلادی، هله او طرفلرده بئله یاغیش اولمامیشدی. باجی- قارداش قاچیب ماغارادا گیزلندیلر.
بیردن اونلار علی‌نین غملی سسینی ائشیتدیلر.
هارداسان، علی، – دئییب باجی- قارداش بَـرکدن علی‌نی سسله‌سه‌لر ده، اوندان سس گلمه‌دی. آخشام دوشدویوندن اونلار ائوه قاییتدیلار.

اوشاق‌لار ائله ایسلاندیلار، آخشام مؤحکم قیزدیردیلار. سَـتلجَـم اولوب، قیزدیرما ایچریسینده یاتاغا دوشدولر. آتا- آنالاری اونلارا داغا گئتمه‌یه ایجازه وئرمه‌دی.

علی دایانمادان غملی ماهنی‌لار اوخویوب، عفریتی شادلاندیریردی. عفریت اونا قولاق آساراق گوجلنیردی. علی، عفریت یاتاندا دا اوخویوردو. او قدر ا خوموشدو، سسی خیریلداییردی.

عفریت‌ین یانیندا اینسان کیمی دیل بیلن بیر طوطی‌قوشو واردی. عفریت علی‌یه ایجازه وئرمیردی قوش‌لا دانیشسین. علی حیس ائدیردی کی، قوش اونا نَـسه دئمک ایسته‌ییر. بیر گون عفریت یاتاندا علی اوخوماغا باشلادی.
اؤزو ده اوخویا- اوخویا قفسه یاخین‌لاشدی. ایشاره ایله قوشو باشا سالدی کی، نه دئمک ایسته‌ییرسه، قولاغینا دئسین. طوطی‌قوشو اوّل اینسان کیمی آه چکدی، سونرا ایسه پیچیلتی ایله دانیشماغا باشلادی:
– علی، سنه اوره‌ییم یانیر. چوخ پیس مخلوقا راست گلمیسن. عفریت یوخاری‌دان جماعاتی گودور، کیمین محصولو یاخشی اولسا، پاخیل‌لیق‌دان دولو یاغدیریر. محصولو هئچ ائدیر. کیم اؤزونه یاخشی ائو تیکسه، چایی داشیریر، سئل ائوینی آپاریر.
او سنین سسیندن قوّت آلیر. عفریت‌دن خیلاص اولماغین بیر یولونو سنه دئمک ایسته‌ییرم! “قانلی دره”ده بیر ایلان یوواسی وار. عفریت تئز- تئز اورا گئدیر کی، ایلان یاغی ایچسین. یاغی اونا عفریته قاری دوزلدیر. ایلان یاغی، یوز قارا ایلان‌ین دره‌سیندن حاضیرلانیر. ایچنی وحشی‌لشدیریر. بیر گون او، سنه ده همین یاغ‌دان ایچیرتمک ایسته‌یه‌جک. مبادا ایچه‌سن! یوخسا دؤنوب اونون کیمی عفریت اولارسان!

علی مینت‌دارلیق علامتی اولاراق اوخویا- اوخویا الینی قفسه سالیب قوشون باشینی تومارلایاندا قوشون گؤزلریندن یاش آخدی. علی یاواشجا قوش‌دان “نییه آغلاییرسان؟”، دئیه سوروشدو. طوطی‌قوشو گؤز یاشی تؤکه- تؤکه دئدی:
– عفریت‌ین الیندن آزاد اولماق ایسته‌ییرم! نئجه آغلاماییم؟ نه واخت‌دیر کی، اسیر دوشموشم! من قوش یوخ، قیزام. سنین‌له یاشیدام. عفریت منی بورا گتیریب کی، اونون اوچون رقص ائدیم. من ده رقص ائله‌مه‌دیم، طلسیم اوخودو، منی طوطی‌قوشو-یا دؤندردی.

#داوامی_وار…