image_printپرینت خبر

او، حراست مودورلویونون دفتری‌نین قاپیسینی دؤیه‌رک ایچری گیردی. بیر آلچاق بوی، اورتا یاشلی کیشی، فارس دیلنده و غلیظ تورکی لهجه‌سینده سلام علیک ائدیب ، صندلی گؤستریب ، اوتورماغا دعوت ائتدی.
بوتون سندلره باخاندان سونرا، دئدی:
-یازیرام صاباح‌دان ایشه باشلایاسیز. آما سندلری و اؤزحاقینیزدا یازدیغیز بیلگی‌لری، یاشاییش یئریزدن و کئچمیش ایش یئرلریزدن یوخلایاجاغیق. اگر بو یازی‌لاریزدا یانلیش معلومات اولورسا ، سیزین ایشیز درحال ، دایاندیرلاجاق‌دیر. بونا باخمایاراق که من سیزینله بیر اوستاندانام و سیزین کیمین تورک دیلنده دانیشیرام، آما دوستوم، شیرکت دؤولتین‌دیر و قایدا -قانون لار ، هامی‌یا بیر سویه ده اجرا اولمالی‌دیر.
ایکی طرفلی دانشیق‌لاری تورکجه اولاراق، بیر دوغمالیق حیسی یارانارکن ، اونو چای ایچمه‌یه دعوت ائدرک، چای فلاکسین‌دان ایکی فنجانی چای‌لا دولدوردو.
عمومی سورقولار و دانیشیق‌لار ایشه گؤره گئدرکن، گؤزلره اینانمادان سول قیچینی چیخاردیب، قویدو میزین اوستونه و بو گؤرونتولر ایش ایسته‌ین آدام‌دا درین شاشقین‌لیق یاراتدی.
آغزی‌نین سویونو اوتقونانمادی و بوغازی قورودو، بو حالی حراست مودورو گؤررکن ، دئدی :
-قورخما! ایندیه کیمی جانبازگؤرمه‌مسیز؟ جانباز ائله سؤز دئییل کی… جنگ‌ده الینی، قولونو، قیچینی، گؤزونو و… الدن وئرن انسان‌لارا دئییرلر. سؤزلری اوزاندی، سوروشدو:
-سیز هاردا یارالاندیز و نه‌لر اولدو؟
دئدی:
– سراب کندلری‌نین بیریندن، ژاندارمری افسری اولاراق بو تشکیلاتا قوشولدوم. ایران -عراق ساواشیندا‌، کوردستان بولگه‌سینی، یاغی دوشمن‌لردن قوروماق اوچون ، بانه شهرینه چاغیریلمیشدیق.
اونلار ۱۳۶۳-نجو ایلین دؤردونجو آیی‌نین دوققوزوندا، ساواش ماشینیندا، امکداش‌لارلا شهرین ائشیک یول‌لاریندا گووه‌ن‌لییی قوروماق اوچون تاپشیریغا گئدرکن، ماشین‌لاری یولدا قویولان مین اوستونه چیخاراق پاتلامیش‌دیر. بو تئرور اولاییندا ، سول قیچینی الدن وئرمیش. سول گؤزو، ساق قیچی و ال‌لری یارالانمیش‌دیر. بوتون اوز-گؤزو یاناراق قاپ – قارا اولموش‌دور. یاردیم گروپو آمبولانس‌لا اونلارا چاتارکن، اورژانس درمان‌لاری یئرینه یئتیریلیب آنجاق یارالاری آغیر اولدوغو اوچون، هئلیکوپترله تبریز شهرینه گؤندرمیشلر.
او دئدی:
– تبریزده درمان‌ین اوزون موددت سوردویوندن، یولداش‌لار بو قرارا گلدیلر منیم آنامی خسته‌خانایا گئتیریب منیمله گؤروشدورسونلر. بو فیکری منه ده مصلحت‌لشدیلر. دئدیم، آنام اوچون چوخ داریخمیشام، اونون گؤرمک منیم اوچون بیر دونیادیر، آما اونون اوزولمه سینه هئچ زامان راضی اولمارام. آنام منی ، اوزو یانیق، قیچی کسیک ، الی-قولو باغلی گؤرسه، تاب گتیرمز.
یولداشلاری فیکیرلشیب، بیر یول تاپاراق دئییرلر:
-عزیز دوست، آنانیزی ساواش‌دا یارالانان‌لارین زیارت ائتمک مراسمی و بهانه‌سی ایله سیزین اوتاغا گتیرریک، آما سؤز وئرین اؤزونوزو اونا تانیتدیرمایاسیز.
نهایت گؤروش گونو، امام خمینی خسته خاناسیندا گرچک‌لشیر. آنا ، اوردا بتون جانباز لاری گؤرور و اونلارا آلله‌دان ساغلیق آرزولاییر. گلیب اوغلونا چاتیر، اونو دا گؤرور؛ اوزو یانیقلی، قیچی الدن گئدیب، الی- قولو سینیق آغ پارچادا باغلانیب، گؤزونون بیری اوستو اؤرتولو و باغلی. آما آنا اؤز اوغلونو تانیمر. اونون احوالاتینا دؤنه – دؤنه گؤز یاش‌لارینی تؤکور. اونون ال‌لرینی الینه آلاراق اونا اوغلوم دئییب آلله‌دان شفا ایسته‌ییر.
یارالی جانبازین او تک ساغلام گؤزوندن سوزولن گؤز یاش‌لارینی آناسی گؤرمور.
*
بو دانیشیق‌لاردان سونرا ایش ایسته‌ین هر زامان حراست مودورونو گؤررکن، اونو شیرکت مودورو کیمی یوخ، بلکه وطن قوروجوسو کیمی قارشیلامیش‌دیر. باخیش‌لاریندا، دانیشیق‌لاریندا، اورکدن درین احترامینی هر زامان اونا گؤسترمیش‌دیر.