image_printپرینت خبر

دوشمانین اوستونو قوش تک آلدیران،
آسلان‌لار دیشیندن اوولار سالدیران،
خاقان‌لار باشینا شئش‌پر چالدیران،
قولاج قول‌لار بوران قوچ کوراوغلودور.

داغ‌لاری، داش‌لاری دومان بوروسه،
قیلینج‌لار پاس آتیب قیندا چوروسه،
میصر، ایستانبول، شام تامام یئریسه،
تک قاباقدا دوران قوچ کوراوغلودور.

قایادا تور قوروب، ترلان‌لار توتان،
یوز یاغینی بیردن قول- قولا چاتان،
عرب آت دؤشونه سردارلار قاتان،
أر باغیرلار یاران، قوچ کوراوغلودور.

جنون، ایلشیب‌لر أرلر قارشیندا،
آلای‌لار بوشلانار تر ساواشیندا،
یئددی مین یئددی یوز دلی باشیندا،
شاه‌لار اوسته واران، قوچ کوراوغلودور.

کوراوغلو اؤزو ده اؤز قیمتینی یاخشی بیلیر، آنجاق بعضن، ائله بیل، اونون ایگیدلییینی اؤزو یوخ، سیرلی (جانلی!) اوچ‌تئللی سازی سؤیله‌ییر، موستقیل اولاراق (!) اونون شأنینه نغمه اوخویور:

کوراوغلویام من، چاپارام،
قیامت اولوب، قوپارام…
یاخود:
کوراوغلویام، قوچ اوغلویام، قوچام من،
چتیندی کی، مرد مئیدان‌دان قاچام من…
یاخود دا:
کوراوغلویام، نامرد کئچمز یانیمدان،
مرد کیمسه‌نی چوخ ایسترم جانیم‌دان…

کوراوغلو بیر طرفدن «دوشمانین قانیندان ایچسم دویمارام» – دئییر (اونون ظاهری گؤرونوشو ده مؤحتشم‌دیر:
«بویو اوجا، کورک‌لری ائنلی، بیغ‌لاری بورولوب کئچیریلیب قولاق‌لاری‌نین دالینا»)٬ او بیری طرفدن ایسه بوتون داخیلی عالمی اعتیباریله ساز اهلی‌دیر و باخین، بو قهرمان، بو جنگ‌آور، بو «نر کوراوغلو»٬ «قوچ کوراوغلو»٬ « بیغ‌لاری بورولوب قولاق‌لاری‌نین دالینا کئچیریلمیش» (!) اینسان چنلی‌بئلی، اورادا نیگاری، دلی‌لرینی، ائیوازی خاطیرلایاندا، طبیعتین گؤزل چاغ‌لارینی، گؤزل منظره‌لرینی گؤرنده، اونون «کؤنلو نئجه آچیلیر، اوره‌یی نئجه آتلانیر» و اوچ‌تئللی ساز بو گرایلی‌دا میصری قیلینجی‌ نئجه عوض ائدیر:

گؤیدن گئدن بئش دورنالار،
بیزیم ائل‌لر یئرینده‌می؟
بیر- بیریندن خوش دورنالار،
بیزیم ائل‌لر یئرینده‌می؟

صؤحبت اولوردو سازیننان،
اؤردک اولوردو قازیننان،
نئچه اینجه‌بئل قیزیننان،
طوطی دیل‌لر یئرینده‌می؟

سئویب، سئچیب بیه‌ندیییم،
صداسینا اویاندیغیم،
آرخاسیندا دایاندیغیم،
مرد دلی‌لر یئرینده‌می؟

…چالخالانیب دؤیوندویوم،
آرخا وئریب سؤیوندویوم،
غوغا گونو اؤیوندویوم،
نر دلی‌لر یئرینده‌می؟…

#داوامی_وار…