image_printپرینت خبر

ایکیندی چاغی سورو گلردی اوبایا، قیز- گلین بایدا الینده گئدردی ساغینا‌. سونرا قوزو¬لارین سوروسو امیشه گلردی. ملشمه‌سی یورد یئرین آلاردی.
گون¬لرین بیرینده های دوشدو: «آی آمان! کؤرپه‌لردن یه¬لیگ اولون قارتال گلیب!»
آنام منی بئله چکدی چادیرین ایچینه کی، یالنیز بیر آن آغ باش یئکه قوش گؤردوم، چوخ قورخدوم آما گؤزل قوش ایدی. چوبانین هارایی گلیردی، دئییردی «بیر اوغلاق آلدی جایناغینا!»
چادیرین جیریغیندان باخیردیم سورو داغیلمیشدی آرخاجا، چوبان دَیه‌نک الینده ساغا- سولا قاچیردی، بیر کئچی یامان مله‌ییردی! هئچ کیمدن سس گلمیردی. آنام چادیردان چیخدی من ده دالیسیجا. هامی قارتال¬دان دانیشیردی، بیری، یامان قانادی وار ایدی دئییردی، بیری جایناغیندان دانیشیردی، بیری اوغلاق‌دان دئییردی، من او گؤزل آغ باشا فیکیرلشیردیم.
چوبان دَیه‌نک¬له سورونو ییغیب آرخاجا آپاردی. یورد دا ایش¬لر یئنی‌دن باشلاندی. آنام اوتورموشدو سوزمه‌لری گیرده‌له‌ییردی قورود کونده‌لسین. من یانیندا اوتورموشدوم. دئدیم:
– آی‌آنا؟
– جانا قاداسی؟
– عُقاب‌ین باشی نییه آغ‌ ایدی؟
– قورخدون بالاسی؟
– هه… آما چوخ گؤزل ایدی، بس نییه ککولو آغ‌ ایدی؟
– دور گئت بیرآز دوز گتیر سپیم قورودا.
– گتیریم دئ دا آنا.
– گتیر قاداسی!
ته¬لیمه- ‌‌تله‌سیک قاچیب دوز دولون گتیریب دیرسک¬لندیم آنامین دیزینه.
– آی آنا باشینا دؤنوم دئ دا!
آنام قارتال‌ین آغ باش اولدوغونو بئله دانیشدی:
اوزون ایل¬لر اؤنجه قارتال‌ین باشی دا، دؤشو کیمی، قانادی کیمی‌ ایمیش. همئشه ده گلیب بیر بولاق¬دان سو ایچرمیش، ندنسه او بولاغا دادانمیشدی دئییرلر؛ بیر بایرام گونو گلر بولاق¬دان سو ایچه. قارا گؤز یارپیزلار تزه چیخمیشدی، کؤرپه-کؤرپه. بیر آغ کپه‌نک ده او یارپیزلار اوسته ایسلاق قانادلاری¬یلا دوشموش¬ایمیش.
قارتال گلنده هاوا بئله ترپه‌نر سانکی یئل اسیر، کپه‌نه‌یین یاش قانادلاری بیرآز قورویار. قارتال سویون ایچیب اوچار، بیرداها هاوانین یئل¬لنمه‌سی کپه‌نه‌یی ساغالدار. کپه‌نک اؤزونه گلنده قارتال گؤیون اوزونده گئدیردی.
آما کپه‌نک ایچینده باشقا بیر دویغو یاشاییردی. دیلی توتار- توتماز بولاق¬دان سوروشار:
– قارتال بیرده نه زامان گلر؟
بولاق دئیر:
– صاباح بو زامان یئنه بوردا اولاجاق، ایل¬لردیر بوردا سو ایچر.
کپه‌نک دوشونر: «گرک بوردا قالام، بیرده بو مؤحتشم قوشو گؤرم.» او اوزدن یارپیزلار آراسیندا باشین قاتار. صاباحیسی گون قارتال گلنده کپه‌نک سئوینجیندن بیلمیردی نئیله‌سین! یارپیزلارین آراسیندا اوتوروب باخار او ساناز قانادلارا، ایچینده دئیر: «کئشکه بو قوشون کؤکسونده بیر له¬لک اولوردوم.»
او گون¬دن بری دا کپه‌نک بولاق¬دان آیریلماز. هر گون یارپیزلار یانیندا اوتوروب قارتالی گؤزلرمیش. گون¬لر دال- بادالا کئچر. بیر گون بولاق دئیر:
– قاداسی بس سنین یئرین- یوردون یوخ؟
کپه‌نک دئیر:
– سؤزون دوزو قارتالا وورغونام!
بولاق بو سؤزه مات قالار کی، «ایلاهی کپه‌نک هارا قارتال هارا؟» آما بیر سؤز دئمز. بیلر کی، بیتمه‌ین سئودایا ایلیشیب آما دا اور¬ک بیتیب- بیتمه‌مک بیلمز کی!
هاوا پاییزلاییردی، بولاق کپه‌نه‌یه دئیر:
– قارتالین بو گون سحر کؤچمه‌لی دیر آی بالا، اؤزونه بیر فیکیر قیلمالیسان.
کپه‌نه‌یین ایکی قانادی اولار بیر جانی کی، نه ائلییم نه ائله‌مییم، بیردن سانکی ایتییین تاپمیشدی، گولوب قارتالین گلمه‌یینی گؤزلر.

صاباحیسی گون قارتال گلنده، دیمدییینی اوزادار سویا، کپه‌نک اؤزون آتار سو ایچینه کی، قارتال اونو دا سو ایله بیرلیکده ایچسین. کپه‌نه‌گین بو ایشی قارتالین ایتی گؤزلریندن گیزلی دئییلدی، بیر گؤز قیرپیمیندا باشی اوسته آلیب کپه‌نه‌یی سودان چیخاردار.
قارتال سو ایچمه‌دن چکیلر قیراغا کی، کپه‌نک قوروسون.
کپه‌نک آرزی‌سینا چاتمیشدی، قارتالین له¬لک‌لری آراسیندا یئرلشمیشدی، بوندان گؤزل نه اولا بیلردی کی؟ کپه‌نک سئوینجدن له¬لک‌لر آراسیندا قورودو!
قارتال کپه‌نه‌یین سئوگی¬سینی آنلیردی آما دوشونوردو: «من هارا؟ کپه‌نک هارا؟ منیم یئریم دومان¬لی داغ-لارین قوینودور، اونون یئری…»
بورا یئتیرنده آنامین بوغازینی هیچقیریق توتموشدو، سسی توتولدو، قالانین دانیشا بیلمه‌دی، ساده‌جه دئدی آغ کپه‌نک آغ له¬لک اولدو قارتالین ککولونده.

#سون